Da la Lessinia Centrale (VR)

Òbito del fero da segar

Eco ’n omo cimbro, da la contrà de l'Ongar, che ’l sega ’l fen, co ’l coaro, la piéra e tanta forsa. (la foto, destinata ad un calendario, riporta nell’angolo un haiku di L. Ederle)

A pian, a pian, con la motosega, se proàa a “mére”, a tajar ’l formento, e no’ l'éra poco!

L’éra l’ano ’57 del secolo ’pena passà. A coel tenpo là, se segàa ’l fen col fero da segar. ’N bon segato ’l ghéa da èssare: forte, ’ér ’nparà ben l’arte de darghe la piéra a la lama, parché la lama la possa tajar ben, saver tegner l’asilón ’n giusta posission, che la lama la sia a fil de la tera, segar basso, par no’ pèrdere meso schèo de fen, visto che da le nostre parte ’l fen, l’éra senpre magro, poco e de ganba fina. Ci ghéa tanti prè i naséa ’n serca de i segati, e su spese sóra spese. Ma, na festa, a i primi de majo, al Sèro (Cerro) è capità de i marcanti e coesti i vendéa màchine che taja ’l fen. Con ’n bel passaparola, s’à binà ’nte ’n prà lì atorno al paese, coasi tuti i contadini, sia quei del Sèro che quei de i paesi arente. E, là ’nte ’sto prà i faséa védare come se fa a segar ’l fen con na motofalciatrice. Ma da le nostre parte tuti i le ciamàa motosega. ’Sta machineta no’ l’éra conossùa, la ghe sarà stà da calche parte, o l’éra stà ’nventà da poco. Cossì, ci vendéa ’ste machinete che segàa ’l fen, i à pensà ben da farle conóssare, de come le laora.
Mi, de ’sta facenda, ghe n’éa, a so tenpo, sentù parlar dal Marce e da diversi altri òmeni. Ma, par èssare sicuro, ò tacà a sercar se cato calche omo, che l’éra presente a ’sta manifestassion! E l’omo l’ò catà, ’n sèrto Tranquillo Brunelli, dal Sèro, che ’l me conferma coel che è sucesso tanti ani fà.
Ghéra ’n par de òmeni, che i faséa védare come sega l’erba ’sta motosega, e che la fa ’l laoro de tri òmeni e ogni tanto’l segàa ’n’antana de fen. Dopo i ghe spiegàa che no’ l’è gnente fadiga e che ’nte na giornata se sega na schéna de prè e che l’erba l’è za distesa e che no’ serve che uno con la forca ’l vèrsa le antane. ’N omo dal Sèro, ’l s’éa tolto sù ’l fero da segar, e lu ’l ga fato védare che ’l fero ’l sega pi basso e che resta ’n schèo de erba e che, con coel schèo lì, ghe fen fóra la giornata: giornata persa segando con la motosega! E tirando fóra da la scarsela ’n metro da marangon, ’l ga fato védare a tuti, coanto fen restàa sul prà, de media l’éra ’n schèo. Alora coel che ’l faséa la dimostrassion, ’l ga risposto a tuti i òmeni che ghéra lì:
“Sì, l’è vera che resta ’n schèo de erba sul prà, ma coel schèo de fen lì, ’l fa sì, che ’l prà ’l se ’ngrassa e vedarì che fra ’n ano o al massimo du, chì, ’l fen ’l ven pi alto de na spana.”
Coalchedun ga credesto, altri i à scurlà la testa, altri ancora i à dito:
“I è gente che te ciava!” e a dimostrassion finìa è nato discussioni su discussioni. I ghe ne parlàa, soto i pòrteghi, su le scaessagne, fóra da messa. I butèi i éra contenti e i faséa tuto ’l possìbile par far convinti i so genitori par conprar la motosega.
El tenpo del fen l’éra a le porte, ghè stà de i òmeni che i à volù nar a le basse a védare ste motoseghe al laoro e sentir ’sa dise i contadini che ghe l’éa za. Le risposte i è stè bone, ansi buonissime, ma la motosega la costàa diversi schèi. Ghè stà de le fameje che le s’à unito ’n dó o anca ’n tre, par conprar na motosega ’nsieme. Par coando ’l fen l’éra mauro, ghéra ’n par de motoseghe par paese. Le segàa da la matina bonora a la sera tardi. I prè bei da segar i è nè a finir soto la motosega e del schèo de erba che restàa sul prà, nessun de parlàa.
Par ’l tenpo del reguso, i segàa anca le rìe, uno con na sóga, de sóra ’l tegnéa tirà sù a misura giusta, parché che la motosega no’ nésse a finir nel vajo, e con forsa e ’n bon ocio, i le faséa nar drita, senpre su la stessa linea. E ghéra anca ci à proà a mére ’l formento, con acorgimenti vari. Nel giro de du, tri ani, le motoseghe i è deventè de i picoli tratoreti, con de le aplicassioni speciali. I menàa a casa: strame, legna, panoce, e tuto coel che prima i faséa con la sgrója tirà da i bo. Ma senpre pìcoli carghi a la òlta.
Da le nostre parte, ghéra dó marche de mototosega: la B.C.S. e la Bertolini. Le discussioni le ghéra dapartuto: ghéra ci diséa che l’è mèjo una e altri i diséa che l’è mèjo l’altra. Ma a la fine, ’l risultato l’è stà chel che ’l fero da segar i le doparàa solo par segar adrìo a le piante o ne i posti proprio ’n rìa.
I segati i à canbià mester, i è nè coasi tuti a far i manoài o i muradori. Pian pian ghè stà ci sa specializà a far laori inportanti e, lori, a tribular i éra abituè. Na òlta ò sentìo ’n dotor che ’l diséa che: “Il falciare il fieno come si faceva una volta, è un mestiere che mette sotto sforzo tutti i muscoli del corpo del falciatore, portando a l’uomo delle positività e una grande stanchezza.” Mi credo, che coel dotor là, l’àa dito la verità. Mi, o tacà a segar col fero che ghéa óndese ani, ma ghè stà de i buteleti che i à tacà anca a diese o a nove ani. Segar fen col fero da segar, l’è dura assè. I primi dì, a la sera no’ s’éra bon de dormir, da tanto straco che me sentéa. Dopo pian pian se ghe faséa l’abitudine. No’ segàa da la matina a la sera, ma, a coel tenpo là, segàa con l’asilon curto, i segàa anca i buteleti. Oramai, par fortuna, ’l segar ’l fen a mane, l’è solo ’n ricordo.

[torna sopra]