El filò de i Wigwam

Ilaria Vellar
In arte Veila, cantante cimbra de l’Altopian

Ilaria Vellar con l’organeto.

Ilaria Vellar con Efrem Tassinato.

Robe da no crédare! Poco più che na tosata, Ilaria, in arte Veila che la xe nata in te l’Altopian de Asiago nel 1994, la xe apassionà cussì tanto de la so tera e ’a so tradission cimbra che la porta ’vanti, co so musiche originali, inbastardéndola co ’l Pop e el Folk Dance. Na roba proprio bela che, quando la se ga esibìa in te un filò al Wigwam de Arzerello, la ga lassà tuti a boca verta par la so bravura e passion. Ilaria la taca a far musica za da picinina. Penseve che a quatro ani la strinpela al pianoforte de casa. I so genitori i vede subito che la snarabòtola la ga vena musicale, cussì i decide de farghe dare lession da na maestra de piano.
Ma, come che se ghe dise “no se poe far scàndole sensa na soca” e qua, la ga ciapà da so popà: artesan, fisarmonicista e ’passionà de musica! Ma a la tosata ghe piase anca el balo e el spetàcolo e, a 10 ani intanto che la vede le danse cimbre de i Grützigar, grupo folkloristico locale Roanese, la decide de farghe parte come balerina. Le sonorità de ste musiche tradissionài e i costumi doparài in te le esibission riporta a l’origine cimbra de ’a tosa che, nata e vissùa su l’Altopian, la cata belesse naturalistiche e posti de tanta storia che i ghe dà el stile e la espression artistica. Nel 2006 Ilaria la se incanta de un strumento originale: l’organeto (fisarmonica diatonica o “du bott”). Nel 2010 la inscomissia a sonare a qualche festa de paese co el conplesseto de so popà, el “Duo Vellar”. Co ’l passare del tenpo Veila la coltiva e la miliora anche la passion par el canto, spesso la torna anca al pianoforte e la mete in musica le so prime ispirassion e la inscomissia a scrìvare qualche canson. Senpre dal 2011 la vien ciamà da i Balt Hüttar (Guardiani del bosco, in cimbro), na band Folk Metal de l’Altopian. Ma la tosa la xe brava anca a scola, difati la se laurea in DAMS (Dissipline de arti, musica e spetàcolo) a Padova, co na tesi su la comunicassion musicale durante el concerto live, dove che la ghe mete anca le so esperiense vissùe.
Tradission e modernità le pole ’ndare d’acordo. Se poe ben dire. Roana (Asiago) +39 349 3964234 vellarilaria@hotmail.it

[torna sopra]