|
Da Adria (RO)
La càmara
 | | Pi avanti, stessa càmara, stesso mare, ma le robe le jera scuminsià a canbiare. |
Milenovesentoquarantasinque, mese de Lujo. Guera ’pena finì el ventisinque Aprile. Prima volta ch’andasìvino al mare, a Sotomarina, parchè quela la jera la spiagia più vissina. Loghi come Rosolina Mare, Boccasette, Barricata, Porto Caleri, Albarella gnancora esisteva. Anca andare verso el Ferarese poco se catava e quelo ch’a gh’jera se tratava de anbienti più o meno selvàdeghi; dal resto el fenomeno del turismo balneare el gheva ancora da scopiare.
Quela del mare la jera na necessità par mi mama, che la gheva bisogno de sole e de jodio, almanco cussì gheva ordinà el dotore. Par la sistemassion bisognava contentarse: le pension le se cuntava su i déi, alberghi come ch’a li conossemo adesso i gheva ancora da pensare de progetarli e cussì bisognava contentarse de “la càmara”. In genere se tratava proprio de una càmara da leto, fornì d’un bagno inte le situassion mèjo, e de l’uso de cusina assieme a la parona de casa e a qualche altro vilegiante, anca lu alogià inte na càmara. No se tratava de robe in grande: la parona fitava dó-tre càmare e ela par tuto el periodo d’istà la se riduseva in streto, magari inte la lissiara atressà co’ ’tavolin e un leto.
La nostra càmara a ne l’eva catà un pessaro de Sotomarina, de nome (o soranome, tanto jera istesso, data la scarsità de cognomi – basta pensare a i Boscolo! – che caraterisava Ciòsa e Sotomarina) Brasiola, che ’l faseva el so giro giornaliero fin in Adria co’ la so bicicletona atressà de portapachi par le cassete de pesse. Ben, la càmara che ’l n’eva catà la jera da la Giovanela. Na palassina proprio tacà a la spiagia che alora scuminsiava co’ na bela duna lunga da le foci del Brenta fin a la diga del porto ciosoto.
In tute le volte ch’a me so’ inbatù de ’ndarghe ’desso no so’ più riussì a individuarla da tanto ch’è canbià la fisionomia del logo. Tegnù conto che chi tenpi no funsionava ferovìa, no gh’jera servissio de coriere, le strade le jera più mote-buse che gualivo, rivare da Adria jera n’inpresa. Par fortuna uno de i mi zii el gheva un brussin e cussì el n’à cargà sù e aventurosamente semo rivà a destinassion. Una volta ciapà possesso de la nostra càmara, emo scoperto tuti i lati positivi de la sistemassion.
Oltre a l’uso in comune de cusina, podìvino gòdarse na terassa bela granda; su i scalini, siè-sete per rivarghe, emo sistemà un forneleto. Che ’l sarìa stà da carbonela, ma nantri lo fasìvisino andare a legna rancurà su la spiagia, un sporton ogniqueltanto ch’a fasìvino sugare ben al sole su la terassa. Lo doparàvino par no far le scale, dato che la cusina jera al piantereno e nantri jèrimo al primo piano, e anca par no catarse in massa, tuti in te chela cusina che la jera granda, ma senpre una sola. Sul fornelo se podeva cusinare la pasta, fare du pesseti arosti, scaldare na roba za fata prima. E ’desso andemo in spiagia.
No gh’jera gabine, onbrelun, bagni organizà, gninte de gninte, solo l’ano dopo i à scuminsià a costruire el “Clodia”, primo stabilimento balneare del dopo-guera. Chel’ano lì le uniche costrussion in spiagia jera i fortini in cemento armato fati fare da i tedeschi contro na ipotètica invasion dal mare da parte de le fòrse aleate. Se caminava pa’ i sentierini ch’eva fato i pescaduri quando ch’i ’ndava o vegneva dal mare. A la matina prestin, quando ch’a se ’ndaseva in spiagia par respirar l’aria bona, se se podeva inbàtare int’i pescaduri che tirava a riva le rede: dó file de òmini a piè descalsi ch’i partiva da bastansa distante, pian pian i se vissinava e, tirando in seca la rede, proprio tacà riva, i sunava a man el pesse che saltava, lassando su la spiagia un muceto de alghe co dentro un saco de gransi pìculi, de pesseti de vario genere lunghi pochi sentìmetri, de ganbariti, de sfojeti tanto sutili da èsser squasi trasparenti. Con un poca de passiensa e un fià de ocio, stando lì cucià a remenare in meso a ste alghe se podeva rancurare un discreto pasto de friturina, che, messa in padela a mesogiorno, la jera bona anca sensa polenta.
Mi padre rivava la doménega matina, senpre co qualche sporton de roba da magnare, che ’l procurava in Adria par qualche francheto de manco de quelo ch’a ne costava a nantri sul posto. E par ricanbiare a ghe preparàvino moleche e biberasse rancurà da nantri, preparàndoghe spaghiti co le vóngole e moleche frite, che lu ’l se godeva un mondo. Emo passà du misi ch’i n’è svolà via. L’ano dopo ghe semo tornà. Stessa càmara, stesso mare, ma le robe le jera scuminsià a canbiare. Sparì i fortini, paresà la spiagia, tuta ben agìbile e sicura, prime capane che i ciosoti piantava par conto suo e el “Clodia” che troneggiava su tuto l’arenile. Ma el divertimento no l’è più stà l’istesso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ghe vole pi corajo e speranza
Sicome le xe massa le robe che no va, bisogna farse corajo e vardare avanti, volere a tuti i costi che la se canbia, che no ’i sia senpre tenporài e tenpesta: chissà che ’l celo se stufa de “cicloni” e “anticicloni” e possa rivare finalmente el seren!
de Mario Sileno Klein
Robe de Ciósa
I primi stabilimenti balneari a Sotomarina
a cura de Angelo Padoan
|
