Quatro Ciàcoe
Mensile de cultura e tradission vènete
de Vittorio Ingegneri Dinerio

Le storie de Dinerio

Sbanpà da soto la grela

Gnonde ca so’ stà batisà mi, sora l’altare grando, ghe jera piturà la fegura del santo co’ la grela in man.<br />
Gnonde ca so’ stà batisà mi, sora l’altare grando, ghe jera piturà la fegura del santo co’ la grela in man.
− Pecà che stanote cossì inugolìa, San Lorenzo no ne gai mostrà la so piova de stele. Eh sì, Odilia, se ghemo perso un bel spetàcolo oferto a sbafo tuti i ani dal nostro universo, quasi senpre largo de mànega. Siché stavolta no se ga podù védare gnanche un agio de cuco scarabociare de fogo el sielo, cossì pionbà de scuro come che ’l xe anche stamatina. Cossa vuto, a la nostra età de none che ga visto le morajete scanpare da la cardensa co’ le làgreme a i oci par no ’ver catà gnanche spolentaure da rosegare, se incontentemo anche de sti sbànpoli da pitochi, no xe vero?
− Propio dabon! M’à despiasso tanto anche mi, seto Nastasia. “Ogni spasso l’è belo se l’è ben coloradelo” . Te sè quanto che vago mata pa’ i foghi de feragosto che ogni ano ’ndemo a smirarse in Pra de la Vale a sbabio in su. Mi e ti semo senpre catà intese de nare a sfondrarse in meso a chela sluamarà de alochi, te sè parcossa? Parché “Ocio che no smira no sospira”. Ara qua che ménola, smirà stamatina sul bancheto de Neno pessaro. Sicome le m’à parso sardele da scaja co’ l’ocio gnancora macadelo e bastansa a bon marcà, par no sospirarghe sora pi de tanto, m’ò cronpà sto pasto che farò stasera su le bronse. Vorà dire che a casa m’incontentarò de inspritarme co’ calche sbanpà d’ontisso che s’inpissa da soto la grela de San Lorenzo. Scùsame s’a te lasso in pressia, ma me toca scapinare de ficheton pa rivare inansi le scole ’vanti ch’i mola me neodeta Matilde, sinò se la perdo de vista có rivo casa ciapo stramusoni da me nora. S’a te savissi a sta bardassa la ghe monta fàssile e in prestessa! Alora ocore che no ghe sporza el galon, sinò par farghe desfantare le so inbilade a chela rustegosa, me ghe vorìa el batauro che no go mai ’bù el corajo de ciapare in man, siben che calche volta, có la me perde i rispeti, la meritarìa un stainsù. ’Desso bisogna propio che slonga via el passo, come un siton, ciao, ciao.
− Ben, barba, se go da èssere sincero la note de San Lorenzo vardo in alto volentiera anche mi, soratuto se xe na serata lìnpida. Però no go capìo el paragon de le stele cadenti co’ le sbanpà soto la grela de San Lorenzo. Che fantasia gale ste veciote?
− Eh no, la sioreta che ga cronpà le sardele da rostire su la rola no la ga pissà fora dal bocale! Sacranon, fiosso, vuto no saére che sto santo xe fenìo brustolà su le bronse cofà le brasole de mas-cio cusinà a i feri? La conosse tuti la so storia. Te dovarissi saére anca che sto martire xe el patrono de on futìo de paesi e paeseti sparpajà in giro par l’Italia, parfin de dó grosse sità come Perugia e Grosseto. La so festa casca giusto el 10 de agosto e s’a no fusse pa’ e pàciole de la possìbile goduria visiva de le stele ca se sposta da on canton a naltro, lassando na strissà foghenta, sta ricorensa scanparìa soto ganba. ’Rente la metà de sto mese la zente vacansiera xe tuta in spalpagno ca no vede l’ora de ’ndare in ferie. Gnonde ca so’ stà batisà mi, la cesa jera stà consacrà soto la protession de San Lorenso, prova ghe ne sia che tel cupolon sentrale del presbiterio, sora l’altare grando, ghe jera piturà la fegura del santo