Da Ponzano Veneto (TV)

El fotografo anbulante

1955. Mi a Jesolo.

Mi co ’l fiolo del fotografo.

Questa xe la storia de ’na fameja de fermi, sarìa a dir zente co fissa dimora, no come i driti che no gaveva stabilità, fin che no xe rivà i ani ’60.
Se tratava de ’na copia de sposi co dó toseti, mas-cio e fémena, che stava su un paeseto vissin Treviso; ’lora se gera ne i ani Sinquanta, ani che gavarìa se­gnà un canbiamento par tuti, dopo la Seconda Guera Mondial. Massa pìcolo el paese par garantir un bon lavoro e ’na vita dignitosa a quela brava fameja, che cussì se ga tirà sù le màneghe e se ga dà da far.
El pare ga ’vùo ’na pensata che co ’l tenpo ga mostrà el so valor; forse la ghe xe vegnùa có el nostro Luna Park se ga postà su quel ciòrolo paeseto; l'omo, vardando e pensàndoghe sù el se ga reso conto che in ocasion de la legra anual par el patrono, ’rivava ’na maraja de zente: tini mucini, pischerle, barorài o mèjo dir sioroti, gagi e tanti altri. Insoma el gaveva capìo che par l'ocasion gera presente tuto el paese e tuti gera disposti a spèndar e spàndar pur de straviarse e desmentegar le ro­gne e le brighe; cussì el se ga dito: “Parché no far fotografie a la zente che va a divertirse a le giostre?” Convinto che el gavarìa podesto ’ver un bon guadagno el se ga organizà de tuto punto e co la mujer el ga dà el via a la so aventura de fotografo anbulante.
El capitava tante volte dove che po­stàvimo el nostro Luna Park, el se me­teva proprio a l'entrata, da dove pas­sava par forsa tuti i cusistà; el gaveva un trapiè alto un paro de metri che se podeva piegar, dove el picava, par mo­strarle, tante fotografie de zente con­tenta, fate in altre sagre, in maniera tal da far védar cossa el gera in grado de far e che risultati se podeva spetarse.
Natural che le fotografie fusse in bianco e nero, par via che el color an­cora no se usava par la dificoltà de la­vorassion e parché el jera massa caro de presso. Co so mujer, el rivava in Ve­spa de matina bonora co tuto el so ar­mamentario che la dona, sentada su la sela da drìo, tegneva su le spale; ’na volta sistemài, l'omo ciamava a gran vose i clienti e mostrava i so capolavori. Se podarìa domandarse come el jera in grado de consegnar la fotografia a i racli paesani che se gaveva fato imor­talar su lastre de arzento, visto che fe­nìa la sagra tuti ’ndava par i fati sui; no se parlava gnanca de far ’ndar i clienti su la so botega a tor la fotografia, fata magari a co i cei co la morosa, par via che quasi no ghe jera mezi de trasporto e co la bicicleta più de tanta strada no se podeva far.
El problema però ga ’vùo la so solus­sion: l'idea xe vegnùa e cussì i ga pensà che se le fotografie fusse stà fate a la matina presto, l'omo gavarìa podesto tornar nel so laboratorio co la Vespa e tornar in tenpo par consegnarle prima de mesodì, po’ se i scati fusse stà fati nel primo dopodisnar el gaveva el tenpo de tornar da novo in laboratorio e prima de sera portar el lavoro conpìo.
Anca se ghe jera da spetar qualche ora a tuti ghe ’ndava ben cussì, a quel tenpo pochi gaveva la machina foto­grafica e soratuto i tosati ghe tegneva a èssar imortalài co qualche bela tosa, magari conossùa proprio a le giostre e che, no de rado, sarìa deventada mo­rosa e dopo sposa.
El fato che i vegnesse drìo in prima­vera e in istà, de paese in paese, al no­stro Luna Park ga fato sì che se deven­tasse amighi; tante volte i magnava co noaltri, se ghe ofriva quel che smorfìvimo de solito. Lori jera ben con­tenti anca se i se portava un pranso poareto drento ’na gaveta, tipo quele da militar, parché sentarse su ’na tola soto la tenda davanti la carovana, in mezo a la natura, a l'onbra de àlbare e frasche tipo i canpegiatori de ancò, jera securamente mèjo che smorfir in piè o sentài su la Vespa. Noaltri giostrari se jera eterni canpegiatori.
Co ’sta copia de fotografi anbulanti se ga fato proprio amicissia tanto che dopo un pochi de ani, visto che i ga­veva fato fortuna e cronpà ’na botega de fotografo co l'apartamento de sora a Jesolo, e là i jera ’ndài a vìvar, i ga vo­lesto ricanbiar, anca se no ghe ne jera de bisogno, i piasseri ricevùi da noaltri. Xe stà cussì che, visto che a quel tenpo mi gavevo siè o sete ani e i diseva che jero tanto mingherlin e picenin par la me età e gavevo bisogno de mar par­ché l'iodio me gavaria fato ben, so’ stà ospità par dó o tre setimane da quela copia de fotografi che gaveva fra l'alro el fiolo più o manco de la me età, ga­vemo podesto cussì zogar e passar tanto tenpo insieme.
Po’ so’ ’ndà anca in montagna a Pol­pet da un me parente che gaveva qua­tro toseti senpre par rimétarme.
Par mi i xe stai periodi beli da no cré­dar e li ricordo co nostalgia; me par che i sia passài massa svelti e no i me gabia lassà el tenpo de rèndarme conto de quanta contentessa provavo. Tra ’sti bei ricordi ghe ne xe, però, uno che me fa cascar zo ’na làgrema: gera verso sera e mi co salvagente, secèo e paleta gero drio tornar par ’na stradeta verso la botega del fotografo, dove che stavo, quando co gran sorpresa go in­contrà me papà, che a difarensa del solito, che no el me badava, el me ga fato ’na caressa che me ga inpenìo de piasser e contentessa: jera la prima volta che me papà se ga fato védar afe­tuoso; no jera mai capità, ma ’na volta se usava a scóndar i sentimenti co i fioli. Ancora ’desso sento la mancansa de quela caressa e quel dolse ricordo me porta indrìo a rivìvar un momento ma­gico de la me esistensa. Quela fameja de fotografi xe stà no­stra amiga senpre, almanco fin che xe stà vivi i veci, po’ come capita i contati tra i fioli se ga fato man man più radi fin che ognun xe ’ndà par la so strada co la so nova fameja. De ’sti dó sposi bravi e insegnosi me resta el bel ricordo de la so onestà, de la so spontanea ospitalità anca se noaltri se jera de i driti, tante volte visti mal da i fermi. Jera, però, altri tenpi.

[torna sopra]