|
Da Verona
Un amor grando
 | | L’ùnico neodo che la gavéa un giorno el l’avéa spedìa al ricòvero con l’anbulansa, sensa gnan saludarla… (foto Gianmauro Mauri) |
Incroso la me amiga drio vegner fora da la farmacia. La me brinca de paca e la me mena inte un bar ’ndó ne sentemo, spetando che i ne porta el cafè.
“Stasìo mal?” ghe domando mi, sghimando la sporta piena de roba de la farmacia che l’à sconto soto el taolin.
La me varda co i oci lustri e, tirando sù col naso, la me buta lì: “No i è mia medisine ma mignògnole sensa sùcaro da regalarghe a na persona ansiana che la ga el diabete.”
“Ela na qualche to parente?” me informo.
“’Desso te conto” la me ribate e la taca con n’altra de le so storie.
“Donca, par Nadal vao inte na casa de riposo fora Verona a catar na me cusina a le lontane. Son lì che ciàciaro quando ne se ferma darente na carossina con na signora tanto ansiana che la se presenta come Sandra. La vardo ben e no me incorzo che l’è la me maestra de le elementari? La ga quasi sento ani, ma i oci e el soriso che sluse i è senpre quei.”
“Marisi, che coincidensa!” salto fora mi.
“Ben, l’è stà n’emossion che no te digo par tute do. Pènsete che quando me son sposà son nà a portarghe i confeti e ela la m’à regalà na toaja a scacheti blu e celesti conpagnà da un bilietin con su scrito ‘una pagliuzza per il tuo nido’ che me vien ancora da piànzar dopo 40 ani ogni ’olta che la vedo quando destrigo i calti. La n’à insegnà de tuto: a tegner neta la classe, a darghe la cera al paimento, a tirar zo teraine e pòlvar, a far el sorafil, a taconar i busi ne le calse, a petenarne con la coa o le tresse, a parlar con sestin, a no scagnarar come i mas-ci, a caminar con la schena drita e la testa alta, a farghe l’inchino a le personalità in vìsita a la scola... Ne le matine de magio la ne conpagnàa al Fioreto, a primaera la ne portàa ne i prè e la ne mostràa piante e fiori de tuti i segnati, la ne spiegàa l’inportansa de rispetar la natura e le bestie. La nostra classe la paréa na sèra con vasi de fiori, piantè da noantre butelete, patate americane coltiè inte l’aqua con le rame in pingolon da la càtedra e da i bancài de le finestre. La n’à insegnà a cantar ‘Fratelli d’Italia’, a pregar, a aiutarse, a volerse ben. Dopo che la n’à portà in quinta noantre l’è nà a insegnar a le medie parché la s’avéa laureà.”
“La me piase sta storia qua” ghe digo a la me amiga.
“Speta che te conta el resto” la me interonpe ela. “Donca, come l’è nà in pension, za diabética, l’à fato na paràlisi e, sicome l’era restà da maridar, l’era nà a star con l’ùnico neodo che la gavéa e che ’l paréa che el ghe volesse ben, ma che un giorno el l’avéa spedìa al ricòvero con l’anbulansa, sensa gnan saludarla e sensa farse più védar.”
“E par via de la roba dolsa sensa sùcaro?” ghe domando.
“L’è par ela che no la ga mia dindini par conpràrsela. Mi ogni tanto ghe la porto che almanco la ghe insùcara la vita anca se de sùcaro dentro no ghe n’è gnan un pel.”
“E par via de so neodo?” voi saver mi.
“La m’à mandà a sercarlo par domandarghe se, sensa volerlo, la gavéa fato o dito qualcossa che no naséa ben e de insìstar che el le perdonesse, parché sensa de lu l’era persa. Lu l’era a l’ospedal. Go riferì le parole de so zia e, pianzando come un vedeleto, el m’à dito che e i ga dà tre mesi de vita e che l’à tajà con ela par no farla sofrir ancora piassè a saverlo cosita malà.”
“E con ela come te l’eto cavà?”
“Ghe la tiro par le longhe, ma vao a catarla spesso con altre do-tre ex conpagne de scola e el seto ’sa la ne dise ogni ’olta che ghe capìtemo là?”
“Ragazze, la vostra presenza mi scalda il cuore!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
de Mario Klein
Atualità
“Il tempo è denaro”
de Luigi Frosi
Da Verona
Un amor grando
de Giacinta Dall’Ora
|
