|
Poeti veneti
Lodovico Pastò
Poeta dialetale del ’700
A védare in Wikipedia (enciclopedia lìbara) l’elenco de i poeti che scriveva in dialeto veneto, in te ’a lista no ghe xe el “bagnolese” Lodovico Pastò, e questa la xe na mancansa proprio granda.
Serchemo alora de colmare sta lacuna, dando a i nostri letori el modo de cognóssare un poeta “minore”, ma senpre de granda sostansa, almanco par noantri veneti.
Lodovico Pastò xe nato a Venessia-Mestre el 14 majo del 1745, fiolo de Andrea, pitore e servitore devoto de i conti Widmann che i gavarà na parte inportante in te le viçende de la so vita “bagnolese”.
Tanto el gera de casa so pare, Andrea Pastò, che i conti ghe ga dà anca na man par far studiare el Lodovico che se ga, cussita, podesto laureare in Medisina, a Padova, el 20 de agosto 1767.
Ani dopo, quando i Widmann, se ga trasferìo in te ’a nova Vila de Bagnoli, i se ga portà drio anca la fameja de i Pastò, e Lodovico ga cussita podesto scuminsiare la condota da mèdego del paese (1744) fin al 1806, quando Qualcun in Alto lo ga ciamà par senpre (15 majo 1806).
Oltre che èssare un bravo mèdego da ’e cure orisinài (ghe piaseva curar la freve co ’l parsuto e ’l vin bianco), Lodovico Pastò xe stà anca un fior de poeta. Forse par solevarse da la tristessa de la so condission de dover curare i malani de la zente, el se divertiva a scrìvare poesie in dialeto, in tanta parte spiritose e scherzose.
Solo rente a i so ultimi ani el ga pensà de rancurarle tute in te un libro, che però no ’l xe riussìo a védarlo stanpà par via che ’l xe morto prima.
De poesie, Pastò, el ghe n’à scrite davero tante e, par chi ghe piasarìa lèsarle, se pol trovare un bel libro, publicà dal Comune de Bagnoli de Sora, dal titolo “Poesie del dotor Lodovico Pastò”, ano 1982.
Tanto par dare un esenpio, metemo chi soto un soneto autobiografico e n’altra conposission dedicà a na fantolina…
RITRATO DE L’AUTOR
Picolo de statura e forcolin,
Negro de cavegiara tempo fà,
Ochio da gato, naso intabacà,
Tinta de tera d’ombra, e zalolin.
Amigo cordialissimo del vin,
In amor al’estremo sfortunà,
Né mai per questo un poco desgustà,
Ma pien a tute l’ore de morbin.
Conveniente, e discreto quanto un frate,
Sobrio co no i me dà gnente da cena,
Gravio de molte idee; ma tute mate.
Amante de Poesia, ma senza vena,
Curioso assae de più de dona Cate...
No posso farme megio co la pena.
RITRATO DE NINETA FANTOLINA
Picoleta,
Ma furbeta,
D’un perfeto
Bel tagieto,
Cavei d’oro,
Ochio moro,
I colori
Late, e fiori,
El bochin
Da bambin,
Denti bianchi,
Peto, e fianchi,
Le manine
Bombasine,
I penini
Balerini...
Tuto belo,
Tuto quelo,
Che pol dar,
Che pol far
Con bravura
La Natura.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Volemo canbiare el mondo?
La xe na domanda che ga tormentà l’omo de ogni tenpo. Par na rason o par naltra, el mondo de oncò el xe drio passàrsela maloto. Ocore intervegnere. Ma come? Forse partendo da quelo che n’à insegnà la pandemia, canbiando el córe e la cossienza.
de Mario Sileno Klein
Poeti veneti
Lodovico Pastò
Poeta dialetale del ’700
de Fiorenzo Zampieri
|
