Da Maran Lagunare (UD)

La polenta mola

Quando che 'l torneva a Maran, el salteva quela porta...

Varda, come che la camina lesta, a ciò le renghe cò la traversa. Varda, come che la camina dura, la ga paura de de la puntura...

Fora suneva la canpana de mesozorno, in te la granda stansa che la feva de cusina, tinèl e altro se se vol imaginalo... dopo 'na zornada de duro lavor in mar, duti i speteva de magnà. Un fil de bava ogni tanto la sdrondoneva la porta e i do barcuni, drento sta stansa abiteva 'na fameja. La mare in silensio la veva inpissò el fogo e la veva frito un puchi de gò e 'na manada de anguèle (latterini). "Puvri i me òmeni" - la penseva - "anca ancùo i ga sfadigò bastansa, ma la pescada la xe stada magra come senpre, speremo de sfamali sti benediti...". Sentò in te la panca in parte del fughèr, so marìo ingrisignìo de fredo el se scaldeva ora i pie pìini de buganse, ora le man. Dopo vè frito, la veva messo sù sul fogo la pignata cò l'aqua par fa la polenta. So fioi i metèva a posto i parangài¹, cantando sotovose 'na canson in voga a quìi tinpi, par sofegà la fame:

..l'eva roversà in tola na polenta che profumeva duta la stanza. (disegno de Sara Brochetta)

Una de la fie sentada su 'na vecia carega la faseva la calsa, e la giolgeva de vè inparò a fa el calcagno e la ponta che le gera le do parte più conplicàe, ogni tanto la se grateva le man parché la lana de pecora gresa la ghe feva tacurìgole (solletico). L'acqua za la bugiva e cò dispiasser la povara dona la se veva inacorto che la farina de la polenta la gera poca; dopo vela tamisada, la la ga butada zò lostesso, ziràndola cò la mèscola, forsi sperando che a son de zirala la se varissi infissìo. Ma zira e rizira, la polenta la resteva senpre mola, la pareva cola par tacà i manifesti. No la fa gnanca in tenpo a avilisse, che se sinti bate la porta, verze la manilia e... "Sia lodato Gesù Cristo" - el disi un povro - e duti i ghe rispundi: "Senpre sia lodato".
"Serco la carità" - el disi un ninin vergognoso.

"No vemo né schèi, né pan, né farina de date" - el ghe rispundi el pare de sta fameja alsàndose, (vendo visto el disagio de so mujer riguardo la polenta mola) "forsi te ga mandò l'Ànzolo, dane ti un poca de farina de polenta" - el ghe propuni - "e disna cò naltre". El povro no 'l se lo ga fato dì do volte, sùbito el ghe consegna duto contento el sacheto de la racolta che 'l veva drio la schena, e la mare solevada la zonta a la svelta par quela niova boca un copo de acqua. Cussì la ga podesto fa 'na polenta che sol in te 'l missiàla la profumeva duta la stansa. Dopo velo invitò a scaldasse le man vissin al fogo, con mudi garbài i lo fa acomodà in tola, e quando che la polenta la se ga cusinò par ben, insieme i ga fato 'na bona magnada che quel povro sol che a pensala anca a distansa de tenpo, ghe vigniva l'aqualina in boca. Da quela volta, quando che 'l torneva a Maran a sercà la carità, el salteva senpre quela porta parché el saveva che quela fameja de ànimo nòbile, la gera più pòvara de elo.

¹ = Parangài, sistema di pesca costituito da funicella attualmente in nylon lunga 100 metri, alla quale vanno appesi i fili che trattengono ami ed esche.

La cartolina Un vecèto de un paese vissin a Maran el vigniva 'na volta par setemana a domandà la carità e no 'l voleva murì. - Mì - el diseva - cò riva la cartolina de la partensa, la rispedisso indrìo -. Penso che la cartolina la ghe sia rivada, ma lu, come duti, no 'l ga podesto rispedila indrìo.

M. D.

[torna sopra]

Dal nùmaro de Majo:
Editoriale
Fermè 'l mondo ché mi desmonto!
Ogni dì salta fora calcossa che te ronpe drento.
No 'l xe on male da oji santi, ma el te desgusta
de Mario Klein
[torna sopra]