|
Da Lendinara (RO)
Ricordi de bocia: la me radio
A casa mia gavévino eà radio e mi me sentivo fortunà, parché al chel tenpo poche femeje ne gaveva una. Eà nostra, pozà incoste a un muro de la cusina, dessora de un pìcolo mòbie de legno, la jera la roba più 'nportante ca se trovava in casa.
Scoltàvino eà mùsica solo in zerte ore del dì, par non consumare massa luse 'lètrica. La 'npizàvino a ora de disnare par scoltare Capodistria, che ne la trasmission de i auguri a domanda, meteva in onda eà mùsica taliana più sonà a chel tenpo. Se scoltava anca el radiojornàe e, solo de sera, eà radio riciapava fià. Cussì dopo zena, sentà su 'e nostre careghe de paja, se ghe metévimo 'ntorno, in reijoso sienzio, par sentire cossa che i diseva.
Me pareva alora de védare el movimento de la zente e de védare anca le orchestre sonare, 'ntanto che na barca de paròe e mùsica vegneva fora da l'altoparlante.
Scuminziavo col menare el boton de l'interutore generàe par 'npizare la luse de la scala parlante. L'ocio màgico 'ntanto, el canbiava de colore, e le vàlvoe termoiòniche le tacava a scaldarse. Na menada anca ai botoni del comutatore de onda e de la sintonìa e, par finire, na regolada al volume e "voilà", partiva el spetàcolo.
"Amici vicini e lontani, buona sera ovunque voi siate" o se sentiva dire "va ora in onda da l'Auditorio della Rai di Torino la Sonnambula di V. Bellini" e noiantri a boca verta zolàvino con la fantasìa 'ndentro a le sale de trasmission, pensando senpre a robe nove.
Raquante volte, de sera, i mìi, par ripagarme de qualche bona azion, i me lassava zogatare con la radio. Jera queo el momento che el mondo 'ntiero vegneva in casa mia.
Doparando onde medie e curte, fasevo córare eà stangheta de la sintonìa da Londra a Lione e da Stoccarda a Mosca. Non se capiva on colpo de quel che i diseva, anca parché le paròe le jera 'ncavalcà, una dessora de chealtra, ma mi me godevo istesso a scoltare sto bacan mondiàe. Viajavo a la veocità de la luse e in un s-ciantiso 'ndavo da Rio de Janeiro a Tokio e da Ankara a Roma. Passavo dessora a mari e oçeani, scavalcavo montagne intabarà de neve e po' zo ne la panpas e me 'ngrumavo tra 'e strade de le grande metròpoi. Cussì 'nparavo mùsiche nove che le gaveva ande difarenti da le canzon taliane; mùsiche che eà nostra radio nazionàe faseva sentire poche volte.
Che bea goduria jera confóndare vozi e canti tanto difarenti tra de lori, doparando solo na pìcola manòpola. Sóni che de tanto in tanto i calava de forza, smorti, intortejà da sta confusion che creavo in chel momento. Prima de 'ndare in leto ghe davo ancora na menada a la sintonìa e, da na stazion distante na voze diseva: "Good Morning."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Lo ricordaremo par senpre
Ghemo caro lassare, a la pìcola storia del nostro giornale, na parola de rinpianto par aver perso un Santo Papa, el Papa de tuti
de Mario Klein
Memoria viva
La còmoda de me Nono Toni
Le me risserche in te la sofita de la casa vecia de fameja. La scoperta de robe antiche e interessanti. La còmoda me sbalordisse par la so inponenza. La filosofìa de me Nono sul come 'ndare de corpo
de Gigi Vasoin
|
