Da Thiene (VI)

Ricordando Bepin Daecarbonare

Quadro fato da Bepin co i colori de i fiori.

Cara Quatro Ciàcoe, lo sò che te ghè rece eletròniche e vista ecumenica, ma se dal caso te fussi stà in vacansa, son chi a informarte de na roba che no se pòe far passare soto silensio.
E ’lora te digo che i poeti del “Graspo” de Thiene se ga sentìo in òbligo de ricordare co na serata tuta speciale el "rajoto" Bepin Daecarbonare che un ano fà l'è ’ndà via da sto mondo e che par tanti ani el te ga fato regalo de le so conposission. Bepin par noialtri el resta senpre vivo e ne par belo farlo ancora comodare chì so la so pàgina de Quatro Ciàcoe.
Omo concreto e positivo, Bepin l'è stà uno de i pilastri del "Graspo", insieme co i fondatori del Circolo: l'indimenticabile Mons. Giovanni Rossin, un pósso de cultura, e ’l Prof. Giovanni Azzolin, storico de valore, menbro de l'Academia Olìnpica de Vicensa e nostro atuale Presidente Onorario.
Segretario da senpre, Bepin el condivideva col grupo na forte passion pa ’l dialeto, inteso come l'espression e la sìntesi de la cultura popolare, la realtà viva che tende a diventar virtuale se te la vesti in italian. L'oseleto el zola, no ’l pole star fermo; l'uccellino invesse ’l diventa na figura morta, stanpà rento so ’l libro, come che ben rapresentava Meneghello el dramàtico passagio de i pìcoli dialetòfoni da la parlata materna a quela de la scola.
De Bepin ne resta el senso de cordialità ne l'incontro co le persone, manifestà co na telefonata, un ciocolatin, el regalo de un segnalibro dipinto, es­traendo i colori da i fiori, un saludo da portare in fameja, un cin-cin co i amici del "Graspo" a Nadale e a Pascoa.
El so invidiàbile spìrito cristian el se trasformava in inpegno a favore de la comunità, come catechista, letore in cesa, animatore ne le case de riposo... Na fede convinta ghe xe stà de conforto nel tenpo e sopratuto ne i ultimi ani quando che le so condission de salute xe deventà un grande problema.
Bepin el se ga senpre portà drìo la passion par i funghi e par tanti ani l'è stà Consiliere e Segretario de la "Bresàdola", l'associassion micològica de Thiene. Da persona precisa e piena de cossiensa, el gera ben documentà so la materia e ’l trasmeteva informassion e racomandassion a quei che se fidava massa del fiuto personale.
Altra passion che lo animava gera quéa de ricavare colori da i fiori e da altri vegetali e con questi dipingere... fiori sopratuto, ma anca paesagi. Tante e tante persone pol farse vanto de ’ver ricevù in regalo da Bepin un segnalibro, de i francoboli, de i pìcoli quadri realisà co sta tècnica.
Xe ora ca torna a la serata in so memoria. La gavemo celebrà el diese de giugno, a l'interno de le infinite manifestassion del "Giugno thienese" coordinà da l'Aministrassion comunale. Grassie a na forte publicità difusa dal Giornale de Vicensa, da i boletini de le parochie de Thiene e da le associassion amiche, la Sala Borsa che l'ASCOM ne ga gentilmente oferto xe risultà piena in tuta la so generosa capiensa.
A dare i tenpi de la serata el nostro socio Claudio Cappozzo, presentatore inimitabile, na sagra vivente de trovate estenporanee, richiesto ormai in tuta la Provincia. El primo intervento xe stà opera del sotoscrito che da trèdese ani i rajoti del "Graspo" perseguita ciamàndome Presidente. Col consenso de i soci e la colaborassion de Michela e Marina, spléndide fiole de Bepin, me so’ inpegnà a inpaginare un libreto de 60 pagine co un canpionario de le so poesìe, co i so famosi tautogrami, co quatro "Létare" e quatro de i so tanti contributi a Quatro Ciàcoe. Insieme a l'amico tipografo gavemo pensà a na copertina che gavesse come sfondo i fiori dipinti da Bepin e la so imàgine soridente. Da qualche tenpesta cerebrale me xe gran­dinà zo sto tìtolo: Un fólcaro de fiuri in dialeto, fiuri i so dipinti e fiuri le so conposission tute in dialeto. Dopo, el Prof. Azzolin, amico de Bepin fin da le origini del Graspo (1985), ga ricordà co evidente emossion la presensa discreta, ma senpre positiva e operosa del nostro, in particolare ne la veste de Segretario preciso e superafidàbile. Altra vosse che ga zolà alto par i tanti motivi che legava Bepin a la vita de la parochia xe stà quéa de Mons. Livio Destro, pàroco del Duomo de Thiene.
Sti tre interventi xe stà naturalmente inframesà da leture de alcuni testi dal libreto stanpà par l'ocasion e da strepitose sonate de chitara classica da parte del M°. Alessadro Antico, da ani grande e generoso amico del "Graspo".
Ghe mancava na franza? el cacio su i macheroni? el dulcis in fundo? Ècolo: el Sindaco de Thiene che ’l giorno dopo el gera soto votassion pa’ èssare rieleto el ne ga preferìo a tute le tante altre manifestassion de la serata parché ’l ne xe vissin e ’l ne stima. Efeto magico: rieleto de colpo, saltando ’l balotagio che no la me pare gnanca na bèa parola.

[torna sopra]