|
Editoriale
On augurio? Vegnémose incontro!
Xe qua l’Ano Novo: tenpo de auguri, prevision e promesse.
Se vorìa védare realizà tante robe, ma soratuto la pace, l’armonia, el nare d’acordo
Ne xe stà insegnà che la vita la xe on dono, ma al tenpo stesso se n’acorzemo che la xe na lota continua: tra chi governa e chi xe governà, tra siori e poareti, tra paroni e dipendenti, tra veci e zóvani, tra marìo e mojere, tra pari e fiòi, tra chi va in leto e chi fa bordelo, tra chi ghe piase sparare i bòti de fine ano e chi ghe dà fastidio i sbari…
Se fermemo qua par tirare el fià, ma se podarìa nar ’vanti fin a sidiarse e a stufare chi ne leze: xe mèjo che se “vegnemo incontro” e che zerchemo de capirse.
In medio stat virtus ne ga insegnà i latini. Xe vero: se le robe de la vita le va male, xe proprio parché no acetemo “reciprocamente” de rinunciare a na parte del nostro tuto. Vardemo el mondo: pi de 1 miliardo de persone sofre la fame; ogni 6 secondi un putin more de fame. On pasto de manco a testa ne l’arco de on mese, de noantri che podemo permétarse tri pasti al dì (e ’ncora se lagnemo!) el podarìa salvare tante creature.
Ciapemo le fameje: le xe ormai poche quele che riva a festejare i 10, i 15, i 25 o i 50 ani de matrimonio. L’omo e la dona, marìo e mojere, i fa senpre pi fadiga a capirse, a jutarse, a vegnerse pazientemente incontro. Conseguenza? Quando la va ben, separazion e divorzi; có la va male, ofese, bòte, violenza e morte.
Vardemo el mondo del laoro: el goadagno, el bilancio, i “dividendi” ai soci, i capitài trasferìi a l’èstero i se scontra continuamente co la necessità e el dirito al posto de laoro.
Nel canpo de la scola: ghe sarà anca casi particolari, ma el pi de le volte i studenti i pretende de savérgane na pàgina pi del libro. E ’lora contestazion, siòpari, ati de violenza contro i professori, contro le istituzion, i programi, le materie de studio… contro anca on solo rinpròvaro al toso che va ramengo tri dì la setimana inveze de nare a scola.
Le robe no le va mèjo nel mondo de la Sanità. No podemo negare che ghe xe de i casi de “mala-sanità”, ma ormai el malà ghe ne sa pi del dotore che, prima de vèrzare boca, de diagnosticare o de tajare, el te fa firmare on fraco de carte.
E del poro “Cristo in crose”? Parfin quelo semo rivà a métare in discussion, a contestare la so presenza là indove el sta a ricordarne quelo che dovemo fare par nare ’vanti senza crearse on inferno par chei quatro dì che semo qua in tera.
E col nostro dialeto o lingua vèneta? Quando xe che se metaremo d’acordo so ’l modo de scrìvarlo? Tuti pretende de savere, de avere la verità in scarsela e inveze no la ghemo nissun! Se ghe volemo ben a sta “lingua del cuore”, dovemo vegnerse incontro e métarse a caminare tuti so on’unica strada e no védare pi zerti spegazi come “ga, gà, g’a, g’à, g’ha, ghà” … “go, gò, g’o, g’ò, g’ho, ghò” e calcossa altro.
Dunque, démose na regolada, vegnémose incontro e par l’ANO NOVO, ’pena scuminzià, gavaremo la pace, l’acordo e na convivenza pi civile.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On augurio? Vegnémose incontro!
Xe qua l’Ano Novo: tenpo de auguri, prevision e promesse.
Se vorìa védare realizà tante robe, ma soratuto la pace, l’armonia, el nare d’acordo
de Mario Klein
Cultura visentina
Italo Righi (1883-1962)
Xe passà sento ani dal debuto de sto gran tenore nato a Sandrigo e famoso in tuto el mondo
de Giordano Dellai
Da Verona
Da Stallavena…
su le péste de i briganti de la Valpantena
de Wanda Girardi Castellani
|
