Editoriale

Onore a l’Italia col canto
Na bona ocasion par rèndarghe onore a l’Italia in festa la xe saltà fora da la 22ª Rassegna Corale “Città di Padova” organizà dal Coro “La Valle” in colaborazion con l’AIDO

Piccoli Cantori Patavini

Na volta tanto se fermemo a parlare de on fato positivo soto ogni punto de vista, che par fortuna no xe l’unico, ma che ne piase che se sapia in giro, parché senò la balanza la pende senpre da na parte, da quela de le beghe politiche, de i scandali de ogni gènare, de le libertà in perìcolo e de tute le malefate de na smanegà de coroti e de violenti.
Messa da parte sta bruta piaga che inquina l’aria del nostro respiro, eco la serata de Cori de sabo 7 Majo, a l’Auditorium “Cesare Pollini”; protagonisti: i Piccoli Cantori Patavini, direti dal M° Nicola Rampazzo e conpagnà al piano dal M° Loris Sovernigo; el Coro “La Valle” direto dal M° Luciano Pengo; el Coro “D.G. Kiriac” de Piteşti (Romania), direto dal M° George Paraschievscu.
La manifestazion, presentà da Emanuela Stefani, dopo l’entusiasmante esibizion de i Piccoli Cantori Patavini, con un repertorio polifonico de canti e brani originali e internazionali, con l’intervento del Coro “La Valle” la ga subito ciapà na piega nostrana, quasi par mostrare che l’evento de i 150 ani de l’Unità d’Italia no ’l xe solo na data sol calendario o on conceto geografico, ma sentimento, a colori o in bianco e nero, che nel canto el trova l’espression più genuìna e sugestiva.

Coro Kiriac

Eco alora Benia Calastoria de Bepi De Marzi, dove Beniamino, reduce de la Prima Guera Mondiale, costreto a emigrare ne le miniere del Belgio, al so ritorno a casa no ’l xe pi bon de anbientarse, el cata tuto canbià e el se dispera. Ancora on canto che mostra come ne l’Italia de oncò ghe xe zone dove resiste nantra parlata, come ne fa sentire la canzon Rindola, on canto in lingua cinbra (senpre de B. De Marzi). E come no emozionarse scoltando L’ultima notte (de Geminiani-De Marzi), che rièvoca la ritirata de i Alpini da la Russia, ne l’inverno de ’42, dopo el falimento de l’ofensiva verso Mosca.
Ma passemo a gustare, con tuto el pùblico in piè, el nostro “Fratelli d’Italia”, intonà dal coro vegnù da la Romania, che no se contenta de eseguire l’Inno Nazionale, ma el continua con Va’, pensiero, dal Nabucco de Verdi (1842), uno de i cori più noti de la storia de l’òpera, e anca uno de i sìnboli musicali pi inportanti del nostro Risorgimento. El pùblico se scalda oncora de pi quando el Coro “D.G. Kiriac” el taca a cantare la marcia trionfale de l’Aida, l’opera che ga consacrà par senpre la gloria de Giuseppe Verdi.
Ai organizatori (Simonetto, Sabbadin, Paesotto…) el mèrito de aver savùo trasformare on avenimento musicale in on evento culturale dedicà, oltre che al canto e a la vita, a l’Italia e al so 150° conpleano, contribuendo al recùparo de quela unità de ideali e de valori, che pare persa ne le nebie de la storia.

Coro La Valle

[torna sopra]