|
Da Isola Vicentina (VI)
Na tèpida sera d'istà
 |
| No gavarò tolto sù le stele alpine... ma a portata de man gavévino le nostre stele de casa... |
Da 'a càmara 'ndove da 'n po' se jèrimo ritirà, a mi e me mojere rivava ancora, sepur smorsà, le alegre ridade de i quatro amissi, che so na tèpida sera de fine lulio, me fiolo gavéa 'nvità.
Tuto gera filà via piasèvoe, mèrito de 'a calda 'tmosfera de sinpatìa che sti quaranteni co l'ànemo da toseti gavéa saèsto crear, fasendo rivìvare veci ricordi de marachele che in zoventù i gavéa conbinà. No xe mancà gnanca discursi de laòro co 'e so dificoltà, come quéa de spostarse in machina in mezo a strade senpre pi 'ntasà e pericolose. Nar rento in sità po', xe come catarse so 'n labirinto e dover pagar calcossa par vegnèrghene fora.
Ciapando a zolo sto discorso, me fiolo el ga dito che se in scarsela el gavesse ancora i schèi che 'l ga pagà de multe, el podarìa vìvare on bel po' sensa pensieri.
Spetando che 'l sono me portasse drio i so emi, la mente ga ricordà có anca mi me sentìa portar via calcossa có ciapavo de 'e multe no tanto ciare.
La prima volta xe stà che, 'passionà de montagna e de 'e so stele alpine, na bela domènega d'istà, montà in machina co me mojere e le nostre do tosete, semo partìi verso 'l Pasubio; rivà al "Pian de 'e Fugasse", so' proseguio so 'a Strada de i Eroi, rivando contenti al "Rifugio Papa". La jornata gera splèndida e n'arieta fresca ne caressava 'l viso, fasèndone sentir paruni de chel paradiso. Dopo 'ver zugà 'n po' co 'e tosete, me ga ciapà 'a voja de nar a stele alpine ('lora se podéa tòrghene sù fin a tre); fate on poche de galerìe, me so' portà fora so 'n spiasso e, findove l'ocio rivava, se podéa mirar chéa maraveja de valata che na volta jera ciamà la "Valle dei Signori".
Alsando i oci verso 'l celo, le go viste, sora de mi: tacà sù a 'e roce ghe jera 'n muceto de stele alpine. Puntando i pìe e raspando co 'e man, ghe so' rivà tacà, 'lora me so' inacorto che una gera bea grossa e slusente, propio come la Regina de 'e Dolomiti. Co na man me so' sicurà so 'n spunton de rocia, distiràndome pi che podéa, co chealtra go sercà de farla mia, ma el tòco de rocia ca me jero ciapà se ga destacà e, dopo 'n pìcolo zolo, na bòta so 'a schena e a ravoltoluni me so' catà so 'l spiasso da 'ndove gero partìo, fermo a puchi sentìmetri dal buron.
El male lo sentìa dapartuto, e so 'l pie che gavéa perso la scarpa, na feta de pèle se gera meza destacà dal calcagno. Sistemà a la mèjo ste magagne, so' tornà da 'a me fameja. 'Pena che la me ga visto, me mojere se ga 'npressionà, parché a gavéa na sièra tanto trista. Strenzendo i denti, come so 'n bruto sogno so' rivà so 'n paeseto 'ndove, so na strada streta, me so' catà davanti na mama che urtava na carossina co rento na toseta. Na s-cianta ghe so' stà dadrìo e po', no vedendo nissun, la go passà.
La polissia me ga fermà e a gnente ga valesto le me spiegassion, par luri dovéa star dadrìo de 'a carossina e... go dovesto pagare la multa.
Sernendo nantra storieta che me ga portà a la multa, ve conto...
Gera na festa de otuno có verso meodì, dopo èssar stà a messa ultima, me messiere Gidio me xe capità in casa pa' bévare 'n giosseto e, come 'l sòito, el se ga fermà a magnare co nantri. Gera 'n spasso sentirlo contare 'e so storie, tanto che i me quatro fiòi i restava 'ncantà scoltarlo. Cossita, có xe stà ora de conpagnarlo casa, so 'l furgon ga volesto montar sù anca luri insieme a so mama.
Fati tresento metri, so l'incroso de via Rosela, la polissia stradàe me ga fermà. Dopo 'ver dimandà libreto e patente, uno me dise che so' in multa parché no go inpissà i fanài. "Beh - digo mi - se xe par ste robe, gnanca quéi che passa 'desso i ga i fanài verti"; a sto punto chealtro el spiòcia rento 'l furgon, disendo: "Assomigliate a una carovana di zingari, dove andate?" Me so' sentìo bòjere rento, però lu 'l prosegue: "So in che via abitate." E mi: "In via Europa."
"Bene - el dise lu - così le ritiriamo anche la patente, perché qui c'è scritto via De Gregori." Difati, da poco me gera rivà la carta dal Comune e spetava de 'ver 'l tenpo pa' fare el canbiamento. A farla curta, i me ga 'npienà on papir de verbale che me xe costà schèi e tenpo a no finire. Ricordo ancora la tristessa de chel piànzare amaro che sto fato ga provocà.
Esperiense che lassa 'l segno e che 'l destin a volte parecia sensa 'n parché.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
E 'desso... tuti a scola?
No lo prevede el disegno de lege del ministro a l'Istruzion, Mariastella Gelmini, ma 'l ne pare necessario, visto che tanti genitori i difende senpre so fiòi, anca quando che i ghe ne conbina de grosse, metendo cossì a ri-scio l'educazion de i fiòi stessi
de Mario Klein
|
