Da la Lessinia Centrale (VR)

Gita al Maregge

L'altar de la ceseta de Maregge, dedicà a S. Michele Arcangelo, protetor de i pastori.

Ano 1954. Davanti al rifugio Scalorbi, a i tenpi che noantri semo nè al Maregge.

L'ostarìa del Maregge, ’ndó se catàa pastori e malgari e i diséa che lì i balàa.

Ne la vita, ghè senpre na prima olta. Nar ’n montagna, par mi, in Lessinia, ghè stà na prima olta. Dódese o trèdese ani, ’n sié bociasse, né òmeni, né buteleti, éimo binà ’n po’ de mance, d’acordo con le mame, no’ con i nostri bupà, parché sicuramente no’ i voléa. Ma la mama, la ghéa da saérlo, parché a mesodì, a magnar, se no’ se ghéra, i éra goài: naséa ben na scusa, noni o altro. E cossì, noantri, né omeni, né buteleti, ne sémo organisè. Tri, coatro paneti a testa, conprè ’n paese, soli, i n’à dito che su là ghè le marasche, e pan e marasche no’ l’è da scartar del tuto. Aqua gnente, parché fontane ghe n’è dapartuto, scarpe bone, ’l tenpo l’éra sul suto, nar fin al Maregge e tornar ’ndrìo. Parché ’l Maregge? Parché de ’sta località, i de parlàa, parché là i balàa, e parché l’éra ’n bel posto ’ndó se catàa i pastori, i malgari. Ci savéa ’ndó l’è? A parole tuti, ma ’n realtà nissuni. Ma ci ghéa paura? Nessun! Partensa a le oto de matina, festa de San Roco, sédese de agosto; al nostro paese, l’éra ’l dì de la sagra! Ma sagre, no’ se de faséa, no’ giràa schèi! Cossì noantri bociasse dal passo bon sen partìi. A le oto, pronti e via. Conprar ’l pan a Sago(Azzago), via verso ’l Sèro (Cerro) la strada, stradon, nóo de bala, màchine coasi zero, coalche caro de fen, tirà da i bo, coalche camio da sassi o da legna, coalche caval, bel tenpo e tuti sié contenti. Proprio ’n camio, mia tanto grosso,’l se ferma e l’autista ’l ne dise:
“’Ndó nèo, bociasse. Volìo ’n passajo?” Mi che sera ’l pi vissin al camionista ghe rispondo e ghe digo che nen al Maregge, e lu, ’l ne dise:
“Dài, montè sù, du ’n gabina e coatro sentè dedrìo. Mi vao pi ’n su del Maregge e ve meno fin là.”
Mi me son sentà vissin a lu, e lu l’éra ’n buteloto chel ghéa ’oja de ciacolar. El m’à domandà ’sa nen a far al Maregge, s’a gavemo da magnar, e coan’ go dito che ghemo tri paneti a testa e i magnemo con le marasche, ’l me risponde che:
“Marasche no’ ghe n’è pi, ma se volì, lì de soto a la strada al Maregge, ghè ’n bacan che ’l vende formajo e bon; conprèghene ’n casatin e podì magnar i vostri disdoto paneti. Come sio messi con i schèi?”
Ghe digo che saremo su i domila franchi. E lu ’l me dise:
“I sarà ’n po’ pocheti, ma disighe che ’l ve fàa bon presso.”
Go domandà ’ndó ’l va co ’l camio, e el me dise che ’l va a cargar piére, sassi da far muri, za scoadrè. El naséa a pian, ma ’l naséa, no’ se rivàa mai e mi ò pensà che, se no ’l catàimo lu, no’ rivàimo al Maregge. Ma ghe semo rivé.
Là ghéra na bela ceseta, i éra le óndese passè, i diséa la messa; lì ghéra ’n’ostarìa, zo soto ghéra na contrà, ne semo sentè tuti su na grossa bóra de fò e emo scominsià a far conti e progeti. Magnemo pan e pan, nemo par formajo, ghè l’ostarìa, ’sa vèndeli? Che nen a védre? ’Ntanto ven fora coèi de la mEssa, ghéra diversa gente e anca de i buteleti che i ne giràa ’ntorno. Ghéra na buteleta, biondina, che, a colpo de ocio, la voléa ciacolar, cossì mi go domandà ’ndó i vende formajo. Éla da distante la m’à segna la casa:
“Là i vende formajo, l’è me zio, se volì ve ghe porto mi?”
“Speta ’n che ghe domando a i conpagni.” L’acordo l’è stà che nemo par formajo. Coan’ sen stè là, ghéra na bela dona, ghémo domandà ’n casatin de formajo, ma ’l costàa massa par in nostri schèi, alora la dona, che la me paréa tanto a la bona, la ne dise:
“Coanti paneti ghìo da magnar?” Go risposto disdoto, e ela la me dise:
“Deme i paneti e mile franchi, che mi ve i preparo co ’l formajo rento.”
Cossì l’è stà. La n’à preparà tuti i disdoto paneti sensa tajar tanto fin ’l formajo, emo pagà, e la ne dise, visto che éimo vansà schéi:
“Lassù a l’ostarìa, podì béare ’n bicer de aranciata. Ma se volì star chì ne la me corte, podì starghe.”
Emo pensà de nar a l’ostarìa, parché se sentéa na fisarmonica che sonàa. E cossì semo torné a sentarse su la bóra de fò. Con calma, e a pian pian, emo tacà a magnar. Uno, du paneti, e ’l terso, emo pensà che l’è mèjo magnarlo par strada, visto che la strada l’è longa e no’ ghe sarà nantro, santo camionista che ne scurta la strada.
Da brài bracoti, semo nè a vedre la ceseta, rento ghemo dito na Ave Maria a la Madona, ’n po’ ’n pressia, emo ’isto che ghéra na fontanela lì ’n giro e cossì sen nè a béare e con i soldi che ne restàa, beén coalcossa al Sèro.
Fin a le tre, sen stè lì, ghéra coalche sonadàa de fisarmonica e ghéra ci proàa a balar su la strada, ma no’ la naséa ’n porto la festa da balo, cossì, verso le tre, ne semo messi ’n strada, par tornar a Sago. E par coanto caminàimo la strada l’éra senpre longa.Verso le sincoe, emo magnà l’ultimo paneto al fontanon del Sèro, e lì nel paese ghéra na gelatara, zia de uno de noantri; sen nè là a spendre i ultimi schèi, che, grassie a la zia, emo magnà ’n super gelato. Dopo dó orete sérimo a casa, stufi morti, e ne semo diti:
“Mai pi na stracada cossì longa.”

[torna sopra]