Da Verona

Origini del Carneval veronese

Do significative imàgini del Carneval veronese 2012.

El Carneval de Verona, sconossudo prima del 1500, lo catemo po’ in quasi tute le epoche, soratuto durante la dominassion venessiana, dove el bacanal del vènardi gnocolar el gaveva come scopo quel de dimostrar la cordialità de i raporti che coreva tra la Serenissima e la nostra çità. Sicuramente l’è questo el motivo de l’abondante pansa de la prima màscara veronese “Papà del gnoco”, sìnbolo de tole ben fornide. I èra tempi ne i quai se usava dir “grassessa fa belessa”, tempi quando che l’agetivo “belo” el voléa dir pacioco, in carne, e no’ l’era çerto fissà sul model de ancó, ossia quel de le indossatrici “pèle e ossi”.
El Carneval veronese el se invia el vènardi prima de la Quarésima, overo el vènardi grasso o el vènardi casolar, el dì del formajo e del buro, sinonimi de abondansa come i è stà par i ebrei el late e el miel. Insoma el nostro carneval l’è la sagra del gnoco, specialmente da quando è rivà da la ’Merica la patata che l’è servì a farlo più mòrbido parché, fin a quel momento, l’èra stado inpastà solo con aqua e farina. El carneval, dunque, par che ’l sia scominçiado nel 1531, come a dir... 400 ani prima che nassa mi.
Nel 1511 ghèra stado anca a Verona ’na terìbile carestìa causà da la pèste che l’aveva fato 13.000 vìtime su ’na popolassion de circa 20.000 persone. Prima de i editi napoleonici in grassia a i quai tute le tombe i è stade traslocade fora da la çità, ogni cesa l’èra area cimiteriale dove vegnéa sepelidi de solito i parochiani. Ghèra po’ altri çimiteri ma no’ ghèra più posto gnanca là e oramai i morti i finiva a çentenara in Adese. La spussa la impestava tuto, provocando pura diversi casi de colera. A completar el disastro se gavéa messo l’inondassion de l’Adese e del Po. Ma eco che su la testa de i disgrassiadi veronesi vien zo ’n altro copo: causa el forte aumento de la farina i pistori i s’à messo in siòpero, rifiutando de vèndar el pan. Questo à provocà ’na rivolussion con l’assalto de le boteghe. El pèso l’è stà a San Zen, che tra i rioni veronesi l’èra el più pitoco.
El nobile Tommaso Da Vico, un inportante dotor sanzenato par métar a posto le robe, dopo aver nominà ’na comission, l’à pensà ben de distribuir a so spese, pan, vin, buro, farina e formajo a i afamadi, propio l’ùltimo vènardi de carneval. Inoltre l’à partecipà a la grande cavalcada che l’è andà incontro al vescovo Giberti che da Roma el vegneva a tor la diocesi de Verona.
A la so morte po’ Tommaso da Vico el ga lassà sul testamento che ogni ano vegnesse regalà a i abitanti del so rion roba da magnar in quantità. ’Sto legato l’esiste ancora ne la session de i archivi de stato de Verona. El porta el nùmaro 128 e l’è stà detà al notaio Bonifacio di Sebastiano el 13 magio 1531. Ancora adesso el Re del nostro carneval el vien eleto dopo n’acanita canpagna eletoral che se svolge atorno al tàolo de piera dentro el giardin de la splendida Cesa de San Zen: tàolo da ’ndò Tomaso Da Vico co’ le so mane el dispensava “el gnoco”.
Da alora, ogni ano, el magnanimo “Signore” con i so cavalieri el scorta el “Papà del gnoco” che a dorso de musso, con in man el forcheton infilà in un gnoco gigante, con el cortèo de i so “macaroni” el vèrse la manifestassion drio ’na stranba màscara ciamà “Ponpeo del zèrlo”. Sto qua, con un piaton de gnochi, era uso che ’l se aviçinasse al Sindaco, ofréndoghene uno: “El toga, ecelensa, el magna ’sto gnoco, lo vedo... l’è poco ma l’ofro de cor.” Ma quando el Sindaco el verséa la boca, el gnoco con un giro de brasso el canbiava diression e a magnarselo l’era Ponpeo che a ’sto punto el concludeva: “El scusa, ecelensa, no’ l’è educassion ma l’è tradission!”
El Carneval de Verona el ga però altre màscare inportanti: el Duca de la Pignata, overo Siro Zuliani che el sfila al vènardì gnocolar con la carossa descoerta, el caro de l’abondansa e el caro con el dio de l’oro sentà su la favolosa pignata... In altri tenpi dal caro de l’abondansa piovéa su i spetatori polami e caramele... ’desso i è solo coriàndoli!
Dal rion de i Filipini vien Reboano, principe de la concordia, a bordo de la nave ciamà la “Marangona”. Dal borgo Venessia riva l’inperador Francesco Giuseppe (soranominà Bepo Patata), a brasseto de la Sissi, co’ la scorta del general Radeski (deto: Radecio) e del confessor de corte, Frate Feton. No’ desmenteghémose po’ el rion de San Zeneto che l’à eleto a rapresentarlo adiritura Cangrande de la Scala.
Ma ogni paese e quasi tuti i borghi de Verona i ga la so màscara in magioransa eleta con regolari elessioni. Solo una l’è ereditaria: el sucitado “Duca de la Pignata” del rion de San Stefano.
Le màscare generalmente le ricorda personagi storici: Re, Regine, nobili ecc. No’ manca gnanca “Attila, flagello di Dio”, ma l’elenco el sarìa chilometrico.
Ve ne cito partanto solo qualchedun: Re Goloso da le Golosine, Mastro Sogar da San Michel, el canpanar de san Giusto (e la so mula) da borgo Trieste, Simeon de l’Isolo da Santa Maria in Organo, el Re de la Carega, quel de la Renga, quel del Magnaron, el duca de la Seola e ci più ghe n’à ghe ne meta!
El nostro Carneval no’ l’è come quel de Viaregio, manco che mai el ga la pretesa de conpètar con quei sudamericani, pur el ga la so belessa... el sémena alegrìa e parfin istrussion!

[torna sopra]