|
Da Adria
Là ’ndó coreva el Canalin...
 |
| Adria se specia so’l Canalbianco. (foto A.R.I.) |
Sta zona, col nome de Punta Canareo, adesso la riconosse solo quìi del mi andare o più veci; i zóveni i ne sa gnanca cossa che la fusse. Difati ormai no ghè più nissun segno che ’l possa ricordare el nome: l’è solo la fine de Corso Garibaldi, chel sarìa, po’, la continuassion de Corso Mazzini.
Na volta, quando gnanca mi me lo ricordo, al posto d’i Corsi coreva el Canalin, un ramo del Canalbianco completamente stropà dopo la fine de la guera, ch’i eva scuminsià a covèrzere tenpo indrìo, ma jera stà necessario lassar lì tuto, parchè i schei del governo i ’ndaseva via tuti par la guera.
Mi, tornando da l’Asilo Gregnanin – a l’època a ghevo quatro, sinque ani ? có rivavo dessora dal ponte d’i carabinieri, a la fine de via Terranova, che ’l scavalcava el Canalin, o mèjo quelo ch’a ghe restava, unendo le do rive, mèse interà, me destacavo da la man de mi nono, andasevo zo da quela che la sarìa stà la spala e me rancuravo un loto de crea, quela bela scura color pionbo – la mèjo de tute ? e lo ficavo dentro in te ’l sestin de la marenda, par dopararlo a casa a fare robete diverse, un fià come i bocia de anquò ch’i spatocia co la plastilina.
Oltre el ponte, l’interamento el faseva védere parte del tonbinamento de piere, e più avanti solo i resti del canale che ’l feniva dentro inte ’l ramo più grande, lassando ancora ben in evidensa la punta. Quela jera Punta Canaréo, in italian Punta Canareggio, essendo ciamà cussì, da tuta la zente, tuto el borgo che s’inspeciava sora le aque ancora bele e corenti del Canale.
Jera fàssile védere lì intornovìa barche in costrussion, in riparassion o a cul par aria par èssere calafatà. No se tratava de un vero squero, ma de chelcossa de più modesto, specialmente par le dimension de le barche. Se tratava d’i batèi, barchete pìcole a fondo piato lunghe tre, quatro, sinque metri al massimo, co do punte, in pratica con do prove e sensa popa, che le se podeva mandare avanti int’un senso e inte quelo rovesso sensa girare la barca. Defati gh’jera du scalmi, uno par parte e bastava inpirare el remo de qua o de là p’r andare inte le diverse diression.
Par sto fato, mancava ’l timon. Regolarmente se remava in piè a mo’ de góndola. Ste barche le serviva par pescare col balansin o col tramacio opure p’r andare a cana e a caresina. I pessi più comuni i jera: tenche, rinati, sbari, pessine, caifa, qualche bisatelo.
I du racolti, cana e caresina, i vegneva lavorà lì sul posto. Gh’jera na fàbrica de grisole che rancurava sù tuto quelo ch’i ghe portava, trasformando i fassi de cane in ròdoli de grisole de varie misure che vegneva portà via da barconi grossi, che alora no mancava in Canale. La caresina invesse vegneva descargà su le rive, destirà a ventajo al sole a secarse int’i slarghi de Punta Canaréo, de la Riviera, d’i Sete Camini o de Borgo Forsato; dopo se faseva i balsi o s’inpajava careghe, el tuto davanti al medale de la porta, tenpo permetendo.
Jera un insieme de atività, la pesca, la racolta e la lavorassion de le erbe palustri, che consentiva a parece fameje de meter sù la pegnata e sbarcare ’l lunario anca s’a no gh’jera tanto da sguassare.
I canarói i jera brava zente, ma bisognava lassarli stare parchè i jera cofà i fuminanti: a stussegarli na s-cianta i s’inpissava subito e podeva saltar fora serte barufe co sighi, parolasse e tirà de sgréndene, se le jera tra done, co bòte da orbi fra òmeni, che per atività professionale i gheva senpre la brìtola in scarsela.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’ora de religion a scola che dà cussì tanto fastidio
La sentenza n. 7076 del Tar del Lazio, che esclude, ne i scrutini de fine ano, la valutazion par i studenti che frequenta l’ora de religion, xe l’ùltimo colpo gobo par scancelare l’insegnamento de la religion catòlica ne la scola
de Mario Klein
Memoria viva
El martire Ugo Bassi a Padova
’Na interessante conversassion co ’l Papà durante la guera. Le storie conplesse de la Republica Romana de ’l 1849. La ritirata de Garibaldi in mezo a la Italia co’ i garibaldini, Ugo Bassi e Ciceruacchio
de Gigi Vasoin
Da Adria
Là ’ndó coreva el Canalin...
de Sergio Bedetti
Da Thiene (VI)
El me paese: Sarsedo
... La parte alta del teritorio la gera tuta un’onda dolse de colinete e montesèi...
de Bepin Daecarbonare
|
