|
Robe de Ciósa
I ziòghi de ’na volta
 | | Bambine che ziòghe al famoso “campanon” in te ’na cale de Ciósa (da S. Dell’Omo, “Chioggia”, Ed. Invicta, Padova, 1977). |
Sicome ò visto che nel nùmaro precedente dó de i nostri colaboratori ga tratà el tema del ziògo, me ze vegnùo in mente che, in apendice al mio tèrzo libro de poesie intitolà “A dó man”, stampà nel 1996, avevo dedicà diverse paginete a i “Ziòghi e a le filastroche de ’na volta a Ciósa”. No podendo, per motivi de spassio, publicare tuto el testo, sercarò de fare un riassunto.
Premessa: i ziòghi praticà ’na volta da i fiòi e da le fie de Ciósa gera sopratuto ziòghi sémprici e colegà a la tradission giocosa locale oltre che a i usi e a i costumi de i bambini nel corso de le varie epoche. Limitemo la riserca a i ziòghi infantili che se fasèva da la fine de l’800 fin a i primi ani del ’900. Se zioghèva quasi sempre ne le cale, ne i campièi, ne i cortili de le case. Ghe gera ziòghi praticà solo da i mas-ceti e ziòghi praticà solo da le femenete, anche se sèrti gera comuni sia a l’uno che a l’altro sesso. Sèrti gera compagnà da spessiali filastroche che scandiva el ziògo o da spessiali “formule” che faseva parte del “regolamento del ziògo”. Se trata, oviamente, de ziòghi che i fiòi de adesso gnanca no cognósse e che se pratichèva fin a ’na sinquanténa (o anche de pi) de ani fà. Mi ghe n’ò contegià ben 63, anche se qualchedun ze ripetitivo de ’n altro.
Ziòghi de i mas-ci
Alto de tera: se ziogheva in quatro o sìnque fiòi. A un sèrto punto uno de lori disèva: “Alto de tera!” Tuti serchèva de montare su un scalin o su un balconsin o su qualche posto in modo da stare solevà da tera. Chi che no ghe la fasèva in tempo utile perdeva el ziògo.
Pirolèla: ’sto ziògo se ciamèva cossì perché se usèva un tòco de fero o altro che gera posà sul palmo de la man destra: ghe se fasèva fare ’na sorta de giravolta (èco perché el nome, che in italian vuol dire “piroetta”) e po’ a se lassèva cascare in tera. El ziògo dopo se complichèva perché se posava el tòco de fero sul dorso de la man, a pugno serà, e po’ su cinque, su quatro, su tre, su dó e infin su un déo solo. Mondo difìssile gera po’ far fare ’na giravolta, posàndolo su la pónta del barbusso, sul naso, su la fronte, su la testa. Per finire el ziògo, se serchèva de piantare la pirolèla per tera: se uno se falèva, a ghe lassèva campo libero a l’aversario. Chi finiva per primo l’operassion, vinsèva la gara.
Buso patàfia: ziògo forse unico a Ciósa. A se fasèva co la créa: i fiòi parecèva ’na sorta de scuèla dal fondo sotile; la se butèva co forza a la rovèrsa a tera. Chi fasèva saltare el fondo a causa de l’aria compressa a l’interno disèva: “Buso!” senò se fasèva “patàfia” (falimento) e se perdeva la sfida col compagno.
La capitale: a gera un ziògo che se fasèva co le balete. Su un quadrato segnà per tera, a ogniuno de i quatro angoli se scavèva ’na picola buséta e una al centro. Bisognava per vìnsare “conquistare” le sìnque buséte, eliminando dal campo de ziògo, colpendo co la propria baléta tirà col déo grosso e il medio de la man, quela de l’aversario. La “capitale” gera, oviamente, la buséta al centro.
Carèga sanpòlo: el ziògo veniva fato da dó fiòi che incrosèva i brassi formando ’na spèssie de carèga e de sóra se sentèva un altro compagno e a se portèva in giro cossì per un poco de tempo.
Monte créssa: un fio stèva in pie co le man posàe al muro, altri tre stèva cufài (= curvi) uno drio l’altro e un altro ancora, distante sinque passi, saltèva sóra la vita del primo, disendo: “Isso, isso, caval montaisso – caval de Verona – che sièghe la górna, la górna de ’sti ossi. Quanti zé-i ’sti becalòssi?” E a segnèva co i déi un nùmaro: se el fio, che stèva sóto, indovinèva, a ghe lassèva el so posto al perdente.
Massa e pandòlo: a gera quelo che in italian se ciame “gioco della lippa”. El pandòlo gera fato da i stessi fiòi co un bastonsin de legno apuntìo a le dó parte. Bisognava farlo “volare” in aria, dando un colpo séco a una de le dó ponte co ’na massa (= mazza) fata da un baston, butarlo in alto e po’ colpirlo da novo, al volo, e mandarlo el pi distante possibile. Vinsèva chi lo butèva pi lontan.
Tanéte: a gera un ziògo praticà anche da i òmeni. I fiòi scavèva do buséte, le tanéte, distanti un metro una da l’altra, e i serchèva dopo de “andare in busa”, dàndoghe de i colpéti a de le baléte fate de sasso o de teracota. Vinsèva chi per 24 volte riussiva a butare la so baléta drento la tanéta.
Bèle statuìne: in ’sto ziògo bisognava stare fermi e imobili come statue co le man incrosà. Prima de fare questo, i fiòi cantèva ’sta filastroca: “Ati mestieri muti, sì, – rìdare sì – parlare no! – Un, due tre, - no’ posso pi parlar. – Ah, ah, ah!” Bisognava solo fare qualche movimento co la testa o esprìmarse come i muti.
Zioghi de le fémene
Le pùpole: le gera le bambole, ziògo preferìo da le fie. Le gera de pèssa, fate co veci tòchi de stofa vansà da le mame, a forma de bambine o de signorinete, a volte anche ben vestìe. Le bambine le cunèva, le ghe cambièva i vestiti. Pi tardi ze stà inventà le bambole “parlanti” che mandeva un suono muovendole, simile a quelo de un bambin pìcolo. El viso, le man e i pie se fasèva in rilievo a colori.
Nèspi nenèspi: no se sa che origine èbia ’sto nome. Le fie lo pronunsièva, fasendo un ziògo de grupo. La tiritera fasèva cossì: “Nèspi, nenèspi, nèspi, nèspi tu; luca, laluca, luca, luca, tu”. Cossì disendo le caminèva su ’na spèssie de riga opure i usèva la tiritera per fare la conta opure le se batèva el polso de la man contro quelo de la compagna. E cossì le fasèva tanti giri fin che le gera strache.
La pièra scónta: a gera un ziògo praticà solo da le bambine. Un grupo de bambine fasèva la conta per védare a chi de lóre ghe tochèva scóndare ’na piereta. Quela che ghe tochèva la scondèva ne i posti pi strambi e dopo la se presentèva a le compagne de ziògo perché le se metesse a sercarla. Scoperto el posto co la piereta, el ziògo continuèva co altre bambine.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pecà che la Tv no sia pi coela
Quanti sogni, quante speranze la ga fato nàssare la “nostra” Television. Quanto materna, maestra e formativa che la xe stà, ciapando in man na socetà vegnù fora da poco da la guera. ’Desso, però, no la xe pi coela…
de Mario Klein
Atualità
“Il tempo è denaro”
de Luigi Frosi
Da Verona
Un amor grando
de Giacinta Dall’Ora
|
