Da San Stèfano de Zimela (VR)

El gusto de stare in conpagnìa

L’ultimo receto de ua.

Giuseppe, che ghe ciamemo Bepi, l’è de i "primi ani Quaranta" e, dopo ’na vita tra alti e bassi come inprenditore, un giorno el se ga catà "pensionato”.
Uno come lu, che non l'è mai stà bon de star fermo un minuto, el ga zercà de “riciclarse” in calche maniera. E ’lora a ghe xe nata la passion par fare el vin; a dire el vero el ghe la gavéa za anca da prima, ma no come produtore.
Co’ i so amizzi el ga scumizià a nare a spigolare i reci de ua che restava indrìo su le vegne, dopo de la vendema. Tanti graspeti i vegnéa lassà lì parché dopo una zerta quota de produzion a i contadini no conviene pi portar la ua in Cantina Sociale. E Bepi, ano dopo ano come spigolatore, con la so Panda el portava e el porta casa tanta ua da fare anca ’na trentina de damigiane de vin. Purtropo, dopo tanto laoro, nasse ogni ’olta el problema grosso: "E ’desso, ci xe che se lo beve tuto, sto vin?" Anca parché a l'è brao a starghe drio, a passarlo e a netarlo con la Luna giusta, insoma el so vin l'è bon. Rosso, Bianco e Proseco, da pasto e fora pasto, ’na gran quantità el la destina da bere fra amizzi. A ’sto punto el garage de drio a la so casa el xe deventà un punto de ritrovo par i “diversamente astemi”. Tra damigiane, cisternete e fiaschi, su la tòla a riva anca calche salado o un bel tòco de formajo, conpagnà da pan biscoto, tanto da poder dire che no se xe là solo par bere. Comunque tra chei muri inpregnà de cultura enologica no go mai visto uno inbriago, parché bere el vin l'è un'arte, perdere el zervelo la xe tuta ’n’antra roba.

[torna sopra]