Da la Bassa Veronese

L'età no la conta...

Lina Mantovani a vint.ani.

L'ano novo 2008 par casa Bottura a Ramedello de Cerea l'è scominzià co on gran boto: el du de genar mama Lina l'à festegià in ponpa magna ben CENTO ani de vita. La fiola Gabriela che ghe vive insieme l'era tuta emozionà a contarlo: "L'era quìndese giorni che no dorméa pi par l'emozion de védarla rivare a sta età qua."
è stà fata na festa granda. Par prima roba na Messa in casa, celebrà da don Benedeto, par ringraziar el Signor de tuto el ben che 'l ga volù, presenti sìndaco, autorità, fiói, parenti, amici e on fraco de gente 'torno via. Tuti i jera ingossè, co i oci lustri. Po' i fiói, felici da mati de poder ancora cocolar, basar, abrazzar so mama, anca se, a dir la verità, on poco la so mente la s'à inpigrìa.
Ma qual'elo stà el percorso de on sècolo de vita par la siora Lina? Intanto l'a vissù senpre nel stesso posto 'ndó che l'à messo raise. La s'à spostà solo in te on ragio de diese chilometri.
Lina Mantovani Bottura l'è nata a Michellorie de Albaredo el 2 genaro 1908, però, l'era ancora pìcola quando la so fameja la s'à trasferìa a Angiari, in località Pila, zona de risare, longo el Bussè. El papà el faséa el molinaro. Prima l'à proà na vita de stenti: parché, durante la Grande Guera, so papà l'era stà al fronte e l'è tornà pitosto malmesso. Ela la cognéa jutarghe a so fradèi drio al molin. Pi tardi l'è riussìa a 'ndar a scola de pitura da le Canossiane.

Nona Lina con i proneodi (da sin.) Sofia, Anna e Filippo Maestrello.

Comunque la servéa volentieri i clienti al molin e l'è stà lì che, tra farine bianche e giale, l'à conossù Geremia Bottura che 'l ghe 'ndava par masenar el gran. Lu el s'à inamorà subito de i oci dolci e malinconici de la Lina. In du e du quatro el se l'à sposà e el l'à portà a Villa Bottura.
Ela la diséa senpre che l'avéa sposà on omo, ma ne la nova casa la ghe n'à catà ben sete: quatro fradèi (uno da sposare), on butin del cugnà Ognibene e nono Gaetano. De done inveze i era tre. Quante corse par rivare al gran seciaro del cusinon de la vila! Bisognava caminar avanti e indrìo.
Nel fratenpo è nato i tre so fiói, che i è 'ncora vivi; la ga neodi e proneodi che ghe va a far visita de spesso ne la casa de via Ramedello, 5, indó che la stà dal 1951.
Purtropo la so vita matrimoniale la s'à interota in modo brusco co la morte del marì, nel 1967.
El segreto de la so longa vita? El laoro, on bon apetito ben controlà e la curiosità de védar senpre robe nove e inpararle, come quando, a setant'ani, l'è stà a Lourdes e a Fatima: du viaji 'ndó che la s'à godùa assè.

La centenaria Lina Mantovani Bottura co i fiói (da sin.) Teresa, Carlo Alberto e Gabriella.

La festa, logicamente, l'è finìa co on gran brindisi canpagnolo e on buffet. A la fine so fiola Gabriela l'à dito la frase che l'era solita dire so mama:
"Speremo che i resta contenti, cussì i tornarà nantra olta a catarne!"

[torna sopra]