|
Editoriale
Dovemo salvare la dona
Quando telegiornài e giornài, quasi tuti i giorni, i taca co notizie de violenza su le done, vol dire che semo so na bruta strada. Xe ora de afrontare seriamente el problema e de inpegnarse tuti, par far cessare sta guera infame de l’omo contro la dona.
Ciapemo l’ocasion de sto mese de Marzo che ghe vien dedicà na giornata a la dona, che oncora vien ciamà FESTA DELLA DONNA, par parlare de la so grave situazion.
In quasi tute le socetà la dona la xe senpre stà considerà sotomessa a l’omo paron. Anca te ’l nostro civile Paese, ghe xe stà on tenpo, no massa distante, dove la dona la dovéa saver far da magnare, tegnere neta la casa, métare al mondo e slevare i fiòi, curare i veci, laorare te i canpi, e… “vien qua che te dòparo” e basta! No la gavéa posizion de “comando”; catarse on omo e maridarse xe senpre stà considerà na necessità e on mezo par garantire a la dona el sostegno e la protezion.
On passo a la volta, se ga intravisto la possibilità de coalche canbiamento. A giozze, mai bastanza!
Ne i nostri Paesi industrializà, nel Novesento, se ga ’vù l’inpression che par la dona fusse rivà el momento de stare a la pari co i diriti de l’omo; questo, so la carta, ma no’ co i fati e, te ’l mondo del laoro, le difarenze le resiste.
I tenpi i canbia: el significato de fameja no l’è pi quelo de na volta; i valori xe nà in tòchi; la sacralità del matrimonio la xe nà in crisi; la vita de tuti i giorni la s’à fato senpre pi conplicà; marìo e mojere i ga senpre manco tenpo de vardarse inte i oci e manco tenpo de afrontare i problemi de la fameja insieme; el vegnerse incontro o el zercare de capirse, tra omo e dona, no ’l xe pi a portata de man; xe pi fàzile sentirse stufo l’uno de l’altra e viceversa: “go deciso de lassarte!...”, “… e mi te copo!”
Rivà a sto punto, passemo a la cronaca che la xe piena de sti casi de l’omo, bandonà da la dona (mojere, conpagna o morosa), che ’l deventa prima “persecutore” e dopo “omicida”, parché el xe oncora convinto che el potere el xe de l’omo! Co sta mentalità da strapazo, se presenta, dunque, el fenomeno de la violenza su la dona.
Solo nel 2020 in Italia xe stà copà 91 done: una ogni poco pi de tri giorni, e l’89% la ga catà el propio assassin in fameja. El “confinamento” causà da la pandemia no ga fato altro che “favorire” le ocasion de le barufe e de le tragiche conseguenze. No se pole lèzare sta triste statistica senza pensare che, solo in Italia, in sto XXI secolo xe stà copà 3.344 done. E la strage continua.
La strage continua parché resiste l’incoltura generale e soratuto l’idea de l’omo che pensa de avere el dirito de sbrigare da elo solo el raporto con la dona, anca quando el sconde la parola violenza, ciamàndola “molestia” che vorìa dire man fonfa o gesto palpagnin.
Da massa tenpo sta piaga sociale la xe quasi invisibile: el 96% de le done no denuncia la violenza subìa, forse par paura, par mancanza de corajo de acusare la persona che le ghe ga vossùo ben, forse parché le se vergogna e parché no ghe vaga de mezo i fiòi. Bisogna che le done le taca a urlare la verità che se sconde drio le porte e i muri de la so casa!
Xe nostra convinzion che sia rivà l’ora de vardare in facia la realtà e de darghe el so vero significato a sta FESTA DELLA DONNA, ricordando le done che subisse violenza da parte de òmani che no meritarìa gnanca sto nome.
I òmeni bisogna che i inpara a èssare òmeni e non bestie, scuminziando da i putèi, da la scola, da i divertimeni dove tanti tosi, a causa de droga, alcol e branco… i se trasforma in lupi. Se canbiarà el modo de pensare, canbiarà anca el conportamento: el corpo de la dona no ’l xe na roba da “doparare” o da distrùzare, ma da amare.
Ghe racomandemo a la dona de non “indurre in tentazione”, de no tirare a zimenti l’omo.
E a l’omo, de no èssare bestia, ma omo vero. Salvando la dona, salvemo anca l’omo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Dovemo salvare la dona
Quando telegiornài e giornài, quasi tuti i giorni, i taca co notizie de violenza su le done, vol dire che semo so na bruta strada. Xe ora de afrontare seriamente el problema e de inpegnarse tuti, par far cessare sta guera infame de l’omo contro la dona.
de de Mario Sileno Klein
Da la Bassa Padovana
Me zia Iseta
’Na dona de altri tenpi, co i piè par tera, ma i oci rivolti al celo.
de de Roberto Soliman
|
