Da Belun

"Colli ameni" e montagne selvage

Na foto scatà al laghet de Vedana, al 17 majo 1953.

Mas, Peron, S. Gotardo, Vedana, Sospiroi... posti no tant lontani da Belun. Te i vede anca da le coline amene de Liban, pojadi te la piana del Cordévol o a i pié de le montagne che le fa corona a la Val Beluna...
Come mai parle propio de sti posti? Anca qua ò qualche me ricordo che 'l riconpare de tant in tant.
L'era al 17 majo '53, al sol splendéa te la nostra anpia valada e al ne invitéa a qualche escursion. A casa mea ghe n'era la Roseta e so fradel Marco, e na me cugina: tuti i avéa la bicicleta...
"Andóne al lago de Vedana?" propone un. "Gnen anca Giancarlo e la Biancamaria!" Mi no avée, però, la bicicleta, gran sogno de la me infanzia, ma par l'ocasion me mama la me à fat la gran concession de usar la soa.
Na diesina de Km da percórer, duri, no par l'andata, ma par al ritorno, ma nissun de noi se à preocupà! Sen partidi alegri, ridendo e ciacolando, e avon ben presto ragiunto Col di Piana, po' le Fornas co de fronte Mier, a sinistra, e dopo Cesuraza; al bivio par Antole, avon ciapà la gran dissesa su la destra, quela del Duron. Passà i Casoni se era 'pena a metà; la strada tuta curve l'era costegiada da bosch fissi, ma noi se coréa verso la piana del Mas. Avon lassà al ponte "Ti vedo" e al Cordévol a la nostra sinistra e son proseguidi par al Peron, na distesa verdegiante co casete qua e là. Quando che la strada la se a vizˆinà al torente, avon catà a sinistra na rocia, come tante che se vede te la zona, che sporgéa da la tera, e an spiazo 'ndé che avon lassà le biciclete: se dovéa passar al "pont de le corde", cioè na passerela sospesa sora al let, pien de giara e de aqua prepotente e minaciosa, del Cordévol; mi l'ò atraversà co 'n cin de baticor, ma na olta de là avon inbocà na stradela che portéa a S. Gotardo. Su par i coi avon amirà na natura splèndida, anca se le zime de le montagne no le me paréa tant bele, ma selvage. Anca i nomi de ste vete: Peron, Piz de Vedana, Speron i me paréa strani, curiosi: da lori à ciapà nome alcune località là intorno... La cesa de S. Gotardo l'era propio messa in zˆima a la salita, te 'n posto solivo e, te 'n col no tant lontan, ò vist an spetàcol che ò ancora ades te i oci: sto col l'era tut cuèrt de genzianele, esplose, te quel periodo, cussì fisse, che le lo coloréa de 'n blu de Prussia intenso, che no se distinguéa gnanca al vért. Ghe n'avon ciót sù an mazˆet, quele te i bordi, e se sen aviadi verso al laghet de Vedana. Dopo aver caminà par an toc in medo a pra e casete sparse, a la nostra destra, là te 'l col ai pié de la montagna, se distinguéa co ciarezˆa al convent de i frati de Vedana, par la precision la Certosa de Vedana: càndida, co de le costruzˆion piciolete in riga, che le podéa èsser le cele de i certosini, frati de clausura, che tacade a quela pi granda, la me paréa special e caraterìstica, lontana però dal me mondo de toseta.

La cesa de S. Gotardo l'era propio messa in zima a la salita...

L'alegrìa no la lasséa al nostro grupo e avon ciapà na stradela strana, piena de curve, par rivar al laghet (ades Riserva Naturale). Dirìe strana parché l'avea an bosch, da na parte e da l'altra, cussì fis fat de boscat de noselèr, de cassie, de carpen... che l'era inpenetràbile: no te distinguéa gnent in distanza e la tortuosità l'era in part motivada da grosse roce che spuntéa, qua e là, tra le piante. La zˆent la ciama sti spuntói de rocia le "méde" a ricordar quele de fien e de sórc che le à sta forma...
Có sen rivadi a l'aqua, me son vardada intorno: al laghet de Vedana l'era propio grant come an specio, tut intorno la vegetazion l'era fissa e la se rifletéa te l'aqua, dàndoghe an color quasi conpletamente verde, intenso; a sud na costruzion, fursi n'osterìa, co 'n pèr de barchete da pescadori e, a est, 'ndé che se era rivadi noi, tanti grossi sas che spuntéa fora da l'aqua lìnpida e trasparente. Là altri tosat tentéa de far al bagno e na nodada, ma a mi quel'aqua la me paréa pericolosa par tute quele piere! Anca se al sol rendéa al spetacol particolar, al paesagio no l'era tant rident, ma me fradel e Marco ne à scatà an poche de bele fotografìe, che ancora conserve.
Anca al nostro ritorno l'é stat piasévol: avon rivist la Certosa e le strade par Sospirol e par al Mis. Mi ricordée che i me genitori i diséa che có i tenporài i gnéa fora dal Mis e da Vedana, l'era tenpesta sicura co grandi dani par le colture (ghe 'n ricordée anca mi de i tenporài cussì violenti!). Qualchedun à contà che i diséa che a Canal del Mis, ghe n'era do veci che fabrichéa tenpesta. Al dì de ancói la meteorologìa la disarìe ben altro, visto che propio te le vicinanzˆe ghe n'é la confluenza de le Val del Mis e del Cordévol: do torenti particolarmente inpetuosi che passa tra ste strete val!
Qualche altro ridendo l'à dit: "Savéu che che i fa quei del Mis, quando che piove?... ??? ... I lassa piòver!"
An modo filosòfico e inteligente de sfantar i pregiudizi e le ciàcole, che le sa de legenda, ghe zˆonterìe mi, visto che la stessa roba la val dapartut!...
E a furia de ciàcole e de risate sen tornadi al Peron par inforcar la nostra bicicleta.
Alegrìa e ciàcole le se à smorzˆà, però, có ne à cognest afrontar la erta del Duron! No sen mai smontadi e avon pertegà co regolarità, ma quando sen rivadi finalmente in zˆima, avon tirà an sospiro de solievo, anca se la gita l'era stada veramente bela.

[torna sopra]