|
Da Lendinara (RO)
Un filo de fantasia
 | | In aprile, a Bovazechin, s’incrosa i fili intel zièlo turchin. (foto ClaTi) |
Aprile, un’ora el pianze e un’ora el ride; riva April co’ i fiori, co’ i poeti e i cantautori, in april la prima tonizada sveja el bosco e la vecia indormezada. E ’ncora: “d’avril gnanca un fil”, “in mars, füs iscars, in avril gna ü fil”. Sti ultimi do no’ i xe proverbi nostrani (a fago un saltìn foravìa!): uno el xe modenese e chel’altro bergamasco e i ga significato difarente. El primo el racomanda de no’ cavarse zò parchè no’ sarìa gnancora stajon, el secondo inveze el se riferisse al filo par tèssare. A se podarìa inventàrghene ’n altro, su la falsa riga de sti qua, par via de ’na tradizion che ormai la xe entrà inte la storia de Badia Polesine: la “Sagra nazionale degli aquiloni”: “In aprile, a Bovazechin, s’incrosa i fili intel zièlo turchin” o sinò: “In aprile, a Badia, tuti i fili i zola via”.
Badia la xe ’na citadina de l’Alto Polesine traversà da l’Adese che ’l la divide da la provincia de Padova, e confinante co’ quela de Verona. Sta manifestazion, la più vecia, o forse la seconda in Italia, la conpisse zinquantatrè ani; la prima edizion la xe stà fata sora la riva de l’Adese a Boscovecio ca se trova in località Colombano, ma za dal secondo ano la xe stà spostà sora l’àrzare del Sperone Bova a Bovazecchino, par rason de sicureza: difati lì ghe xe ’na banca spaziosa. L’idea la xe partìa da conponenti del Circolo Culturale Cittadino, in particolare da Giovanni Beggio che, insieme a Gino Stefani e altri amighi, ciapando spunto da la famosa poesia de Pascoli, “L’aquilone”, ga pensà de organizzare’na festa ca podesse métare insieme grandi e putini, senza però farla deventare ’na gara.
Intel bel raconto ca testimonia la nàssita de sta iniziativa, Stefani el traversa tute le tape dal ’60, ano de la prima manifestazion, a l’86, quando che ’l lassarà a altri la gestion. Da subito el grande sucesso el vien confermà anca da i premi oferti da personalità, industrie e associazion italiane e straniere, i papi Giovanni XXIII e Paolo VI, deputati e prefeti, autorità come el Re Hussein de Giordania, atori e cantanti come Rascel e el Quartetto Cetra, l’Alemagna e la Wolkswagen, la Casa editrice Mondadori e e l’Aeronautica militar, solo par nominàrghene qualcheduna.
Pareci giorni prima, in fameja se se prepara par la festa che ormai la se ga confermà a la data del 25 de aprile, giorno de la Liberazion. I papà i ghe insegna a i putini tuti i truchi par fare la volanda più bela e originale, tornando indrìo intel tenpo, co ’l spirito che Pascoli ben el mostra inte la so poetica fata de evasion e de rifugio intel mondo de l’infanzia dove tuto xe ocasion de meraveja e dove che, solo scoltando la voze del putìn mai cressù dentro ognuno de noaltri, a se pole ’ncora trovare el mistero de la realtà, senza bisogno de tanti ragionamenti. Fabricare aquiloni el jera uno de i più bei passatenpi inte le giornate tiepide; un fià de inzegno e el venteselo giusto a ne faseva córare e inbalzare sora l’erba. Senza tante pretese e co’ quelo ca se gaveva in casa, carta olià, velina o da disegno, (tanto doparà la jera quela de l’ovo de Pasqua): a se tajava un ronbo rinforzà su le do diagonali da legneti lezieri e ben pelà e dopo a se zontava le cóe e tante decorazion. La parte più rognosa la jera quela de ligare i fili, che a mi i me se intrigava senpre, specialmente se no’ gavevo el mulinelo e alora, de le volte a ghe metevo el filo da inbastire parchè el se vedeva mèjo.
Ma anca sta bela festa che ogni ano la colora el zièlo intel “spero de la bova” a Badia Polesine, la xe stà contestà co’ un esposto da parte de anbientalisti parchè ritegnù fonte de disturbo par le spece animali e vegetali esistenti sora sto trato de àrzare, forse parchè inte i ultimi ani xe stà stravià el senso de le so intenzion, scanbiàndola qualche volta par la festa de i picnic, co’ tuti i pro e i contro. Xe partìa la racolta firme parchè no’ vègna scancelà sta tradizion, ma son sicura che tuti sti “volatili” nati da la voja de liberare la fantasia e de vardare in mezo a le nuvole i continuarà a darse apuntamento, ogni ano, al 25 de aprile.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La sfida de Papa Francesco
Con Papa Francesco tornemo indrìo de dumile ani. Quelo che predicava Cristo,
sostegnù con forza, a metà strada (tra XII e XIII secolo), dal “poverello d’Assisi”,
xe de grande atualità: “povertà, semplicità, servizio e rispetto della creazione
per far risplendere la stella della speranza”.
de Mario Klein
|
