Quatro Ciàcoe
Mensile de cultura e tradission vènete
de Mirco Castellani

Da Verona

Emilio Salgàri
e la maledission de fameja

Monumento a Emilio Salgàri, davanti a la Biblioteca Civica de Verona. (foto S. Salvi)
Monumento a Emilio Salgàri, davanti a la Biblioteca Civica de Verona. (foto S. Salvi)
Quatro Ciàcoe
Na sera stavo vardando l’Eredità, quel simpatico quiz che i fa la sera su Rai 1. In una de le prove i concorenti i dovéa indovinar un “chi” partendo da ‘sti in­dissi: 1862, Verona, Capitan, Torin, San­dokan e Corsaro Nero. Quando s’à no­minà “Verona” ò subito ’ndrissà le rece e, oviamente, quando s’à nominà San­dokan (almanco mi) no go ’vù più dubi: Emilio Salgàri. Eh sì, parché el papà de Sandokan l’era nato proprio qua a Ve­rona nel 1862. Tanti i pensa che el fusse de Torin, ma in quela grigia çità pie­mon­tese el ghera finì solo nel 1900 do­po ’na vita complicà… che ’desso ve conto.
Partemo da l’inissio: Emilio Salgàri (con l’acento su la seconda “a”, come a dir “salici” in dialeto) l’era vegnù al mon­do a Verona el 21 Agosto del 1862, da le parte de Porta Borsari. So mama Luigia Gradara l’era venessiana, e forse l’è da éla che l’à ciapà fin da subito la smania de navigar. Nel 1878 (a 16 ani) lo troemo a l’istituto nautico “Paolo Sarpi” de Venezia, impegnà a ciapar le mostrine de capitan. Però nel 1881, dopo ’na breve esperiensa de navi­gas­sion, el pianta tuto e el torna a Verona con l’intension de far el giornalista. Giornalista sì… ma anca scritor: parché el scominçia subito a sfornar i primi li­bri (par esenpio Le tigri della Malesia, el primo de la serie “Sandokan”, l’è del 1883).
Par Emilio Salgàri ’sto qua l’è un pe­riodo sereno… ma curto: nel 1887 mò­re so mama Luigia, e solo dó ani dopo el perde anca so papà: pensando de averghe ’na bruta malatìa Luigi Salgàri a solo 51 ani el se buta zo da ’na fine­stra. ’Sto suicidio el lassarà un segno indelebile ne l’anima de Emilio, un ta­r­lo che ani dopo el le portarà a ripètar un gesto simile. Ma nel 1889 la fine l’è ancora distante: Salgàri l’è un bel’omo, pìcolo ma robusto, pochi cavéi in testa e dó grossi mostacioni come l’era de moda a l’epoca. El fa el giornalista a “La Nuova Arena”, firmando articoli celebri, come quel del 1890 sul spetà­colo de Buffalo Bill co i indiani che ghe core drio a la diligensa (vedi Q.C. 10-2008).
Nel 1892 el sposa la veronese Ida Peruzzi (’na cantante) e solo l’ano do­po, insieme a la mojer e a la prima fiola, Fatima, el se trasferisse a Ivrea, deciso a far el scritor de aventure a tenpo pien par l’editor Speirani. L’è solo el primo trasloco: da li in avanti la vita de i Salgà­ri la sarà senpre un continuo cambiar casa. Solo siè àni dopo infati el sposta tuta la baraca (Ida, Fatima e l’ultimo na­to: Nadir) a Genova, par èssar più vissin al so novo editor, Anton Donath. Soto la “Lanterna” finalmente Emilio el se tróa ben… ghè el mar pien de velieri co’ le vele al vento, ghè el disegnator milanese, Giuseppe Gamba, che el sarà l’ilustrador de tuti i so futuri romansi (e forsi l’unico vero amigo), e par finir ghè l’ispirassion: lì nasse el Corsaro nero, un libro da tuti giudicà el so capolavoro (e che ’l sarà trasformà in film n’infinità de òlte, a partir adiritura dal 1920). Ma, a i primi del Noveçento, Salgàri el sposta ancora tuta la fameja (che intanto l’era cressù de n’altro fiol: Romero) a Torin. Parché? L’editor el resta Anton Donath de Genova, ma ne la çità piemontese Salgàri el ga a disposission ’na biblio­teca più grande, e anca più possibilità: par esempio el se imbàgola da subito a tégnar ’na rivista setimanal: Per terra e per mare… Gnanca a dirlo che le spese le sarà tante e el tornaconto… zero. A Torin Emilio el scrive de tuto pur de ca­tar sù qualche schèo, anca parché la fameja la continua a créssar (nel 1900 se zonta anca Omar). Ma con ’sta cròni­ca mancansa de serenità, la mojer Ida la scominçia a ’verghe problemi de de­pression. E inissia el periodo bruto… I contrati che Salgàri el fa co i editori i le òbliga a sfornar romansi a geto conti­nuo. Par farlo el passa ore e ore a taolin (carta e pena, no podendo permétarse ’na màchina da scrìvar) e par riussir a concentrarse el fuma çento sigarete al giorno, diluide con litri de Marsala sca­dente.
Par la fameja no’ ’l ghè mai: i fiói i è al sbando e la mojer la dà senpre più de mato. I schèi no’ i basta… la fameja la continua a cambiar casa: dò, tri, quatro, çinque òlte, in çerca senpre de l’afito più basso, çercando senpre de spéndar el manco possibile. Nel 1911 la mojer la cede. La vien ricoverà par “disturbi men­tali” in ospedal e, visto che Emilio no ’l pol permétarse la spesa, la finisse in manicomio. Ormai anca lu no’ el ghe le fa più. El 25 de April el tira la porta de casa par l’ultima òlta. El ga 49 ani… dó manco de so papà. Sul taolo el lassa un par de létere. La prima l’è par i fiói, la seconda l’è par i editori. Ghè scrito: “A voi che vi siete arricchiti con la mia pelle, mantenendo me e la mia famiglia in una continua semi-miseria od anche più, chie­do solo che per compenso dei gua­da­gni che io vi ho dato pensiate ai miei funerali. Vi saluto spezzando la penna. Emilio Salgàri.” I le catarà el giorno do­po in un buron, dissanguà. El s’avéa fato “karakiri” con un rasoio da barba e, in mancansa de aiutante, el s’avéa finì da solo tajàndose la gola.
La so morte spetacolare però la pas­sarà soto silensio: a Torin propio in quei giorni se sta organizando l’Expo 1911 e la stampa la ga altro da pensar; e po’ un suicidio el sarìa stà ’na bruta publi­cità. Dopo un funeral pitoco, la bara la vien spedì a Verona par èssar tumulà in un coridoio del cimitero monumentale.
E dopo? Quela de i Salgàri la conti­nuarà a èssar ’na fameja maledeta: Fa­tima (la primogenita) la morirà nel 1915 de tubercolosi. Ida (la mojer) do­po dies’ani passà in manicomio la mo­rirà nel 1922. Romero el deventarà un eroe de guera, ma par la depression nel 1931 el finirà par suicidarse anca lu. Na­dir el morirà in un incidente de moto nel 1936. El più giovane, Omar, el ten­tarà par tuta la vita de sfrutar el cogno­me, inventàndose libri inediti de so pa­pà, ma anca par lu la maledission de fameja a la fine la domandarà el conto: el se butarà zo da ’na finestra nel 1963, propio come avéa fato so nono Luigi tanti ani prima.
Problemi de schèi, traslochi, depres­sion, suicidio… vegnarìa da pensar che Emilio Salgàri el fusse stà un “porocan”, e invesse no: i so romansi i era famosis­simi… come diréssimo adesso i era “best-

