|
Da la Marca
El palio de le pantane
 | | ’Na vecia pantana sul Sil. |
El Sil el xe un fiume curto ma drio el so corso che xe tuto in pianura se distingue tre zone diverse, ogniuna col so habitat e la so barca tipica. L’alto Sil, da i fontanassi de Casacorba a la çità de Treviso, el xe paludivo e la barca adata la xe la pantana; el medio Sil, da la çità a i confini co Venessia, el xe pi fondo e co ’na corente pi forte, che richiede el batel, ’na barca a remi pi robusta che se presta anca a la pesca co la balansa; el basso Sil che score fra le vale lagunari el presenta la valesana pi indicada par la voga a la veneta.
La barca pi antica e pi difusa la xe sicuramente la pantana o paltana, inbarcassion pìcola, dal fondo piato par sbrissar mèjo fra i bassi fondali e l’aqua fangosa, co la prora e la pupa quadràe par girarse co pi comodo fra i ghebi e i canali pieni de canele, pavere e paerossi; par manovrarla no serve remi, ma basta ’na àtola o pèrtega par spénzar, pontàndola sul fondo o su la riva e par questo i barcariòi i ghe fissava su la ponta un fero a ganso.
La pantana la xe ’na barcheta liziera, fàçile da costruir anca in casa e la se presta a vari usi: traghetar, métar zo nasse e bartoèi, andar a trar in palù, andar al mulin, tajar el strame e el stramedel; xe famoso el trasporto de ruinassi del bonbardamento de Treviso del 7 april 1944 quando che le rovine le xe stàe portàe a monte de la çità a bordo de diesine de pantane spente da contadini che ga riutilizà el material a fini edilissi a costo zero.
Par valorizar ’sta barca che fa parte del paesagio trevisan, come che se pol védar da i quadri de tanti pitorì a partir da i Ciardi, xe stà istituìo qualche ano fà el palio de le pantane che se tien in autuno nel trato che va da Quinto a l’oasi de Cervara a l’interno del teritorio del Parco Naturale Regionale del Fiume Sile che ghe dà el patrocinio a la manifestassion insieme al comune de Quinto e a varie associassion de esercenti.
La gara la xe verta no solo a le pantane, ma anca a barche mosse da remi o pagaje; dopo le prove de navigassion se fa la risalita del fiume e a l’arivo ghè la premiassion e el rinfresco; al Barco Cervara se fa un disnar tradissional e po’ se procede al trasbordo de le pantane e al rientro verso Quinto, dove che se prosegue co altre manifestassion.
Ghe xe giri in barca par i putèi, zoghi su l’aqua, laboratori creativi par la costrussion de le pantane co materiali pòvari, leture animàe e passegiate ecologiche.
L’atrassion principal la xe costituìa dal “Mercato dei sapori con i prodotti del Sile” che propone specialità alimentari chilometro zero: vini, prodoti caseari, miel, pan, fruti e soratuto pessi de fiume come trote, bisate e storioni che no basta mai a sodisfar la richiesta de i visitatori che riva ogni ano senpre pi numerosi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
“Basta cultura dell’egoismo”
Sarà inpossìbile desmentegare quelo che ghemo visto e sentìo dire da Papa Francesco, durante el viajo in Brasile, quando el xe ’ndà a visitare la favela de Varginha: on grande insegnamento, na lezion de umanità.
de Mario Klein
Da San Bonifacio (VR)
L’orto drio casa
Ma semo sicuri che convien fàrselo?... S’a l’è par far ginàstica e risparmiar, co i schèi che se spende a coltivar l’orto, se podarìa iscrìvarse a ’na palestra co i fiochi…
de Enzo Coltro
|
