Da Lugo de Vicensa

La cóa de l’autostima

Carlo Van Vageningen

"Massa longo!" me ga ’ito el diretore el mese passà. E co na smenarotà el ghe ga tajà la cóa a l'ultimo "pezzo" ca gavéa inbarcà. Alora sucede che quéa che gera la cóa ’desso deventa la testa e, riciapando ’l discorso su i me scolari "special", la xe anca na bèa testa, quéa de Carlo Van Vageningen.
Davanti a sto cognome ve vegnarà da pensare come, secondo e co le parole de Gigi Meneghelo, ga pensà i apostoli quando che Gesù el ga fato sù on discorso on fià turbio:
"Ancora na s-cianta e me vedarì e n'altra s-cianta e no me vedarì pi parché vo sù da me Pare." "Cossa caspitina dìselo?" ghe mete in boca Meneghelo a i apostoli, pi che mai convinto che i parlasse in dialeto.
Parché Van Wageningen? Che discorso xelo? Parché el papà de Carlo el gera olandese, capo scalo a Tripoli de la KLM. So mama invesse la xe romana e la vive a Roma, ma Carlo ’l se la porta a svernare in Kenia e ogni 3 mesi el vien a trovarla a Roma. ma Carlo 'l se la porta a svernare in Kenia e ogni 3 mesi el vien a trovarla a Roma.
Quatro i ani passà da Carlo a scola con mi. Dopo l'è stà tuto on gironare in volta pa 'l mondo drìo i trasferimenti par lavoro de so papà. Tapa inportante a Roma, ospite de so nona, par la laurea in Economia a la Louiss e, dal 76 a l'88, inpegni de lavoro par la FAO a Roma, nel Benin e in Zimbabwe.
Da n'altra società, la FATA European Group de Torin, l'è stà promosso Dirigente a Nairobi in Kenia dove che ’l vive ormai da 30 ani.
Lì, atraverso na serie de atività inprenditoriali senpre pi inportanti, l'è rivà a costruire, vissin al lago Turkana, el pi grande parco eolico de l'Africa che se ciama Lake Turkana Wind Park (LTWP).
La xe stà na vera aventura durà 9 ani de preparassion e altri 3 par portarla a termine. Sto "parco eolico" l'è conposto da 365 pale pa' on totale de 310 Mw, 17% de l'energia del Kenya. Na roba che dire grandiosa xe ancora poco.
Par la verità se vedéa fin da i banchi de le Elementari che sto biondin svejo, curioso e inteligente el gavéa tanta sto fa bona e i fruti i xe davanti al mondo.
L'idea de ritrovarse a Roma a l'anuale raduno de i ex-aluni de la nostra scola de Tripoli anca co i so conpagni semenà da Gheddafi in volta par l'Italia e pa ’l mondo, la ga caminà so le strade de Internet e la se ga concretisà el 17 de giugno ’pena passà.
Ricordo che, al primo contato, me son sentìo dire tra l'altro: "Che belo, maestro, con lu no go mai studià!..."
Dopo par fortuna el ga zontà:
"... parché la scola gera come on teatro e no te podevi no stare atento e inparare."
Robe che funsiona se la suca xe bona!

[torna sopra]