Da Roma, in diaeto de Este (PD)

“Carneade! Chi era costui?”

Carneade (Cirene, 214 a.C.-Atene, 129 a.C.), fieòsofo greco antico.

Statua del storico legislatore Karonda (VI sec. a.C.- Catania, VI sec. a.C.), ne ’a Vila Bellini a Firenze.

Cussì diseva don Abbondio, lezendo el nome de un fieòsofo che no ’l gheva mai sentìo nominar.
Anca mi, scorendo eà vita de Erodoto go inpatà un Carneade: “Karonda”, personagio, come disemo noantri: “mai scoperto”. El grande storico, nel quatrosento e roti a.C., incaricà da l’amigo Pericle de sovrintènder a eà fondassion de Turi, na colonia in Puglia, dise de voerse ispirar, par ’e règoe de ’a nova sità, a ’e legi che, squasi tresento ani prima, Catania ga ’bu apunto da “Karonda”, el pi eminente de i so sitadini. El fato po' che ste norme sia stà adotà da parece altre coeonie, fa pensar che ne ’a Magna Grecia ’e dovesse èsser pi considerà de quee famose che Licurgo e Solone ga inposto a Sparta e Atene...
Ostregheta del mandorlato! E mi che go fato el liceo, no go da saérghene gnente? Informémose!
Ne eà antichità prima de inissiar un poema o n'òpara leteraria, se invocava l’aiuto de ’e Muse. ’Desso, che ’e xe passà de moda, no resta che rivolgerse a... Santa Wikipedia. Cussì go fato, e sicome me piase stèndervea puìto, scominsio “ab ovo” come diseva el me professor de ’talian.
Dunque, tra l'VIII e el VII sècoeo a.C., eà antichissima sità greca de Calcide, par incrementar i so comerci co ’a Sicilia, fonda coeonie su i litorài de l'isoea, pi adati a èsser trasformà in porti sicuri. Una de ’e pi inportanti sarà "Catanè", eà nostra Catania. Su sto nome greco ghe xe dó corenti de pensiero: una eò fa derivar da "Catà Etnè", “Vissin a l'Etna”; st’altra da "Catanè", "Grataròea", riferìa al fato che eà sità xe stà costruìa sul teren malguaivo e irto de na coeata del vulcan. I sitadini del novo insediamento, par darse règoe che inpedissa, co eà certessa del dirito, arbìtrii, trufe, soprusi e prepotense, se mete ne ’e man de “Karonda” un “dotto superpartes” vegnù co eori da eà Grecia. Eu par fàrghee entrar in testa, ghe ’e stende adiritura in versi da mandar a memoria fin da pìcoei, e cantar in coro in tute ’e feste.
’E so legi no ne xe rivà in sta veste, ma nel riassunto tramandà da alcuni amiratori antichi. ’E go lete e quel che me ga colpìo xe che, araquante podarìa verle scrite pi che un pagan, un Padre de ’a Cristianità de mie ani dopo. Ve ne dago un sagio, tradoto mèjo che posso.
– Quaunque cosa voì far, dimandeghe ajuto a eà Divinità, che de sicuro no ve consegiarà mal.
– Se ghe tegnì a eà stima de Dio, astegnive da ’e cative assion,chè eu no ama i perversi.
– Deiti terìbii da punir xe: ofènder eà divinità e i genitori; dispressar legi e magistrati.
– Par èsser stimà ne l'Assenblea, se ga da seguir senpre giustissia e decoro.
– No frequentè maeavitosi, parché eà so infamia no piova su eà vostra testa. Feve amissi tra i giusti e imitè ’e so virtù.
– Onorè i vostri morti no soeo co làgreme, ma anca co oferte benefiche.
– I veci ga da insegnar a i tosi a distìnguer el ben dal mal, e a vergognarse de far cative assion. Cussì no ghe vegnarà sù nevodi sfaciati, ché eà sfaciatàgine porta a l'oltragio e a eà prepotensa. (Sante paròe!) Ne ’a vita xe mèjo mostrar prudensa, che no far i sparoni, e ricordarse che xe pi stimà modestia e tenperansa. (Eà prossima, ricordémose che eà xe stà scrita 2.700 ani fà!)
– I fiòi de tuti i sitadini, indistintamente, ga dirito a l'istrussion, a spese de el Stato. – In ultima:
– Se qualchidun vorà canbiar ste legi, dovarà presentarse a l'Assenblea co un capio al còeo, savendo che, se eà so proposta vegnarà bocià, el sarà inpicà sul posto!
Queste, a parte l’ultima, ’e xe legi che ’ncora condividemo noialtri cristiani.
’Desso, volìo saer come xe ’ndà a finir sto fieòsofo, sta brava persona de Karonda?... Sentì, sentì: tra ’e altre legi una recitava: “Par non influensar ’e decision de l'Assenblea, xe proibìo entrar armà ne l'Agorà (eà piassa de ’e riunion). Chi trasgredisse vegnarà imediatamente messo a morte.”
Dise eà tradission, che un giorno Karonda, ussìo da eà sità, el vede un parapilia tra contadini che se minacia co ’e armi. El torna de corsa drento a’ e mure, e in piassa, desmentegàndose de aver el pugnàe al fianco, el averte ’e autorità. Queste ghe fa notar ch'el xe armà proprio nel logo in cui eu ’e ga proibìe.
Karonda, par aver anca sóeo invoeontariamente trasgredìo eà so lege, sfoderà el pugnal el... fa carakiri sul posto!

[torna sopra]