Da l’Alta Padovana

Ciàcoe a spalio, vendemando

Verso ’a fine de 'a teefonada Nico ghe fa a Nani:
<<Te ghè dito che doman e domé­nega te tachi vendemare?>>
<<Par forzha! Ze ora, so’ mi-sòeo e st'ano ghe ze na maréa de ua che no sò gnanca mi cò finirò e indove métarla bujre!>>
<<Varda che doman-matina, a 'e oto in punto, so’ casa tua ’jutarte parché ghin’ò na ponga de star tuto ’l dì sentà su pa ’l conputer a lavorare so inpianti in projetazhion ché on bagno de natura no 'l poe farme che ben!>>
L'è rivà a 'e sete e meda, parfin co dó tanaje da cai, rancuràe casa de so pare.
Sarìa stà prestin vendemare gra­spi ’ncora inbronbài de agoazho, ma bastava darghe on scorlon a 'a visèa pa far cadire ’a pi parte de 'e jozhe.
El beo del vendemare ze che laoro e ciàcoe no ga coegamento e, pa passàr­sea, se poe parlare de coéo che se voe, anca de farghe dire el rosario a 'e òpare parché no ’e magne ’a ua, come che fazéa na volta zherti paruni càncari.
Nani e Nico i ze fiùi de contadini, che ga podesto studiare e Nico l'è inge­gnere chimico che ga na senplicità de spiegare robe difìzhie de chimica da restare imagài; però no a 'e oto de matina!
Difati, inpienando i seciuni de graspi, i ga tacà co l'agricoltura che ze drio ’ndare ramengo, co stae e vigniti pìcui che ze drio sparire ma-man che i paruni deventa veci, co tanti tusi dò­vani, anca de paese, che de canpi e de orto nu i sa pi gnente e, pur de no far fadiga de slevarse coatro gaine da ovo, on canpeto de sorgo pa mantegnerle e on tòco de orto, i ze disposti magnare ogni tipo de mas-ciarìa, basta che se possa conprarla.
’Lora Nico che progeta co sucesso inpianti conpleti pa pastifici e altro pa l'Italia e pa l'estero, el ga tacà contare che in zherti stati USA ze proibìo el pan integràe da coando che i se ga acorti de l'aumento esponenzhiàe de tumori al colon a causa de 'e sémoe de formento piene de veéni, doparài so canpi e silos; sòeo che ’lora ste sémoe i ghe 'e dà a 'e vache, inveenando ’a late che magna grandi e pìcui e semo senpre da capo. Dopo el ga contà del dissecante che i canadesi ghe trà so ’l formento (grano duro) pa farlo secare prima del fredo e dopo i ne o para-sù in Italia pa fare pasta e pan al glisofato. E quisti i ze fati che se conosse za e no terorisno!
<<Caro mio, – ze ’ndà ’vanti Nico – coesto ze ’l tenpo de 'a genetica e de 'a robotica! Ciapa ’e multinazhionài del magnare, che in futuro ’e vurìa farne parar-dò a tuti el stesso paston, come i mas-ci, se intanto gavaremo perso l'amore pa 'a tera neta e ’a cultura del coltivare. Dopo ciapa i industriài che vurìa robotizare tuto pa far laorare ’e màchine 24 ore al dì e ’assar casa pi operai possìbie! E mi ’o sò ben!>>
’Lora Joani: <<Sarà, ma a mi me pare che co 'l tenpo coesto el devente el suicidio del capitaismo. Te pui anca fare tuti i prodoti robotizài che te vui, ma dopo a chi ghi ’i vìndito se ’a jente disocupà no ga schei pa conprarli?>>
<<Go capìo mi! ’Lora bisognarà che ’a jente ricicle ’a so profession o che ’l Stato ghe daga el rèdito de citadinansa!>>
<<Ah sì! E co coai schei? Se ’e dite che produse rèdito co schei veri, porta ’a so sede legàe inte i paradisi fiscài pa no pagare ’e tasse coà, el Stato co cossa pàgheo sti "rediti"? Cu i schei del Monòpoi? E coanti ze che poe riciclarse co sucesso? Na socetà cresse ben sòeo se gira ’e paeanche che crea inizhiativa tra chi che fa e chi che consuma! E varda che ze za tuto scrito. In USA i sudisti ga perso ’a goera parché nu i pagava i schiavi -ché anca luri garìa podesto far girare i dolari-, i magnava i schei del coton, conprando siochesse in Europa, ma industrie gnente. Ga bastà el bloco navàe d’i nordisti da l'Atlantico su pa 'l Mississipi pa strangoearli. E dopo ’a crisi del ’29 come jèrea l'America? Puchi capitaisti passùi, magazini pjni, inciavài e tendùi, e miliuni de desperài che magnava a 'e mense de 'a carità: i "hobos" che girava da clandestini su i treni-merce in zherca de on lunario da sbarcare. E a Roosevelt no ghe ga bastà el New Deal pa far lavorare ’a jente che ghea bisogno e recuperare el benessere de prima del ’29, a i USA, pa tirarse-sù i ossi, ghe ga voesto ’a goera co ’l truco de farse sgrafare pa primi da i japonesi a Pearl Harbor parché el presidente ghea giurà, al secondo mandato, che lu pa primo no la garìa mai tacà.>>
<<Siché te vurissi dirme che senzha goera no ghe ze speranzha de sviu­po?>>
<<Varda! I cunti se fa presto farli! I dise che ’desso semo 9 miliardi e fra 50 ani i sarà in 12 miliardi. I dise anca che ’e bisteche costarà massa e che se magnarà cavaete, scarpiuni e sarpinti. Ma se ’l pòpoeo cresse magnando, caearà par forzha anca i scaravasi e ’lora chi che ga ’ncora ’a cultura del contadin, lavorarà ’a tera e difendarà a s-ciopetàe i so prodoti, chi che no sa far gnente, pitosto de morire de fame co 'a panzha voda che no te fa pi rajonare, de 'e volte el garà pi caro farse copare a s-ciopetàe e ’lora ’a sarà goera o rivoeuzhion totàe.>>
<<Zherto che, contà cussì, tuta sta storia ’a me par pitosto senplizhota!>>
<<Ah sì? ’Lora proa ti contarla pi articoeà in 60 righe!>>

[torna sopra]