co’ la grela in man. Me ricordo puìto che la so storia in paese girava anca pa’ i filò, da na corte a l’altra, cuntà da le none e pi de calcheduna de bàtola franca ghe zontava la so pesseta. Robe ca podéa capitare sensa tanta maraveja in chei ani là, quando la fantasia jera ciapà a brassocolo da la devossion popolare. Xe scrito ne i antichi registri canonici che fra Lorenzo jera on diacono de origine spagnola, rivà a Roma ne la prima metà del 200 co’ l’incarico de custodire i tesori de la cesa a i tenpi de Valeriano. Sto càncaro lo ga fato brustolare su la grela parché no ’l ga volesto molarghe gnanche on sesin a l’inperatore de i schei che ’l gavéa ’bù in consegna. Tel posto gnonde ca xe stà rancurà le so sènare xe stà tirà sù la Basilica de San Lorenzo fora da le mure, una de le pi bele cese de Roma. De storie ca fa bona scola de vite martirizàe in epoca romana le sacre scriture ghe ne cunta on futìo a partire da San Stefano che ’l xe stà el primo martire e se trata quasi senpre de relijosi tirà zo da le strasse par no ’ver rinunsià a le so testimonianse de fede crestiana. Da quel ca ricordo ca vegnéa riportà da i torototela ne i filò pare che sto santo gai ’bù da la sua dó rason del so martirio: la fede e i schei che ’l custodìa, ca no xe fàssile tegnere strucà insieme senza barufare, ghe zontava i sbatoluni. Basta védare cossa ca sucede anca ’desso ne le fameje che ga del suo. Dopo ’ver sepelìo el pare paron, caìa e peocin “tacà al franco come la gramegna nei spagnari”, i fiòi scomissia questionare de bruto pa ’e spartission; ciò a ognun ghe fa gola la parte mèjo. Infati non a caso se dise “fradèi e cortèi”, parché l’egoismo uman no cognosse ecession, se non quela de i santi. Donca, tornando al santo in parola, xe stà fato crédare, e pol darse ca sia propio vero, che fin ch’i lo rostìa su la grela, a on serto punto, ormai pi de là che de qua, l’omo gai dimandà de èssare girà da st’altra parte, par farse cusinare mèjo. Robe da santi! San Lorenso vien tirà in balo, giusto par la soportassion del dolore e de le pene, tanto xe vero che le fémane pajolane ca scainava da le dòge da parto, le vegnéa incorajà da le mamane, invitàndole a patire tegnendo duro come ga fato el poro Lorenso che ’l se ga lassà copare pitosto de vèrzarghe el forsiere a l’inperatore. Ma i schei el li ga tegnùi striti fin che ’l ga podù, non serto par cunto suo, ma par ’sìstare i malà e darghe na man a i bisognosi. Questa xe stà la rason de la so santità. Tanto xe vero che ne l’afresco de la me cesa l’aparìa sentà ’torno on s-ciapo de tribolài.
− Barba, questa come senpre xe na lession de vita.

[torna sopra]

 

Archivio
2020 19 18 17 16 15 14 13 12 11 10 9 8 7 6 5 4 3 2 1  
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro
Editoriale
Leggi l'articolo Par chi va e par chi resta… che l’istà la sia na festa!
Oncò se vive de parole, de auguri, de promesse e de prevision pi che de fati concreti. E ’lora, par no ciaparse fora, disemo la nostra so sta calda stajon estiva invià partire…
de Mario Sileno Klein
 
Le storie de Dinerio
Leggi l'articolo Sbanpà da soto la grela
de Vittorio Ingegneri Dinerio
 
“La Sguaratà” - Ciàcole adriote
Leggi l'articolo Dó rode e tanto verde
de Romano Beltramini
 
Da Thiene (VI)
Leggi l'articolo Ricordando Bepin Daecarbonare
de Giuseppe Segalla
 
Da Verona
Leggi l'articolo Le giassare
de Mirco Castellani
 
Da la Bassa Veronese
Leggi l'articolo Francesco Favalli
de Lucia Beltrame Menini