|
Ciàcole Visentine
L'ùltimo de i esploradori
Vénare 14 de novenbre, tien na conferensa a Sandrigo, Jacek Palkiewicz, l'esploradore polaco che ga catà in Perù le sorgenti del Rio de le Amàssoni
 |
| Jacek Palkiewicz durante na so spedission in Siberia. |
Chi xe che ga dito che 'desso no ghe xe pi i esploradori de na volta?! Se calchedun ga nostalgìa de i vari Magellano, Pigafetta o, par vignere pi vissini a noialtri, Bering e Stanley, bisogna che 'l partèssipa a la conferensa programà par el pròssimo 14 de novenbre 'nte la sala conferense de la Bibioteca Cìvica de Sandrigo. Protagonista de la serada, defati, sarà el giornalista e esploradore de orìgini polache Jacek Palkiewicz, autore de sirca 25 esplorassion e altretanti libri, uno de i ùltimi veri esploradori che esiste 'ncora 'nte la facia de la tera, capo de la spedission sientìfica internassionale che 'ntel 1996 xe riussìa a catare finalmente le vere sorgenti del Rio de le Amàssoni.
Nato na sessantina de ani fa in Polonia, Palkiewicz ga sposà na professoressa de Sandrigo e 'desso, cò no l'è in spedission, el vive a Cassola, vissin Bassan. Ne la so atività el ga guidà parecie spedission inportanti 'nte l'ànbito de progeti internassionali. Le so risserche, portà vanti in canpo etnogràfico, ga portà a l'aprofondimento de la cultura de raquante etnìe in via de estinsion. Col so laoro Palkiewicz ga contribuìo anca al studio de l'anbiente e de i ecosistemi de i deserti, giungle e zone polari, rancurando inportanti riconossimenti sientìfici.
Sintura nera de karate, pilota de aliante, el giornalista strapiantà in tera bassanese xe particolarmente orgolioso de le so mission 'nte i anbienti pi càncari de la tera par studiare i lìmiti de l'organismo umano a le privassion e del so adatamento a le condission estreme, dimostrando senpre che un individuo pole restare vivo anca in situassion che va oltra quele fissàe da la moderna fisiologìa. Par dìrghine un paro, 'ntel 1975 el ga traversà l'Atlantico in solitario a bordo de na sialupa de salvatajo; sete ani pi tardi el ga fondà la prima scola de sopravivensa esistente in Europa, che xe stà presa a sogeto par el film "Uomini duri", intrepretà da Renato Pozzetto, Enrico Montesano e Alessandra Mussolini.
Dopo 'vere colaborà par diversi ani co i cosmonauti russi 'ntel programa de Survival, 'nte l'istà del 1996 Palkiewicz ga svelà el mistero de le sorgenti del Rio de le Amàssoni. In testa a na spedission sientìfica internassionale, el ga localizà in maniera incontestàbile la fonte de queo che, proprio grassie a sta scoverta, l'è deventà el fiume pi longo al mondo. Le sorgenti le xe stà trovàe in tera peruviana 'ntel nevaro Quehuisha a 5170 metri de altessa, sora na montagna che fa parte de la Cordigliera Chila, 'ntel Perù meridionale.
Attualmente Jacek Palkiewicz el prepara in diferenti zone climàtiche reparti europèi de antiterorismo. Grassie a le so conpetense e a le so scoperte l'è menbro de la prestijosa Royal Geographical Society e de l'esclusivo The Explorers Club de Nova York in America. Po', l'è stà anca insignìo del tìtolo de acadèmico de l'autorèvole Academia Sientìfica Russa de informàtica. Gran amigo de Lech Walesa e de papa Woytila, anticomunista e feroce aversario del regime filosoviètico che ghe gera prima 'ntel so paese, Palkiewicz se presenta cofà l'ùltimo de i gran esploradori del tenpo passà e cofà omo veramente tuto de un tòco. In tuti i sensi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Bisogna averghe sale in zuca
Quando ca femo on sbalio o cometemo na stupidàgine, xe parché te chel momento a semo restà senza sale te la testa
de Mario Klein
Memoria viva
Arrigo Boito e Victor Hugo
te na tragedia padovana del 1500
de Gigi Vasoin
Ciàcole Visentine
L'ùltimo de i esploradori
Vénare 14 de novenbre, tien na conferensa a Sandrigo, Jacek Palkiewicz, l'esploradore polaco che ga catà in Perù le sorgenti del Rio de le Amàssoni
de Giordano Dellai
|
