Editoriale

Scrite su i muri de la cesa…
El fenomeno del vandalismo, presente soratuto ne i grossi centri e ne le sità, ’desso el colpisse anca i nostri pìcoli paesi, provocando maraveja, rabia, indignazion par i dani provocà dal bisogno insulso de “illegalità” de na smanegà de teste mate.

Eco calcheduna de le scrite in question… (diennefoto)

El xe quelo che ghe xe capità a i abitanti de San Pietro di Morubio, paese de la Bassa Veronese, lungo la Transpolesana che da Villamarzana (Rovigo) porta a Legnago, Verona. Ne la note tra el 20 e el 21 de Majo, dopo che el forte vento de la giornata forse el gavéa spostà da ste parte el virus infetivo de la stupidità assoluta, malatìa mentale che colpisse soratuto zóvani senza voja de far ben, tosi che scanbia la note par el giorno e che magari ga la fortuna de no avere né mama né popà che se preòcupa de vardare, có xe note, se ’l toso l’è in leto opure no, quando che i bòti dal canpanile ga dito che xe note fonda, i vanpiri del colore xe entrà in azion.
Ècoli, capucio in testa, botilia de lìquido anti-panico (na missèla che inturbia la mente) so la man sinistra e bonboleta spray so la destra… ècoli mòvarse in grupo e nare in zerca de on muro dove podere esprìmare se stessi.
A dire el vèro, no i lo sa gnanca lori quelo che i ga da scrìvare… Xe scuro, tanto scuro parfin te la so testa, ma no inporta: ghe xe senpre l’èbete de turno che ghe sugerisse e alora eco che l’ispirazion se fa ’vanti, el bao ghe fa sèliare el muro pi inportante e vien a gala le bestialità da lassare “a perenne memoria”.
Sì, i ga el cònpito de dimostrare che “la mama de i cretini la xe senpre incinta” e se lori i xe cussì, xe parché i xe vegnù fora proprio da chel buso, poarini!
Xe stà cussì che chela matina el pàroco don Michele Fiore el se ga catà davanti le scrite che ga lordà la faciata de la cesa parochiale da poco restaurà: “? CRISTO + MARIA” (de sicuro non la Beata Vergine Maria!); la stessa roba so i muri de on bar, so le vetrine de on Centro Benessere, su i muri de la scola: “? SCUOLA + DROGA”, de la palestra, de le case… E par farse capire mèjo eco anca disegnà el sìnbolo de chela virilità maschile che, co tuta probabilità, a lori la ghe manca, parché la droga, oltre a colpire el zarvèlo, la ga fato dani anca pi in basso…
Pori tosi: dopo la rabia par quelo che i ga fato, i me fa anca pecà parché ghe tocarà pagare caro par ste bravate insulse che mostra la bruta strada ch’i ga ciapà, quela de le “tendenze criminali”, come spiega el criminologo Gerge Kelling: dopo le scrite selvage su i muri rivarà de l’altro.
El sindaco de San Pietro, Giorgio Malaspina, che ga provedù prontamente a far scancelare “le scritte oscene e offensive” parché a l’inciviltà bisogna darghe poca vita, el se augura che i responsàbili i se renda conto “della gravità del gesto” e i se faza avanti, assuméndose le propie responsabilità.
Se l’invito del sindaco el riva prima del spacciatore de la droga, e se i lo scolta, xe mèjo par lori, parché el magistrato “potrà disporre l’arresto e la carcerazione preventiva per chi deturpa i beni culturali”.
Come dire: la civiltà ga ’ncora tanta strada da fare e “i schincapene xe stà avertìi!”

[torna sopra]