Quatro Ciàcoe
Mensile de cultura e tradission vènete
de Dinerio

Sbiansi de sagessa antica

Mafalda, sfolata spavalda

I menevèi nostrani se voltava tuti a vardarla cò i la vedèa passare...
I menevèi nostrani se voltava tuti a vardarla cò i la vedèa passare...
– Barba, gheto l’estro giusto par finire de contarme la storia de quela Mafalda, fiola de to zerman Remigio, che in tenpo de guera xe sfolà dal Piemonte par rifujarse a casa vostra?
– Ah, benon! A na bela ora nemo a tola oncò. Almanco slóngame la cavessa in man ca me ciapa co ’l tocar via so la stessa drissagna. Fame vegnere inamente gnonde ca gèrimo rivài co ’l discorso ierlaltro quando xe capità quei saltroni de la caldaja che ga fato on desìo de strèpito ca ne xe tocà molarghe de paciolare.
– Ricordo che te m’à dito che so pare, emigrà a Torino ne i ani ’30 in serca de lavoro, el faséa l’operaio a la Fiat de Mirafiori e ela la jutava so mare che gavéa on bancheto de fruti e verdure t’un rion de periferia, spesso bonbardà, parché vissin ghe gera le fonderìe...
– Eco, eco, fato sta che on maledeto giorno, mare e fiola, ciapàe a l’inproviso soto na strejada de bonbe, le s’à salvà par miràcolo, ficàndose t’un rifujo in piasseta del marcà, però la tosa ga passà on spagheto da no èssare pi bona vegnere in sì. E cussì on bel dì, ricordo ca gèrimo da San Martin del ’42, la ne xe capità basso co na montura da zóvane taliana del Litorio, par sparagnare calche scheo de treno. Almanco cussì la n’à cuntà ela. Có la xe rivà, sensa ’ver ’visà gnissun ’vanti partire, me àmia Pina la ghe ga parecià on leto par conto suo te la camareta de le biave. Tel nostro borgo sbetegoloso la notissia de l’arivo se ga spanto t’un sbianso e tuti gera curiosi de cognóssare sta pròfuga foresta. Co ’l passa parola la gera deventà on bocon da alcolina in boca, soratuto par quei pochi zovanoti nostrani che riessìa a farla franca sconti ne i fenili par scapolàrsela da le scoribande de i todeschi che rostelava i ribèi par mandarli a lavorare in Germania. Lori, ca podéa mòvarse solo co ’l scuro e mai in pi de uno, naséa a nosse ’ver modo e maniera de incontrare na creatura sgaja de vedute come ela che vegnéa da na sità granda e sercava svànpolo ne la chiete de i nostri canpi par desmentegarse i perìcoli de la guera, anca a ris-cio de intrajarse tra bruschi, gréntani e sparpanassi. E chi la tegnéa na s-cianta a fren? Me àmia no de sicuro che la ghe faséa sudission. La gera na furia scaenà ’fà na brentana.
Essendo quasi òtima, a ghe piaséa comandarse da par ela e la se sentìa lìbara de nare fora de sera a strucarse e sbasuciarse on colpo co questo, on colpo co quelo, ma sensa rivare al lecheto de farse strénzare i balsi al fianco. Difarente gera la mentalità de le nostre tose, scrite a l’Assion Catolica come fiole de Maria, che naséa fora casa de sera, ma senpre in s-ciapo, solo par nare al Fioreto o a le prèdiche de Quarésema. Defati no le ga mai fato tanta comunela co la torinese, ansi le ghe butava calche ociada de sbiego e anca co on pìssego de astio. Però de bon la gavéa che ghe piaséa tanto darghe na man a quei che batéa el formento có rivava la trebia in corte, farse insegnare da le fémane a inrestare l’ajo, jutarghe a bàtare i fasòi so l’ara co ‘l serciaro, vendemare la ua co ’l sesto e la forfe drio i ravi o descapojare le panoce sentà so la mureta del sélese. Bastava però no darghe na sapa in man, parché la tirava indrìo quele ciape spanìe che faséa gola. Ghe sbiro mi, che i menevèi nostrani se voltava tuti a vardarla có i la vedéa passare, magari tentando de ingrapejarse a la marara. Ciò, la gavéa on museto da penelo da fare invidia a le mèjo tracagnote del Portelo, do ocioni scuri che paréa do perle ostraliane, on personale alto de cavaloto da poder starghe in paro solo co de i salti da simioto, de le ciome petenàe a canoloti che traséa el color de la pégola e on petorale co do suchete latose, ben sodàe sol puntivo, da far girare la testa a mezo mondo. A dìrsela fra mi e ti che altri no senta, però se te ’l sentarse so l’erba, par distrassion o sivetarìa, ghe naséa el cotolame sora el zenocio, la mostrava do lache forcoline che intrameso ghe passava na volpe co na polastra in boca.
