|
Editoriale
Difìssile, ma necessario...
Conbàtare e oporse al fenòmeno del comercio de i putini, al tràfico de òrgani par trapianti, al turismo del sesso...
 |
| Come se fa a infangare sta santa inocenza! |
"Gnente de novo soto 'l sole" dirà qualchedun. "tute robe che ghe xe senpre stà" sentenziarà qualche altro. "démoghe on tajo!" Ghe zonto mi, "prima che anca el sole, come ga 'pena fato la tera, no 'l se stufa de iluminare sti crìmini che se consuma soto i oci de tuti!"
L'alarme lancià da l'unicef ne insegna che no basta i tri minuti de silenzio, fati par ricordare le vìtime de l'apocalisse del sud-est asiàtico: xe forte la preocupazion par la "tratta" de i òrfani.
Se sa che in sti casi xe senpre i pi pìcoli e pi déboli a pagare el prezo pi alto. Quelo che fa vergogna, sdegno e orore xe pensare che ghe sia òmani che organiza, permete, favorisse el rapimento de i òrfani de l'onda 'sassina.
Vergogna, parché no xe permesso che possa èssarghe persone come noaltri, che ga corajo de zontarghe disgrazie sora altre disgrazie. No xe concepìbile che ghe sia al mondo - epure i ghe xe - orchi che distruge l'infanzia, mostri che de umano i ga solo le senbianze, che cronpa e vende creature par usi e abusi, che gnanca le bestie pràtica tra de lore.
L'onda de la solidarietà che se ga alza dal mare de l'umanità civile, in verità più alta de quela provocà dal maremoto, la ga da riussire a farghe fronte anca a sta cìnica deformazion umana che se ne profita proprio de ste situazion par fare i so loschi afari.
El messagio ricevùo e fato circolare da l'unicef su i 300 putini tra i 3 e i 10 ani, pronti par èssare vendùi come schiavi e par adozion ilegali, no 'l xe solo un alarme. Basta pensare che solo in indonesia i xe 35 mila i putini restà senza genitori, e quindi el ris-cio de contrabando el xe altìssimo.
In parte, sto comercio infame el dipende anca da la nostra indifarenza, dal nostro voltarse da st'altra parte, magari parché ne disturba e ne fa male fare conossenza co sta verità.
No podemo pi far finta de no savere. No basta pi gnanca maravejarse. Xe ani che le organizazion umanitarie e i governi locali i fa savere de putini sconparsi, de tràfico de òrgani par trapianti, de quartieri e cità trsformà in paradisi del sesso. E quanti pìcoli schiavi incontremo ai semàfori de le nostre cità!
Adesso, turbà da quelo che gavemo visto, sentìo e leto su sto ùltimo "diluvio universale", xe ben che sia nata sta gara de solidarietà, sto grande gesto, sta mobilitazion internazionale par frontegiare la catàstrofe, ma l'aiuto pi conpleto par ste popolazion in zenocio sarà quelo de inpedire che òmani senza cuore ghe ne 'profita par sodisfare, in canbio de schei, i caprici e i vizi de ocidentali senza scrùpoli, che
No ghe par vero de poder specularghe sora a la prostituzion minorile.
El tenpo del dolore xe drio scadere par lassarghe el posto al tenpo de la rinàssita: femo calcossa parché, dopo tanta morte e tanta distruzion, sia proprio i putini el sìnbolo de la ricostruzion, parché solo lori i rapresenta el futuro e la speranza del mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Difìssile, ma necessario...
Conbàtare e oporse al fenòmeno del comercio de i putini, al tràfico de òrgani par trapianti, al turismo del sesso...
de Mario Klein
Da Belun
"Colli ameni" e montagne selvage
de Biancamaria De Vecchi
Da Verona
El Bòle
"Diese schei de bòle... col pesseto!"
de Wanda Girardi Castellani
|
