|
Da Verona
A proposito de medisine
 | | Guai a restar sensa sta medisina in casa. (foto Gianmauro Mauri) |
Son davanti al bancon de la farmacìa quando sento che i me ciama. L’è la me amiga drio spetar el so turno, con i pié a caval de la riga de demarcassion a garansìa de la ‘privacy’.
Me vien i sgrisoloni a pensar che ’desso la me sequestra par un par de ore, quando mi gavaréa da tacar sù el ragù de musso, che ancò go i me sposeti a disnar.
“Spèteme fora che nemo a berne un cafè e ne agiornemo” la me siga. E agiornarse par ela vol dir ciaciarar a buso e par mi darghe abado sensa pressia, strolegàndome par inventar qualcossa de asvelto par consar la pastassuta.
“Pènsete che vedo piassè el farmacista de me marì” la taca ela. “Ghe n’ò un gòsso de medisine! Fin a qualche mese fà l’era el me omo che naséa a torle, ma el me n’à conbinà una de cosita grosse che m’è tocà sospèndarghe el servissio e rangiarme da par mi anca qua.”
Gìrela e méssiela, la tira senpre a man quel ‘poro’ pensionato che la se scaprissia a far girar come un móscolo e istesso no ghè perìcolo che ’l sia de mal estro, a difarensa de ela che el par che i gabia senpre magnà la so parte.
Mi taso, rassegnà a ’scoltar anca sta storia e ghe digo adìo a i bìgoli col musso.
“Donca” la scominsia, “te ghè da saver che sto genar me vien ’dosso na bruta influensa intestinale con el stómego che no ’l voléa savérghene de tegner zo gnente, gnanca un sgorlon de tè, e in più quel che no gomitàa, el vegnéa fora da n’altra parte. No savendo più a che aqua trarme, ciamo el dotor che, dopo na bela vìsita telefònica e dopo le me racomandassioni de no ordinarme punture, el me prepara la riceta.”
“Parché gnente punture che invesse me mama la dise che le fa cosita bon, dato che ‘le entra in cìrcolo sùbito’?” voi saver mi.
“Parché, bela, ghe n’ò avùo assè de quele 30 punture de vitamine che le becàa come el pearonsin, drio fàrmele me marì l’à macià tuta la trapunta de rosso, l’à sassinà la vernisa del comò inbonbegando el coton de alcol e el ghe metéa talmente tanta forsa e concentrassion ne l’infrinciarme che mi sentéa l’ucia trapanarme el dedrìo e lu el paréa a le olinpìadi de tiro a segno, dato che ogni ’olta el centràa el buso del giorno prima, che m’è parfin saltà fora un bugnon che al pronto socorso prima de tajàrmelo i m’à poncià par la 31ª ’olta par farme l’antitetànica.”
Drio ’scoltarla me vien el dubio che la patissa de manìe de persecussion: possìbile che le ghe toca tute a ela?
“Alora” la séita, “el dotor, gnanca a farlo aposta, el me ordina un par de fiale de Plasil ‘per via muscolare o endovenosa’ parché, secondo lu, le fa efeto de paca e sensa rebaltar piassè el stómego, za straolto par conto suo.”
“E t’ale fato bon?” salto fora mi.
“Anca massa. Donca, a le 10 el me omo el me fa la prima puntura, mi caino dal mal, lu el me dise che sta medisina l’è miracolosa par el me disturbo, no la ga efeti colaterali, semai la insuca un fiantin, e el va a far un gireto in moto. Mi me cucio soto le coerte e me inpisoco. Quando me desmessio vardo che ora l’è e me incorzo che ò dormìo par diese ore continuate – mi che a la sera no me indormenso gnanca con la camamila e la pìrola – ma soratuto me sento rebutà.”
“Ma alora parché ghe l’eto con to marì che con na puntureta el t’à rimesso in sèsto?” la interonpo mi.
“Primo” la me risponde ela “parché el insistéa par farme quele altre quatro fiale, a distansa de 6 ore una da l’altra, anca se mi staséa ben; secondo: no se va mia a remengar in moto, lassando na dona ne le me condissioni, bandonà in càmara da par ela, sola tuto quel tenpo col ris-cio de catarme morta stenca e za co i baeti; terso: serte robe no se ghe le dise gnan par scherso a na persona ’pena guarìa da na rebaltada conpagna…”
La tase e la arfia. La se sòssola a tegnerme su le spine. Alora mi, che moro da la curiosità, ghe domando:
“Marisi, ’sa t’alo dito?”
“Guai a restar sensa sta medisina in casa, parché, anca sensa gómito, in caso de emergensa, la va benon par fermar tuto el resto!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Dove catare el corajo?
In sto tenpo, almanco 7 italiani su 10 se fa sta domanda e nissun xe bon de darse na risposta. Se parla, se stròlega, se promete, ma intanto ghe xe chi no ghe la fa a spetare e el decide de farla finìa
de Mario Klein
Lingua, dialeto e vita
Na vera esperiensa de vita
“Il dialetto trevigiano che si parlava sotto i banchi di scuola…” Storie de stranieri ormai integrài da noaltri e del so raporto co la lingua veneta
de Daniele Marcuglia
Ciàcole visentine in lingua foresta
“Un baseto da Sandrigo”
Leonardo Carlotto da Sandrigo ga rancurà in pareci ani un stramaro de cartoline che rafigura el so paese
de Giordano Dellai
Da Verona
A proposito de medisine
de Giacinta Dall’Ora
|
