Da San Stèfano de Zimela (VR)

Parlemo de ovi

Eco on modo pratico per fare la spera.

I tosi i zugava co’ i ovi duri: i li batéa pian pianelo, ponta contro ponta.

El tòrcolo par fare i bìgoli o le lasagnone.

Eco “la barca de Sanpiero”.

Da le me parte in zerte parole la “o” la se pronuncia anca “u”: fiori-fiuri, tosi-tusi, siori-siuri, sposi-spusi, ovi-uvi. Eco, ’sta olta a voi-vui parlare un poco de i ovi-uvi.
I ovi i gavéa ’na bela inportanza in te le fameje de ’na ’olta. In tanti posti i jera come de i schei e i servéa in te ’na forma de barato a cronpare zerte robe in te le boteghe. Me ricordo che le done le nava da la Roma, che la gavéa la botega de generi alimentari, e i ghe domandava “un ovo de ojo” o “du ovi de zùcaro”. La toléa un méscolo, la pescava l’ojo da un pegnaton e la ghe lo versava pianpianelo in te ’na botilieta par pesarlo su la balanza. A chel tenpo tuto se vendéa sfuso e l’ojo se vendéa a peso e el zùcaro el se incartava in te ’na carta un po’ grosseta che la jera de colore blu.
A tore su i ovi a ghe jera i “ovaroi”, che i li cronpava e dopo i li portava in te i so magazzini par controlarli e laorarli. Sicome che a no se savéa mia quanto veci i jera, se provedéa a passarli uno paruno davanti a ’na luceta in te ’na càmara scura.
Cussita se vedéa se l’ovo el jera sbarloto o se se gavéa za formà el punzin, che ’lora i lo butava ’ia.
La me amica Licia la me contava che invezze a casa soa ’sta operazion la vegnéa fata par controlare se i ovi messi a coare soto la cioca i gavéa tuti el punzin in formazion o se i jera ciari. I ghe ciamava “fare la spera”, cioè co’ la speranza che tuti i fusse boni e nasesse tanti punzinèi. Quando che le done inpastava le lasagnone o i bìgoli da passare co’ el torcio, se la riceta la prevedéa zinque ovi, le ghin metéa du de veri e tri de aqua, par sparagnarli e dopararli par la zena! Par tanti mezzo ovo duro e ’na bela porzion de salata e pomodori conzà co’ l’asedo la jera el so magnare.
Noantri tosi de le ’olte a naséino a tore un ovo ’pena fato da soto la galina e ghe faséino co’ ’na ucia un buseto da le dó parte e dopo a ciuciàino forte. In ’sto modo se creava ’na depression e cussita, a pare inpossìbile, tuta la ciara e la bala le vegnéa fora e se le beèino… e dopo lo rimetèino udo, ma belo intato, in te ’l gnaro che dopo le done le se rabiava come bissi quando che le se inacorzéa.
La bala de l’ovo la vegnéa doparà anca par rinforzare i caveji de le done. Dopo averli ben lavà le li inpastava co’ la bala e, dopo calche tenpo, le li rasentava co’ l’aqua e asedo par torghe l’odore da freschin.
A Pasqua se cusinava i ovi duri e par darghe el colore verde i se faséa bòjare co’ drento la pegnata foje de ortiga; par chei altri colori se ghe metéa de la carta colorata.
El luni de Pasqueta da le me parte se nava in bicecleta in Zerpa, che la xe ’na zona bonificà indóe che se ga conbatù la batalia de Arcole.
Un zestelo de ovi, un fiasco de vin, de le asse da muradore par métarle vizzin e fare ’na pista da balo par balare co’ la musica de ’na fisarmonica e la festa la jera granda.
I tosi i zugava co’ i ovi duri. I li batéa pian pianelo, ponta contro ponta: se uno el se ronpéa el se lo ciapava chel’altro e se el gavéa l’ovo giusto el naséa a casa co’ la scorta par la zena de un poche de sere.
Quando che in casa a ghe jera calchedun che el jera débolo e patìo a se ghe faséa el sbatudin.
Se sbatéa ben la bala co’ el zùcaro e quando che l’inpasto el jera belo bianco a se ghe zontava vermut o cafè e se ghe lo dava co’ calche biscotin parché el se tirasse sù la petorina.
Co’ la ciara de ovo messa in te ’na bocia de véro piena de aqua e sistemà in mezzo a l’erba in te la note de San Pietro e Paolo a se faséa “La barca de Sanpiero” e da la forma che la ciara la ciapava a se faséa de le prevision par el tenpo, che de le ’olte i ghe indovinava mèjo de chele che i fa ’desso in te la television.

[torna sopra]