|
A pensarghe ben…
De drìo de ’a porta
 | | El jera rivà a trovarse davanti ’n’altra porta… |
“So’ stà so un posto dove che ghe jera tanta luce”, questo se sente dire da pi persone che ga avùo a che fare co’ fati tragici e che ga subìo un forte trauma fisico da farli restare privi de ogni senso.
I sienziati, quei che studia ste robe, i dise che el xe un stato mentàe so ’l quae se se vien a trovare quando che capita ste situazion; ’na roba, par jori, del tuto normàe.
Però go conossùo persone che no eà pensa cossì e i dise che eà sienza poe rivare fin a un serto punto e dopo ’e poe èssare soeo ipotesi.
’Na persona che conosso ben eà me ga contà par fio e per segno, cossa che ’l ga visto e sentìo dopo un forte trauma che lo ga ’assà par tera qualche minuto.
El me diséa de èssarse trovà davanti ’na porta, de averla verta e de èssare stà come abrassà da tanta luce. Dentro, de drìo de ’a porta, ghe jera dó fie de persone, tute vestìe de bianco, che no parlava ma ghe soridéa e paréa che ’e fusse là par spetarlo. De sotofondo se sentìa ’na musica e pi distante, un coro de tositi. Ste do fie de persone ’e jera longhe che paréa no finire mai. A un serto punto ’e persone sparìa e tuto intorno se vedéa un paesajo co tante rose spanìe e àlbari in fiore e un profumo da fare incaponare eà pèe.
E dentro de éo el sentìa ’na pace e un equilibrio che no ’l gavéa sentìo mai. No ’l gavéa pensieri de nessun tipo e no ’l se sentìa stufo. El gavarìa voesto, so chel momento, abrassare el mondo par el ben che ’l provava par tuto queo che ’l jera drìo vìvare. El sentìa ’na sensazion de apagamento, de armonia interiore. No ’l capìa dove che ’l jera, ma no ghe intaressava pi de tanto parché el jera so un posto che eó faseva stare ben, in tuti i sensi.
Intanto el caminava ma no ghe paréa de tocare gnente co’ i piè; eà luce se faseva senpre pi forte e el jera rivà a trovarse davanti ’n’altra porta e propio quando che ’l gaveva eà manilia in man par vèrzarla, ’na vose eó ga ciamà e el se ga trovà par tera co’ de ’e persone intorno che ghe faseva domande so come che ’l stava.
Subito dopo xe rivà l’anbueanza che eó ga portà in ospedàe.
El me diseva che ’desso chel periodo bruto xe passà, ma no ’l podarà mai desmentegarse de queo che ’l ga vivesto.
Chissà, forse ’na domanda so cossa che ghe xe dopo sta vita, se ’a semo fata e parché no poe èssare vero che ghe sia ’na tae beéza? Parché no poe èssare proprio vero che, de drìo de ’a porta che no ’l ga verto ghe fusse eà imensità de Dio?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Tuti ghemo la nostra crose...
Ghe xe la piena convinzion che la “crose” la xe una de le poche robe, se non l’unica, che no la ghe manca a nissun omo. Par colpa de Adamo o par colpa de Eva, questa sarìa la condana de tute le creature che xe vegnù e che vien al mondo.
de Mario Sileno Klein
Da San Bonifacio (VR)
“I Quaderni di Coalonga”
Storia de ’na publicazion de contrà, nata par scomessa e che la resta senpre viva anca se la crisi la sta sofegando un progno de premi de poesia e tante altre iniziative de natura cultural
de Enzo Coltro
|
