|
“La Sguaratà” - Ciàcole adriote
La “Nube”
 | | Zeffira Franzoso, ciamà la “Nube”. |
Ciamà da tuti la “Nube” ma, in realtà, a l’anagrafe la gera Franzoso Zeffira ved. Donà, sposà co Libero Donà che l’aveva lassà presto la nostra tera per i pascoli alti. La “Nube” gera restà co tre fiòi mas-ci, Marcelo, Franco e Giorgio, ancuò anca lori, come so mama e so papà, in Paradiso, e po’ ghe gera l’Alberta, bela ragassina, a sto tenpo ormai, co so marìo Luigino, noni de na bela nevodina. La “Nube” gera na dona de fero e, a la morte del marìo Libero, la se gera tirà sù le màneghe e l’èva portà avanti la becarìa verta dal marìo e che la gera la più grande de Adria. Situà sul corso Vitorio Emanuele II, a l’angolo co vicolo Monaci, la meteva in mostra senpre roba de prima qualità. Bei quarti de bo e de vaca, prosuti e salami da licarse i bafi, co profumi ca stussegava el naso e el palà, prodoti de caciagion, polame e cunini e, in tenpo de Pasqua, agnèi e cavreti. Nel tenpo po’ de la Resuression del Signore la becarìa vegnevà infiorà da gran rami de aloro, de pesco, da cocarde tricolori, cussì come, da Nadale, la vegneva decorà co rami de pino e de abete. Sta macelerìa gera veramente un richiamo de gioia e de festa e la te invitava a entrare co la sicuressa ca te magnavi solo roba sana e genuina.
La “Nube” serviva anca i enti pùblici e l’ospedale e la gera sostegnù dal comesso Gigi, bravo macelaio al quale el mestiere gaveva anca fato avicinare la dona che l’aveva sposà e che la gera na squisita persona de origini toscane, la Gina, na fantesca de casa Baggio. A fianco de la parona po’, in aiuto se trovava el fiolo de botega Eutimio e el fiolo de la “Nube”, Franco, diplomà a le magistrali e anca co boni studi musicali, ca ghe consentiva de sonare el pianoforte e lo faseva cimentare in te la conposission. Sta so arte gera stà sfrutà come secondo interesse, avendo Franco, che el gera anca presidente del Coro Soldanella e spesso in giuria al concorso nassionale de canto corale de Adria, selto de aiutare so mama in tel comercio familiare co la so soma sagessa e l’inteligensa ca conpagnava ogni so assion. No mancava de dare na man anca st’altro fiolo, Giorgio, in t’i momenti de forte lavoro.
In te i ani Sessanta mi lavorava in banca a Mestre e, có tornava, no mancava de fermarme a ciacolare co Franco. No ghe gera volta che la “Nube” no ghe disesse a Gigi de taiare na feta de prossiuto e de dàrmela malgrado la me ritrosia per no profitare de la so bontà. La gheva, la “Nube”, un cuore grande come na casa, la so forsa gera detà anca da l’amore che mai, i so fiòi, ghe faseva mancare. Amore e rispeto. I fiòi, in t’i tenpi de punta del lavoro, dava tuti na man pur se ognuno gaveva profession diverse. La godeva, da resto, la macelerìa Donà, de na reputassion ca richiedeva de èssere tegnù senpre alta. Gigè gera un pressioso omo de botega ca ghe piaseva dare la parola a la gente che el serviva, fin che la “parona”, la “Nube”, stava a la cassa cussì come faseva el maestro Franco. Eutimio, ragassin, iutava a portare a domicilio le spese e a scargare i quarti có i rivava dal masselo, no mancando qualche amorevole... pegnata da parte de Gigi, s’a ghe gera mancanse. La gera fisicamente, la “Nube”, na gran bela dona, elegante, co i so bei cavéi quasi bianchi, rancurà in cocòn e ben tegnù. Un bel viso distinto, d’altri tenpi, co un colorito palido e con un trato senpre misurà in tel coloquio co la clientela. No la mancava de generosità e la contentava, spesso, qualche persona che ela saveva èssere in dificoltà.
Ne i ani, lassà el comercio de la carne, la fameia Donà avarìa rilevà la vila Scarpari e verto un rafinato ristorante, “El Minuetto”, locale de elegansa e de classe ben intonà a l’otocentesca residensa. Ancuò é stà serà el ristorante e continua solo l’atività del dormire e prima colassion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Me piasarìa on’istà…
Chi xe che giorni fà no ga pensà “’desso ghe semo”, có xe rivà da le nostre parte l’anticiclon “Scipione” che ga conpagnà par man l’istà del 2012, vestìa de 34-40 gradi e on’afa da lassarghe le straze?
de Mario Klein
Da Belun
Don Bruno Bersaglio
de Luigina Tavi
Da Rovigo
Ricordi de scuola
de Gianni Sparapan
|