seller”. Salgàri l’era conossù e amà sia dal pitoco che da la regina Mar­gherita (che nel 1897 la l’avéa fato “cavalier”) e tra i so “fans” ghera parfin Puccini e Verdi. Ma alora parché ’sta vita de miseria? Parché co i romansi el so quasi contemporaneo Giulio Verne l’era deventà sior, e Salgàri no? Parché Salgàri no ’l gavéa el senso de i afari. I altri (sia alora come adesso) i se faséa pagar i “diritti” su le vendite. Lu invesse l’era pagà par fornir a i editori un nu­me­ro fisso de manoscriti a l’ano. E no’ l’è mia facile.
Par conclùdar vorìa ricordar che a casa mia Salgàri l’è sempre stà un mito e che me mama Wanda se pol dir che l’era n’autorità in materia. Un so sogno l’è stà da senpre quel de darghe al scritor ’na degna sepoltura ne l’Inge­nio Claris de Verona. Come è sta ri­portà nel so articolo su Q.C. de Otobre 1986, el 24 magio de quel’ano, grassie al so continuo interessamento, el so­gno l’è deventà realtà e finalmente i resti de Salgàri i è stà spostà nel “Phanteon” de Verona, a farghe com­pagnia a Berto Barbarani e a i altri “Grandi”. Par me mama Wanda l’è stà ’na sodisfassion spetà par trent’ani!
E ancora me piasarìa ricordarve Kabir Bedi che interpreta Sandokan nel sene­giato TV de tanti ani fà. L’era el 1976 e la television l’era ancora in bianco e ne­ro (ma no’ ghe faséa caso nissuno). Sandokan in TV l’à fato epoca e ’l ga fa­to rispolverar i libri de Salgàri a tuta Italia. Almanco par un poco.
Emilio Salgàri… da zóane el voléa èssar un capitan e navigar par i mari soto vele sgonfe de vento. No’ l’à mai podù. Ma podemo farlo nojaltri, nel mar de la “so” fantasia, atraverso aven­ture de pirati, corsari e principi de la Malesia. Ricordémose de ’sta eredità che el n’à lassà. E no desmenteghémo­lo.

[torna sopra]

 

Archivio
2019 18 17 16 15 14 13 12 11 10 9 8 7 6 5 4 3 2 1  
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro
Editoriale
Leggi l'articolo Sta’ ’tenta, cara dona…
Xe ben che te diga ’ncora na volta quelo che penso e soratuto te racomando de… star sù co la recia, parché le moine e la confession che l’omo te farà l’8 de marzo, no le xe propio sincere, anca se fate a base de mimosa, al lume de candela e biceri de champagne.
de Mario Sileno Klein
 
Le storie de Dinerio
Leggi l'articolo Magnari veci
de Vittorio Ingegneri-Dinerio
 
Da la Bassa Padovana
Leggi l'articolo Fufi, el me cagneto
de Roberto Soliman
 
Da Ponzano Veneto (TV)
Leggi l'articolo Le done de le giostre
de Silvano Salvi
 
Dal Basso Venezian
Leggi l'articolo Lavarse?
de Toni Zamengo
 
Da Verona
Leggi l'articolo Emilio Salgàri
e la maledission de fameja
de Mirco Castellani