Ciàcole visentine

I polastri de Tonezza
Xe passà pi de trentasinque ani da quando che go fato la me prima risserca stòrica, quea su la me fameja, jutà da un par de animali co le ale.

Na foto d’epoca del Centro de Tonezza.

Altra foto un fià pi vecia de Tonezza.

«Ti che ti si un brao toso!»
Tuto xe scomissià cussì, un giorno de caligo de i primi de dissenbre.
Tita ga sonà a la porta, mi so’ ’ndà a vèrzere e me lo so’ ritrovà davanti, co chel so soriseto e i oceti pìcoli, cinesi, da vero Dellai.
«Ti che ti si un brao toso!» Co ’l tenpo go inparà che, cò i te dise cussì, xe da scapare via, ma a l’epoca no ghe rivavo, lu ga da èssarse inacorto e el ga dito: «Viénto co mi a Tonezza a fare la storia de i Dellai?»
Tita Dellai gera el parente pi sinpàtico de me popà. Solo oto mesi pi vecio, praticamente i gera cressùi insieme da boni cugini, lu fiolo ùnico e me popà ùltimo de la so coà de fradèi parecio pi grandi, da pìcoli i zugava ’nte la corte de i Dellai, in contrada Santa Corona, a Longa.
La so vìsita, lo gavevo ben capìo, gera soratuto par védare come che la butava, mi e me mama, un paro de setimane dopo che de boto gera morto me popà Augusto.
Ma non se tratava solo de na premura, no, parché Tita, quea ricerca lì, el voleva propio farla, e farla ’desso.
El gaveva za deciso. Mi sarìa passà el dì dopo de matina presto a casa sua, parché bisognava passare a fondo l’archivio parochiale de Tonezza, par trovare l’ato de nàssita de so nono Giobatta e da lì risalire a i antenati Dellai, co la speransa tignùa sconta a malapena da Tita de trovare qualche conte o marchese tra i nostri avi, parché Tita el seitava a dire che chi ga el “De” ’ntel cognome el xe nòbile de sicuro.
El dì dopo co la vecia Fiat 127 che gera stà sua de me popà so’ rivà davanti casa de Tita. Go sonà el canpanelo e suito me xe aparsa so mojere Pasquina co dó polastri vivi rento un gabiotelo.
«Questi i xe par el pàroco – ga dito Tita, che nel fratenpo gera vignù fora. E davanti a la me boca verta el ga riscomissià – No savemo co chi gavaremo a che fare, ’scòltame mi, sti qua i ne verzerà le porte de l’archivio.
Li portemo vivi parché pole anche darsi che la perpetua la gabia un punaro e che la voja zontare i nostri polastri a i altri animali.
E senò vorà dire che ghe tiremo el colo e, fin che ti te te dè da fare co le carte d’archivio, mi posso jutarla a spenotarli.»
El discorso de Tita no faseva na piega. No me restava che ciapare i volatili e sistemare in qualche modo el gabioto sul pavimento de la 127.
Co i polastri in man par na s-cianta me so visto cofà Renzo ’nte i Promessi Sposi, quando ’l va a domandare consilio al dotor Azzeccagarbugli, portàndoghe quatro caponi.
Xe inissià cussì na setimana de viaji su e zo par Tonezza, dove el pàroco, don Giuseppe Marcazzan, ne ga ospità co straordinaria gentilessa, fursi anca grassie a i polastri de Tita, suito sacrificài a fornèi.
Ghemo trovà raquante notissie de i nostri avi Dellai che dunque ga ’vuo orìgine propio da chel paese de montagna, mentre de la presunta nobiltà gnanca na parola, co un serto despiasere de Tita, che ’l ghe gaveva fato un pensierin.
Serto xe stà lì che me so’ inamorà propio tanto de la storia locale e del laoro de risserca ’nte i archivi, sgionfi de documenti pien de pòlvare e mufa, sì, ma carghi de notissie nove e interessanti.
De boto a l’Università so’ passà da lingue a lètere a indirisso stòrico, e xe stà la me fortuna.
Mi e Tita ghemo finìo la nostra aventura co la storia e l’albero genealogico de la fameja Dellai, el me primo de na serie longa.
E tuto grassie a dó polastri.

[torna sopra]