|
Editoriale
Contento come na Pasqua
I xe tanti i significati che se ingreja intorno a la festa pi granda de l’ano: Pasqua la xe on incrocio de tradizion cristiane, ebraiche e pagane, come anca bona ocasion de usanze "gastronomiche e linguistiche", conpresi i modi de dire...
 |
| L’aria se inpina de farfale o de colonbe... e la festa xe pi festa! (foto de Luigi Frosi) |
Se, dopo tanta esperienza, dopo ani anorum che xe capità le stesse robe, i nostri veci xe rivà a lassarne un modo de dire come questo o altri ligà a la Pasqua, ghe xe de sicuro on fondamento de verità.
El deto "contento come na Pasqua" che xe colegà co la liturgia e la tradizion cristiana de tale periodo, oltre a esprìmare la grandiosità del momento de sta festa religiosa che celebra la Ressurezion de Cristo e, quindi, del trionfo de la vita e la sconfita de la morte, el xe anca on concentrato de grande filosofia umana.
L’omo no sarìa nato par patire l’ira de l’inferno, par tribolare, par tegnere in piè na vita de stenti, par avere senpre robe che va storte, par sentirse senpre on magon chì, che no ’l va mai zo. L’omo sarìa vegnù al mondo, no digo par gòdare, ma par sentirse contento, par avere la sodisfazion de dire: "ghe son anca mi, questo lo go fato mi, go la gioia de gustare le robe bele che xe nel creato, conpresa la vita che se rinova dopo ogni batosta, dopo ogni cativa stajon..."
In ’na parola: l’omo sarìa al mondo par sentirse contento el pi possìbile. E qualo momento pi propizio de la Pasqua, da tòre come esenpio, come apuntamento, come traguardo? Cossa ghe xe de pi belo de l’arivo de la primavera e de la prima luna piena dopo l’equinozio de primavera, col ritorno a la vita, in tute le so manifestazion: le giornate se slonga, el sole taca a scaldare, la tera se veste de verde e de fiori, le bestie (anca quele umane) le se sente indosso el morbin, le va in amora...
Se buta via i musi duri e el rùzene invernale, se sta a l’aria aperta, parfin i pensieri se fa pi lesieri... se taca a fare progeti par quando sarà pi caldo... Ne l’aria torna a xolare le farfale, dopo che le ga roto el bòzolo e ghe xe spuntà le ale, le poche ave che xe restà le scumizia a fare el so laoro passando de fiore in fiore...
Eco che Pasqua par i cristiani la ricorda el passajo dal scuro de la morte a la luce de la rissurezion. "Natale con i tuoi, Pasqua con chi vuoi", el vien subito ciapà sul serio e messo in pràtica: crisi permetendo, torna l’"esodo di Pasqua", quasi par voler ricordare la tradizion ebraica che ricorda el viajo de liberazion del popolo de Israele da l’Egito.
Dopo i quaranta giorni de Quarésema, de on clima de riflession su la figura divina e umana de Cristo, de penitenza, digiuno e astinenza "nei giorni comandati", eco rivà el momento de contentare ogni golosità e consumismo: agnelo, colonba o fugaza, ovi decorà o de ciocolata, verdure e primizie de stajon... Anca questo porta doni... a la grota de la contenteza. Pecà che la sia na contenteza che riva na sola volta a l’ano.
Forse, dovarìssimo sforzarse on poco de pi a zercare de contentarse co quelo che se ga, magari in salute (che sarìa za tanto!), prima e dopo che casca Pasqua, tegnendo conto che, anca se stemo in crose par le dificoltà del momento che ne fa védare l’ano "longo come na Quarésema", la crose pi pesante la xe quela che se se fa da noantri soli. Vedarì che, dàndose da fare, se no saremo "contenti come na Pasqua", lo saremo "come na Pasqueta".
Questo, el nostro afetuoso augurio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Contento come na Pasqua
I xe tanti i significati che se ingreja intorno a la festa pi granda de l’ano: Pasqua la xe on incrocio de tradizion cristiane, ebraiche e pagane, come anca bona ocasion de usanze "gastronomiche e linguistiche", conpresi i modi de dire...
de Mario Klein
Memoria viva
Sperone Speroni
in difesa de la casa de ’l Petrarca
’Na bea passejata in te le riviere. El raconto de un prete su la casa de ’l Petrarca. La vita e le òpare de ’l grande leterato e filosofo padovan
de Gigi Vasoin
Da Vicenza
Quaranta cenacolini a Ciòsa
de Ines Scarparolo
|
