Provincia viva

“Mastèa d’oro” 2016

da sin., C. Muraro, D. Giraldo, F. Flores D’Arcais e F. Trevisan

B. Gorlato, el sindaco M. Giraldo, l’assessora Sonia Pinato, L. Favorido e Gianni Beggio. (foto M. Klein)

Doménega 2 otobre a Campagnola di Brugine (PD), presenti el sindaco, Michele Giraldo, e l’assessora a la cultura, Sofia Pinato, ghè stà la 13ª edission de la “Mastèa d’oro”, apuntamento culturale de la Associazione Pro Loco di Campagnola e Brugine, organisà da Luciano Favorido, portà in porto da Carlo Muraro.
Dopo el ricordo del conpianto prof. Paolo Tieto da parte de Luciano Favorido, el profilo critico de ogni singolo artista premià xe stà fato con vera professionalità da la prof.ssa Daniela Giraldo Toscani.
Per la leteratura xe stà premià la padovana FRANCESCA FLORES D’ARCAIS, nota figura de studiosa de l’arte, che ga senpre savudo insegnare a amare l’arte, presentando i artisti “con affetto”, soto forma de “racconto”, pur realisando autentici “saggi critici” veramente didàtici.
Per la scultura xe stà premià FRANCO TREVISAN de Montagnana (PD), on artista a 360 gradi nel canpo de l’arte figurativa: scultura, grafica, medaje. Trevisan xe on poeta del movimento: la tension parte dal volto de la figura par passare con energia a tuto el corpo. Le so sculture “catturano la luce” in ogni momento: question d’amore per l’opera d’arte.
Per la pitura el riconossimento xe ’ndà al pitore padovan BRUNO GORLATO, artista de lunga cariera, famoso par la so creatività del segno e del colore, anbientà in vedute de paesagi evocativi che riciama el passato. Ne le so opere xe presente l’inconsio, l’interiorizassion e la dimension del sogno. El zogo del cromatismo evidenzia la presenza spirituale de l’omo, pitosto che la so fisicità. In sto modo la so arte deventa messagio a l’omo de ogni tenpo.
El sindaco e l’assessora nel so intervento i ga messo in risalto el valore culturale de l’iniziativa de la Pro Loco. Giovanni Beggio, presidente de la Pro Loco de Campagnola e Brugine, conpiaséndose per la selta de i tre personagi, ga ribadìo che la “Mastèa d’oro” la ga da resìstare, parché l’inissiativa gode de na forte risonansa e dà lustro e promove el teritorio.

[torna sopra]