Quelo che faséa pi fastidio a noaltri de casa gera el so morbin e quela smania de mòvarse a tuti i costi. Quasi ogni sera, la se godéa el scuramento publico ’ndando de sbrindolon pa ’e stradele del borgo in serca de comarò o de calcoss’altro. Solo có rivava Pipo la coréa in casa, parché no ghe gera gnancora passà el scorlon ciapà a Torin. Calche slenguasson el se gavéa messo a dire de ’verla vista pi volte cubià scontovia da la siesa de sanbugaro drio el fosso del nostro stradon. E posto ca ghe semo, te confido on segreto da confessionale...
– Va pure zo gualivo, barba, ca go fato la naja ne i alpini come ti.
Alora te ga da saére che sta spavaldona co ’l bissinelo in sen a furia de nare indriovanti a pajaro ’fà na ranghina furiosa, na volta no la ga da èssare rivà in sima a bon vento. Donca la xe scapussà e co la xe restà insinta là torno i se lavava la boca disendo che la se la gavéa fata anca co uno de zata vecia ’fà me pare. Che ’l ghe fasesse bela siera i se gavéa inacorto in tanti e fin qua gnente de male, parché coréa vosse, sensa misteri, che da zóvane el fusse stà on ganso da becaro, furo pa la carne fresca. Mi la man sol fogo no la go mai messa. Ma da ste piagolàe a rivare a incolparlo de on sbròdego sensa ’vere prove in man ghe xe de meso na caresà larga senpre. ‘Desso che no ’l ghe xe pi, poro vecio, lassémolo stare, pase a l’ànema soa, tanto le xe robe vece e quel che xe stà xe stà. Pitosto vegnendo al mèrito del discorso, la Mafalda porassa, in cao de graviansa, co ’l parto la ga tribolà le pene de l’inferno, tanto xe vero che la xe morta davanti ai oci de la comare che ghe tirava basso el picenin co’ i feri, se vede che ga fato infession calcossa. Ga ’sistìo la Pina che la ghe ga broà i bandoni de aqua e parecià i panesèi.
– El bocia lo gai salvà?
– Qua te vojo! Ernesto la se lo ga slevà e dotà co ’l nostro cognome propio me àmia, che ti te ciami nona.
– Ma valà! Cussì mi saria fiolo de Ernesto? Almanco che lo sapia na volta par tute.
– Sì, to pare xe sta sfortunà, el ga ciapà el tifo e in poco tenpo el ghe ga lassà la scòrsa có te gavéi gnancora quatro ani e in pochi mesi ghe ga tegnùo drio anca to mare. Me àmia Pina co ti no la xe mai stà massa s-ceta, parché sto pìcolo fin da ’pena nato lo ga considerà fiolo del pecato.
– Grassie, barba, par la to franchessa, anche se te m’à fato vegnere i penoti par la schina.

[torna sopra]

 

Archivio
2014 13 12 11 10 9 8 7 6 5 4 3 2 1  
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro
Editoriale
Leggi l'articolo Parché sti fiòi no i cresse?
Eco on argomento che scota anca se no semo in piena istà: i fiòi no se la sente de nar fora casa, i preferisse restare in fameja. Dopo tuto, no ghe dispiase gnanca ai genitori!
de Mario Klein
 
Sbiansi de sagessa antica
Leggi l'articolo Mafalda, sfolata spavalda
de Dinerio
 
Zente de Padova
Leggi l'articolo Giulia Bigolina
de Arturo Baggio
 
Da la Marca
Leggi l'articolo Memorie de piera
de Emanuele Bellò
 
Da Maran Lagunare (UD)
Leggi l'articolo Alessia
de Bruno Rossetto Doria
 
Da San Bonifacio (VR)
Leggi l'articolo Otobre: vin e cantina da sera a matina
de Enzo Coltro