Da Venezia

Na paròea venessiana

Canpo del “Ghetto Nuovo”.

I ga otegnùo che ’e case del Gheto ’e deventasse tra ’e più alte.

Eco i busi fati nel ’500 par métar i cardini de fero che tegneva el porton.

Sinquesento ani fà a Venessia nasseva ’a paròea “gheto”, dopo adotada nel mondo intiero par indicar un posto de segregassion, abità da minoranse socialmente escluse da eà restante comunità.
Nel 1516 Zacaria Dolfin fa aprovar dal governo de ’a Repùblica venessiana l’ordinansa che tuti i 500 Ebrei che ghe gera in cità i fusse stai messi a vìvar dentro un posto recintà e serà da eà sera a l’alba, co continua sorveliansa de guardie par inpedir a qualchedun de scanpar fora o de rientrar tardi. Ste guardie ’e vegneva pagàe grassie a un contributo pagà da i stessi abitanti del “gheto” su ordine de ’a Repùblica.
I Giudei i gaveva boteghe a Rialto, i prestava schei anca al governo de Venessia, i vendeva strasse vece e i faseva i dotori, ma no i gera ben visti da na parte de nòbii che i gaveva stabiìo che sta zente no ’a se podesse missiar a i nòbii stessi e a i citadini venessiani, stando vissini de casa. ’A zona selta par serali dentro ’a se trovava a Canaregio dove na volta ghe gera el “geto”, cioè i resti de ’a lavorassion del rame de na fonderia là vissina. Da questo el nome “gheto”: el primo al mondo.
Inissialmente in venessian ’a paròea ’a gera più dolse “geto”, ma co el stabiirse de i ebrei de origine tedesca ’a ze deventada più dura “gheto”.
Fati acordi co i paroni de ’e case necessarie, a i ebrei vegniva comunicà che i afiti i gera tre volte più grandi de quei che pagava i cristiani e che de note soeo i dotori, che i doveva domandar un permesso, podéa ’ndar a visitar i maeài. Però ghe gera vietà de vestir come i dotori cristiani che i podeva vestir come i nòbii.
Nonostante questo, parte de ’a nobiltà ’a continuava a voer che i giudei i fusse mandài fora de Venessia, sensa però otegner efeto verso ’e autorità. Ne i sècoi i abitanti del “gheto” i ze senpre stai considerài stranieri e mai integrài co i venessiani, ma nel 1589 el Senato stabiisse che i abitanti del “gheto” i podeva star là fin che i voeva. Cussì ’e pìcoe case de al massimo dó piani, par consentir el rivar de novi abitanti e l’aumento del comercio dentro el spassio assegnà i ga otegnùo che ’e case del Gheto ’e deventasse tra ’e più alte, rivando fin a nove, diese piani. A un serto punto el logo assegnà a i giudei el ze rivà a ocupar el spassio de come ’o vedemo ’desso, anpliàndose in ogni modo lecito e ilècito tanto da butar fora su el canal, che ghe ne segnava un confin, ’e altane: spassio in legno sul canal, proibìo da ’e legi de chel tenpo.
’A vita tra i vari grupi de origine de i giudei no ’a ze stada fàssie, parché ogni parte sercava de far i propri intaressi e, se possìbie, robando el spassio de i cofinanti de altra origine.
Na vita fà, quando so’ entrà par ’a prima volta nel Gheto, go visto che su ’e coeone de piera d’Istria che portava dentro ’a me meta ghe gera, e ghe ze ancora ’desso, de i fori. I ze i busi fati nel ’500 par métar i cardini de fero che tegneva el porton che el vegneva serà a l’ora stabiìa.
No so’ mai passà voentieri par el Gheto parché, secondo mi, se respira na aria pesante nonostante ’a particoearità del logo. Ne ’a me vita, par lavoro, go dovesto restaurar una de ’e sinagoghe, quea italiana, e de visitar quea spagnoea, sentìndome fora logo. Par come conosso mi ’a storia de sta parte significativa de ’a cità del confino de i ebrei antichi, no se sente ancora na aria, come dir, serena e no ze par el posto fisso de poissìa che vìgia su ’a sicuressa, ma evidentemente par calcossa altro. Su i libri de storia se parla anca de na vita “vivace” dentro el Gheto che gaveva fato de necessità virtù, tanto da èssar frequentà da i cristiani par conprar e vèndar robe de tuti i tipi.
Ne l’èssar Bizantin fin dentro el cuore de i venessiani, se trova tante deroghe riguardanti el seragio de i ebrei, come par esenpio el dormir fora del recinto de i i giudei che gera invitài a feste ne i paeassi de ’a nobiltà.
Forse anca par questo un serto numero de òmeni i se faseva circoncìdar, e dopo i ’ndava un periodo in oriente par ritornar, a tuti i efeti, a Venessia come ebrei e poder star nel Gheto e comerciar, acumueando fortune.
Ghe ne ciapava beneficio eori e l’economia de ’a Serenissima che ben ’a se vardava de métar in discussion el canbio de reigion de ste persone. Questa ’a ze ’a prima parte de l’origine del Gheto de Venessia, tanto siora de avenimenti inportanti da no poder èssar contenùa in un soeo artìcoeo, ma che permete de evidensiar un altro posto de peso de ’a Repùblica de San Marco.

[torna sopra]