|
Da San Bonifacio (VR)
“I Quaderni di Coalonga”
Storia de ’na publicazion de contrà, nata par scomessa e che la resta senpre viva anca se la crisi la sta sofegando un progno de premi de poesia e tante altre iniziative de natura cultural
 | Copertina de l’ultimo de “I Quaderni di Coalonga”, 2014.
|
Al dì de ancò i è tanti chei che va predicando che co la cultura no se magna e alora… via!... butémola te le scoazze. L’è come dir: mèjo slevar la panza pitosto che ’l çervelo! Cossì el nostro Paese che de la cultura el faséa la so bandiera e el so bilieto da visita, el vede deventar senpre pi slaquarizzo el so DNA.
Ghemo butà a le ortighe el latin e i lo ga arbinà i Africani che i lo sta insegnando in calche so Nazion, parché i ga capìo quanto la vèrze le teste sta lingoa e come la juta a scrìvare da cristiani e soratuto a resonar… Ciò! A l’era massa difìçile e duro el “rosa-rosae” pa’ i nostri butèi e infati stemo vedendo come i dòpara ’desso la gramàtica e in che talian i scrive!
De la television no stemo gnanca a parlar: solo balon, film che no ve digo, politici che barufa cofà cani e gati e desgrazie a no finir, tanto che par catar un programa cultural bison far el giro d’Italia de i canài… se po’ te lo cati! Figurémose, po’, che la parte del leon la la fa… la publicità!!!
La Coalonga del me paese l’è ’na contrà che par la cultura l’è ’n’isola felice. Se trata de un gropo de persone che vintisiè ani fà le s’à catà te la taverna de ’n amigo e come i carbonari le ga architetà de far calcossa par la comunità. Le ga pensà infati de publicar un libro che contasse la storia del paese, de la so zente, de le so tradizion… Cossì, tra un bocon de polenta e bacalà e l’altro, è stà progetà el primo Quaderno di Coalonga de la serie: un libro de poche pagine e co de le bele fotografie de ’na olta.
Visto el risultato, diversi “sponsor” (vero ossigeno par le iniziative!) i ga vossù dar ’n aiuto e cossì se ga invià la serie che sto ano la vedarà el ventisetésimo nùmaro. Scuseme se go contaminà el dialeto co chela parola inglese che ormai dòpara tuti, gavarìa podù scrìvar “responsori” come li ciamava a la so maniera uno de la nostra contrà, ma penso che pochi gavarìa capìo de cossa se tratava.
Bisogna però no desmentegarse che le spese de le publicazion i è sostegnùe in gran parte da la zente che regala el so tenpo e ’l so suòr a la contrà, e che vendendo angurie, gelati e cusinando risoti, ànare, mortadele, panzeta, patatine e altro, i se sacrifica tuta l’istà par tegnèr verto el chiosco tuti i dopomagnà e tuti i dopoçena.
La sera de l’ultimo sabo de lujo vien presentà ogni ano el novo Quaderno. El piazzale del chiosco el se inpiena de zente che vien sia par el libro che par gustar el famoso minestron, che el Comitato Coalonga l’ofre a tuti chei che i è presenti par l’ocasion.
Ani fà la ramina la tegnéa mileçinqueçento minestroni e par smissiare i coghi de turno i doparava un remo de aluminio. Co ’l ’nar del tenpo la pegnata l’è stà segà a metà e ’desso de minestroni la ghi ’n tien çinqueçento. Comunque senpre un bon nùmaro!
Prima de la sera de la presentazion, le done del Comitato Coalonga le riva al chiosco ogniuna col so passaverdura personal e le provede a passar la verdura , lassando da parte i fasòi, che i è boni intieri.
La cerimonia de presentazion la vede la premiazion co ’na targa par chei che scrive par la prima olta te ’l Quaderno, po’ i responsabili de la Redazion i parla de la nova publicazion e de chel che la contien. Come el proverbio che dise: “Prèdiche curte e paparele longhe”, a un çerto momento calchedun vien a informar che ’l minestron l’è belo pronto par èssar servìo e alora tuti i presenti i se senta a tòla co gran sodisfazion.
Par che parlar de misentron la sia ’na roba che stona co la presentazion de un libro, ma ve dirò che ’l tira come el Quaderno e se chela sera ghè tanta zente l’è anca par merito suo! Comunque el fa parte de ’na tradizion che dura da vintisète ani co chesto e donca l’è deventà anca lu storia e tradizion de la contrà.
Ghè ci ga tuta la serie de i Quaderni e chei che ghe manca calche nùmero: sti ultimi i deventa mezi mati par çercar de strupar el buso. Ani fà ghè stà anca de chei che ofriva ’na damejana de vin o ’na sopressa par aver el nùmaro che ghe mancava…
Tanti i riva da distante par recuparar la storia de le so raise: i è Sambonifacesi emigrà in tante parte de l’Italia, ma che vien anca da delà de l’Oceano e come che i torna contenti a i so paesi có i ga otegnù chel che i çercava!
Mi ghe son in tuti i nùmari co le me poesie e i me articoli de la tradizion e no ve conto la sodisfazion de èssar léto sia da zente “studià”, come se usa dir, che del popolo.
No se sa quanto la seitarà a slongarse ancora la serie de i Quaderni, ma penso che fin che sarà in funzion el Comitato Coalonga, el chiosco co tute le persone che dà ’na man, i “responsori” (come li ciamava chel de la nostra contrà) e naturalmente chei che scrive, la contrà la se animarà l’ultimo sabo de lujo de ogni ano par presentar la so nova creatura. E a far da tirante ghe sarà ancora, come senpre, anca el minestron de la tradizion!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Tuti ghemo la nostra crose...
Ghe xe la piena convinzion che la “crose” la xe una de le poche robe, se non l’unica, che no la ghe manca a nissun omo. Par colpa de Adamo o par colpa de Eva, questa sarìa la condana de tute le creature che xe vegnù e che vien al mondo.
de Mario Sileno Klein
Da San Bonifacio (VR)
“I Quaderni di Coalonga”
Storia de ’na publicazion de contrà, nata par scomessa e che la resta senpre viva anca se la crisi la sta sofegando un progno de premi de poesia e tante altre iniziative de natura cultural
de Enzo Coltro
|
