Zente de Padova

Dolores Grigolon

La madre, opera de Dolores Grigolon.

Dolores Grigolon, Ragazza veneta.

Tenpo fà, a gera primavera, so’ passà pa na stradèa de periferia, qua a Padova, e l’ocio me se ga fermà sul nome de sta via. Su una de chele targhete pìcole e strete gera scrito Dolores Grigolon. Nome tipicamente veneto magari anca padovan. Chi gèrea sta fémena? La domanda, de manzoniana memoria, me xe vegnù spontanea. Gèrea na letarata, na eroina del Risorgimento, na pitrice? Dove la gera nata?
Sì, che la jera padovana. Dolores Grigolon gera nata a Padova el 24 majo del 1905. Pitrice. La so biografia − ma quanta fadiga a ricostruirla − ne dize che la xe stà una de le più inportanti personalità artistiche padovane de sto secolo. Da un punto de vista umano, la xe stà volontaria crocerossina ne la seconda guera mondiale.
La xe stà alieva de Alessandro Milanesi a l’Accademia delle Belle Arti de Venezia, la xe stà insegnante de disegno e de Storia de l’Arte al Liceo Scientifico de Este, la xe stà presidente de la “Famiglia Artistica Padovana”.
Durante la so atività de pitrice la xe riussìa a creare un linguagio artistico del tuto personale caraterizà da na penelada densa e vibrante, da i colori caldi e luminosi.La magior parte de i so sogeti, de pitura, de disegno, de aquarelo, xe stà la figura, el ritrato, la natura morta. Dolores Grigolon ga ’vudo giustamente tanti riconossimenti come artista, ma el so prestigio, la so notorietà ne l’anbiente culturale padovan xe ’ndà ben oltre i meriti che ghe xe stà atribuìi. Qua a Padova el 6 majo 1987 la xe morta tra el rinpianto de i artisti sitadini.
Mi so’ convinto che ancora uncò ghe xe persone de cultura qua in sità che conosse el nome de sta valente pitrice, anca se, a noaltri sènplici sitadini de Padova, sto nome no xe altro che na nostra strada de sità.

[torna sopra]