Fresco de stanpa

NOMEN OMEN, un nome un destin
Xe stà presentà a fine novenbre l’ultimo libro de Giordano Dellai

La fameja Dellai de Longa de Schiavon, el 12 agosto 1964, el dì che xe stà batezà el pìcolo Giordano.

La fameja del fotografo Pietro Casagrande de Sandrigo, ’nte i ani Trenta.

El Municipio de Sandrigo.

Na ociada profonda ’ntel tenpo passà de le sinquanta pi ’nportanti fameje de Sandrigo a la scoverta de le rason che ga formà el cognome. El se intìtola “Nomen omen, un nome un destino. Viaggio storico-letterario sentimentale alla scoperta delle origini delle famiglie di Sandrigo” l’ultimo libro de Giordano Dellai che xe stà presentà in bibioteca a Sandrigo el 26 novenbre passà.

Semo ’ndrio parlar de un volumeto de 184 pagine, stanpà da Graphicnord Group de Sandrigo, che ghe piaserà soratuto a i sandricensi, parché i trovarà notissie nove su la so fameja, a partire da queo che vole dire el propio cognome che, come diseva i latini ’ntel proverbio che dà ’l tìtolo al libro, mensona un destin comune a chi che lo porta.
Na òpara da lèsere tuta d’un fià o anca solo da ciapare in man ogni tanto, par conòssare le rason de la selta del cognome, fata pi de sinquesento ani fà, e par scovèrzare el destin prefigurà ’ntel so significato.
Alternando el stile del stòrico a queo del naradore, in sto libro Dellai vèrze el casseto de i ricordi de ogni fameja, guidàndola a la conossensa de le propie raise, rivando in tanti casi parfin anca a individuare le origini e la proveniensa del capostipite, vissùo pi de sinque o sìe secoli fà, e contando parece storie de fameja, messe rento al calderon de la storia nassionale o condìe co alcune de le pi bele pagine de la leteratura ’taliana.
E cussì vien fora na caretà de notissie su i Pozzato, i Chemello, i Manfrin, i Corrà, i Clavello, i Contro, i Marcon, i Rossato, i Girardini, i Rigon, i Cuman, i Novello, i Faresin, i Casagrande e tanti altri s-ciapi famejari che àbita a Sandrigo, ma che ga anca raquanti parenti che vive rento e fora dal Vèneto.
Scorendo le pagine del libro se pole vèdare anca parece foto de vita famejare e paesana, tiràe fora da l’Archivio Fotografico de la Bibioteca.
Insegnante de lètare al liceo Brocchi de Bassan, colaboradore da na trentina de ani del Giornale de Vicensa e de la nostra rivista Quatro Ciàcoe, Giordano Dellai ga publicà fin ’desso pi de sessanta libri, quasi tuti de storia locale.
Par sta nova òpara Dellai ga ’vuo la colaborassion e ’l patrocinio de l’Aministrassion comunale, de la bibioteca civica “Pittarini” e de l’associassion culturale “Pietro De Pellegrini” de Sandrigo, a i quali se pole rivòlgerse par ’vere na copia del libro.

[torna sopra]