|
Editoriale
El dovere de la memoria
Ricordare el tenpo passà, i nostri cari, la nostra vita de ieri, le persone de ieri, el sacrificio de quanti, par amor de Patria, i xe morti in nome de la so e nostra libertà: el xe on preciso dovere morale e civile de tuti quanti.
 | | Monumento ai Caduti de Urbana (PD). a cippo (1921-1999). (decoratore Silvio Galletto, scultore Franco Trevisan) |
Questo xe giusto el mese “del ricordo”, l’ocasion che podemo pagare el nostro debito, sia par chi ne ga messo al mondo, po’ ne ga fato créssare, deventare òmeni e done, e sia par chi, in bruti momenti da no desmentegare, no se ga tirà indrìo dal dovere de difèndare la libertà de tuti.
Naturalmente, noantri de oncò conpresi!
Par questo, dopo el giorno del “ricordo privato”, quelo del giorno de i Morti, riva subito el “ricordo pùblico” del 4 Novenbre, el giorno che on s-ciapo de quei che contava, te,’l 1918, i ga messo nero so ’l bianco, par fermare l’inutile strage de vite umane (se càlcola che ne la Prima Guera Mondiale ghe sia stà 654.000 soldà morti, 947.000 ferìi, 600.000 prigionieri e dispersi, 589.000 vitime civili, so na popolazion che a l’epoca jera de 35.600.000 italiani).
Anca fin che scrivemo sti pensieri, ghemo, purtropo, i esenpi pratici de quanto bruta sia la guera, de quanto stupido, insulso e crudele sia provocare la morte de mejari de persone, bùtar zo senza pietà ospedài, scole, teatri, fabriche e case, brusare canpi de fromento, depositi de vìvari e parfin avere el corajo de interónpare el sòno eterno de i morti ne i simiteri.
Questo dimostra che, anca se semo distanti ne la conta de i ani, la realtà de la guera la xe senpre tragicamente atuale.
Che bruta la guera!
Tra le tante bele robe che l’homo sapiens el s’à inventà, cossa xelo nà a tirar fora: la piera, el baston, la spada, el fusile, el canon, le bonbe, i missili nucleari… vantàndose, stupidamente, de avere inventà la morte!
Guài non ricordare ste brute robe, e guài desmentegarse de le vìtime de ste barbàrie.
Par tanti che xe nati e cressù in tenpo de pace in Europa, tuti sti discorsi i xe solamente storia, calcossa de tanto distante, come pole èssare… le Crociate o la Rivoluzion francese.
Dovemo scoltare e crédare a quelo che qualche anzian ne conta su le “atrocità” anca de la Seconda Guera Mondiale, parché quelo che vien testimonià, el ga da restare vivo drento de noantri, se volemo salvare el futuro.
Ricordare vol dire conóssare el passato, ma el ricordo ne permete de conóssare e capire el presente: la xe na sfida contro tuto quelo che ne rende distrati e desmentegoni de quelo che più conta ne la vita.
Eco alora che el nostro ricordo, in sta ocasion, el deventa na trasfusion de riconossenza e de energia che riporta in vita chi ga el so nome scrito so la làpide de on Monumento ai Caduti, o che riposa soto on mucio de piere, dove sora ghe xe nata na stela alpina, come rèssita la canzon-preghiera Stelutis alpinis del conpositore friulan Arturo Zardini.
Ricordando chi no ga pi gnanca on nome o na crose, gavaremo fato na carezza al grande mistero de la vita e de la morte. E no xe poco!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El dovere de la memoria
Ricordare el tenpo passà, i nostri cari, la nostra vita de ieri, le persone de ieri, el sacrificio de quanti, par amor de Patria, i xe morti in nome de la so e nostra libertà: el xe on preciso dovere morale e civile de tuti quanti.
de Mario Sileno Klein
|
