|
Da Arzergrande (PD)
Piove
 | Bisognarìa fare novi scói ’ndove che l’aqua possa ’ndare…
|
So sto momento fora piove. No eà xe ’na novità!
Semo moji sbronbà. Eà xe ’na frase che diseva anca me popà quando che ’l tornava da i canpi, sorpreso da un sguasson de piova. Ma eòra i jera fati ocasionài e oncò, invesse, sta roba fa parte de ’a quotidianità. Serve córare a i ripari e no soeo in senso figurà ma anca in senso de prevenzion, par queo che riguarda el teritorio, che, par un motivo o par ’n altro, el se ga deteriorà.
Coando che un dente fa mae de continuo bisogna ’ndare dal dentista, che ’l fassa qualcossa. Se invesse el se ’assa là, in qualsiasi ora se poe sentire malstare, anca so ’l resto del corpo. Cossì xe par eà natura. ’Desso che se xe riussìi a capire che questo de ’a piova el xe un problema serio, bisogna tirarse sù ’e màneghe fin el gumio e darse da fare un fià tuti. Eà bonìfica de i fiumi eà xe eà prima roba. Subito dopo o contenporaneamente, bisognarìa fare novi scói ’ndove che l’aqua possa ’ndare o creare comunque de ’e zone, de i canpi lìbari, ’ndove che l’aqua, verzendo de ’e chiuse predisposte so i fiumi eà possa defluire, so i momenti de piena, senza ri-sci par ’e persone.
Mi parlo, eò sò e tanti farà come mi, convinti che queste ’e sia de ’e soluzion. So ’l nostro pìcoeo vedemo ’e robe so eà logica del ragionamento s-ceto. No pensemo che no xe pi el tenpo de ’na sènplice streta de man par un acordo.
Oncò ghe voe carte sora carte e tinbri e permessi vari. No eà voe èssare ’na poèmica, eà mia xe soeo ’na constatazion de quanto che semo incatijà so ste robe che, se da ’na parte ’e garantisse un serto rispeto de ’e règoe, da st’altra ’e inpedisse che el tenpo, par espletare ste pratiche e quindi far sì che i lavori scomissia, el sia poco da spetare. Intanto passa i ani e eà situazion se cònplica.
El teritorio intaressà el deventa senpre de pi e me dà come l’inpression che, un fià a eà volta, l’Italia sia drìo deventare come un formajo co’ i busi. Chi pi chi manco, tuti ghe ne gavemo fato ’e spese e a qualcuno eà ghe xe ’ndà anca pezo. Ma gavemo fiducia so’ ’e istituzion. Se auguremo, par el ben de tuti, che i fassa presto. Intanto anca noialtri, so ’l nostro pìcoeo, podemo fare qualcossa. Chi che àbita in canpagna come mi poe tegnere snetà el so tocheto de fosso e chi che àbita in sità poe tirare via ’e foje da i tonbini. Insoma, tanti pìcoi gesti che, messi insieme, poe dare vita a quea che se ciama prevenzion, par fare in modo de riussire a vìvare senza pi chea preocupazion e chel senso de malstare… Intanto, fora piove…
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Conbàtare la fame nel mondo
Quando se xe in tanti a pensare e a voler fare la stessa roba, de sicuro chela roba la vien fata. Fin al 31 de otobre, semo tuti ciamà a riflètare sul problema de la fame nel mondo, co l’aiuto de l’Esposizion mondiale de Milan, che riguarda apunto l’alimentazion e l’educazion alimentare.
de Mario Sileno Klein
Quatro Ciàcoe in luto
Ciao, Enzo Coltro!
Demo notizia, con profondo dolore, de la morte del scritore, del poeta, del generoso cultore del “fare par i altri”, nostro colaboratore e amico, studioso de le tradission popolari, apassionà del dialeto veneto e de i valori che ’l rapresenta.
de Mario Sileno Klein
Da Thiene (VI)
La dressa
Fare la dressa: un lavoro che serviva par ’vere qualche franco in più par sbarcare el lunario
de Bepin Daecarbonare
|
