Cultura vèneta

A Licia Colò el Premio “Basilica Palladiana”
’Nte la soasa de Vila Sesso-Schiavo, a Sandrigo, xe stà consegnà el riconossimento pi spetà da i operatori culturali vèneti

La splèndida condutrice televisiva Licia Colò.

El Premio “Basilica Palladiana” edission 2010 xe stà assegnà a Licia Colò, la famosa condutrice de “Alle falde del Kilimangiaro”, la fortunà trasmission de RaiTre. El riconossimento xe stà consegnà rente a la meravijosa soasa de la Vila Sesso-Schiavo, a Sandrigo, marti 21 setenbre passà, ’ntel corso de na manifestassion rivà a la so 45ª edission e organisà da la Pro Loco de Sandrigo, in colaborassion co ’l Comitato regionale de le Pro Loco vènete.
Se trata de un premio dà ogni ano a un personajo, possibilmente vèneto, che ’l se xe fato védare ’ntel panorama de la cultura de la nostra region. Prima de ela ’nte i ani scorsi ga ciapà el riconossimento poeti come Fernando Bandini, Diego Valeri e Andrea Zanzotto, scritori come Neri Pozza, Luigi Meneghello e Mario Rigoni Stern, atori quali Marco Paolini, Ottavia Piccolo e Giulietta Masina, adiritura istituti come queo de le Vile Vènete e, l’ano scorso, l’avocato Michele Benetazzo che ’ntel 1966 ga fondà el premio e che ’l gera sconparso solo pochi mesi prima.
Tante le autorità presenti a la cerimonia, sìndaci e aministradori smissiài in meso a un bon pùblico. Come che vole la tradission, el premio xe stà messo ’nte le man de la splèndida condutrice Rai dal Presidente pro ténpore de la Pro Loco de Sandrigo, Fausto Fabbris.

El Presidente de la Pro Loco de Sandrigo, Fausto Fabbris.

Licia Colò, nata a Verona, xe fiola de ’l famoso canpion de i sìi Zeno Colò. La ga scomissià la so cariera in Tv ’ntel 1982, presentando o ideando nossoquanti programi sia par la Rai che par le reti Mediaset, tra i quali le popolari trasmission “Bim Bum Bam”, “Festivalbar” e “Buona Domenica”, programi de punta ’ntel palinsesto de le television private, ma anca “L’arca di Noè”, “Paese che vai” e “La compagnia dei viaggiatori”, che za faseva védare la so passion par i viaji dimostrà pi tardi. ’Ntel 1989 Licia ga ciapà na pìcola parte ’ntel film horror “La casa delle anime erranti” e dal 1996 la laora par la Rai, dove che la ga condoto le famose trasmission documentarìstiche “Geo & Geo”, “King Kong” e “Il pianeta delle meraviglie”, tute de RaiTre. Ma la notorietà de l’artista veronese xe profondamente ligà a “Alle falde del Kilimangiaro”, trasmission che xe za rivà a ùndese edission e che continua a ’vere un gran sucesso, deventà romai na tradission de i dopomezodì de la doménega de RaiTre. Da la popolare trasmission xe nati do libri de viaji, scriti da l’istessa Licia (“Sognando il Kilimangiaro… 15 itinerari attorno al mondo” del 2001 e “Il giro del mondo in 80 paesi” del 2004, tuti do èditi da la ERI), che ga fato esperiense de viajo praticamente in tuti e sinque i continenti.

[torna sopra]