Da Verona

Soride la vita… in poesia

Da sin., Antonio Lella, Luciano Pengo (al pianoforte), Elvira Venturi Zoccatelli, Agnese Girlanda, Lucia Beltrame Menini (drio presentare el libro).

El primo grupo a recitar le poesie.

Sora e soto, el secondo e terzo grupo de noni-poeti. (foto Mario Adami)

Eco na bela circostanza dove s’à manifestà la grandeza de la scritura poetica che, da senpre, l’è espression de le emozion e de i sentimenti pi profondi de l’omo. Ocasion adata, anca a mostrarse degna de celebrare la vita.
Nel Salon d’onore del Circolo Ufficiali de Verona, presente l’assessor Antonio Lella del Comune de Verona e na bona parte de i poeti del Cenacolo de poesia “Berto Barbarani”, rapresentà uficialmente da la Presidente Elvira Venturi Zoccatelli, giòvedi 2 otobre 2014 è stà celebrà la vita.
È stà presentà el bel libro de poesia in dialeto de Agnese Girlanda, dal titolo apunto SORIDE LA VITA, poesie a on fasolin, che, come nona, la ga dedicà a la neodina Valentina.
Insieme a questo, ghè stà la rassegna NONNI IN POESIA, organizà apunto par la Festa dei Nonni, par ricordare al mondo el so grande valore.
Con la conduzion de Mario Klein, s’à alternà via via i vari poeti, intercalà da i interventi musicali al pianoforte del bravo M° Luciano Pengo che l’à dimostrà che “la poesia ha in sé alcune qualità della musica”. Data la circostanza, l’è stà tuto on seguito de bei testi sul tema de i noni, da senpre sostegno prezioso e insostituibile ne la vita de le fameje.
I noni, ne le liriche, iè stè descriti co’ tanto sentimento in tuti i modi, in lingua italiana e in dialeto.
Questi i nomi de i noni-poeti: Elvira Venturi Zoccatelli, Lucia Beltrame Menini, Maria Dalle Vedove, Giovanna Fratta Pasini, Gabriella Garonzi, Agnese Girlanda, Carolina Guerra, Vittorino Ingegneri (unico “maschio” a dimostrare che la poesia no l’è na deboleza che ga solamente le done), Anna Maria Lavarini, Brunella Magagna, Berta Mazzi Robbi, Bruna Meneghello, Flavia Merlin, Anita Peloso Vallarsa (che à cantà na so canzon scrita par el Zecchino d’Oro), Elena Piccoli Falezza, Rosanna Ruffo e Marisa Tumicelli.
Vien da dire che la sienza, la lege, l’economia, l’ingegneria… le xe tute atività necessarie a la vita, ma la poesia, la beleza, el sentimento, l’amore, iè queste le robe che rende la nostra vita ’ncora pi acetàbile, ’ncora pi vita.

[torna sopra]