Su la via de le spessie

La vanilia
Profumo de Paradiso

Pianta de vanilia in fiore.

Tegoline de vanilia secàe.

Tanti golosessi de la vita i xe cussì desiderài e gustài proprio pa ’l profumo de la vanilia: fugasse co le creme o co la ciocolata, caramele, brioches e… ogni altro bendedìo. Al giorno de incò el profumo de vanilia vien doparà anca par tanti prodoti de belessa: saoni, bagno s-ciuma, sanpoo e parfin profumi par le done. I dise che i xe profumi "esotici". No manca sto profumo gnanca su serti prodoti par la pulissia de la casa, proprio par el so profumo… che ’l querse tante spusse!
Podemo dire che sta spessia, dal profumo inconfondibile, la xe de gran moda. Cussì penetrante, ma altretanto dolse, la fa pensare proprio al Paradiso, al profumo de i putèi ’pena nati, na vita da vìvare… Epure i dise che ’l xe anca un profumo sensuale, caldo come la tera da indove che la vien, e precisamente da la fassa tropicale de l’America e de l’Asia: dal Messico, da la Polinesia, da l'Indonesia, la Malaisia, tute tere calienti, no solo par la tenperatura, ma pa’ i costumi e el modo de fare de chela zente, spece feminile… In mezo a chela vegetassion cussì abondante e selvàdega, nasse ’na orchidea speciale: no la xe de le più nobili e smarciassone, ma la xe l’unica, so ventimila qualità che, oltre al fiore, la fassa anca un fruto. El xe na tegolina, longa anca 30 sentìmetri, la nasse a graspi e, sentirla cussì, tacà a la pianta, no la sa da gnente. No se sa come ‒ dal resto tute le robe le sucede par caso ‒ siemila ani fà, i se ga incorti che ste tegoline, in condission particolari, le dà un ojo da sto profumo celestiale e delicato. Da alora, la vanilia la ga scuminsià a èssare tegnùa soto ocio, curà e studià co atension: ste tegoline, bagnàe, le vien messe a bójare e po’ a fermentare in casse, saràe ben e coerte co strasse de lana. Dopo un poco de tenpo le vien messe al sole e po’, distiràe a l'onbra su de le grele, in posti ben verti, ’ndove ghe passa aria in abondansa. Le vole però tignùe al scuro par altri oto mesi prima de sentire el so profumo vero: ste tegoine, deventàe ormai scure, fine come bachetèi, le parte par tuto el mondo, spetàe co inpassiensa par dare profumo a mile pastissi. Ghi ne xe diverse piante de vanilia, la pi mèjo la xe la vanilia Burbon, originaria da l’isola Réunion e del Madagascar; la ga un gusto tanto dolse, fresco e esotico. ’N'altra la xe la vanilia Tahiti, che la dà tegoline pi scure da l’aroma pi dolse. In te sti dó posti, la vanilia la nasse spontanea, ma da quando l’omo ghe ga messo le man par farla créssare in altri posti, el ga dovudo sostituire un inseto che provedeva a far fecondare i fiori e produre la tegolina miracolosa. Adesso, sto mistero naturale el ga da èssare fato a man, da l’omo, fiore par fiore, un lavoro chirurgico, ansi nò, ginecologico, come par far deventare mame le done che no pol avere fiòi naturalmente.
Anca questa, la ga ’na storia longa, qua se parla de mejari de ani fà, adiritura la se trova ne la cusina Azteca, la vigneva smissià col cacao par fare ’na bevanda dolse, bisàvola de la ciocolata al gusto de vanilia. Comunque par la vanilia, la so morte xe proprio ne i dolsi: no la pol mancare ne la crema pasticera, ne la crema che se fa co le bustine e el late, ne i budini de tute le rasse, ne i biscoti, ne i gelati… E chi no se ricorda le creme frite, quando ca jèrimo puareti, la mama le preparava par sena, mèjo de le bisteche che no gavévino! E sora al Pandoro, a Nadale, senpre ne la confession a te cati na bela busta de sùcaro vaniliato che, butà sora a sto dolse, el ghe dà un toco tuto suo, ’na montagna de neve.
Me vien in mente ch la volta, al conpleano de me nevodeto Marco, el faseva 7 ani, me sorela gheva fato un bel dolse co’ sora ’na bela paca de sùcaro vaniliato. Có xe stà ora da stuare le candeline, a ghe go dito che le candele le jera massa par lu e me son proposto de jutarghe a supiare. Invesse de supiare su le candeline, a go dà un supion sul dolse: el sùcaro, come borotalco, el ga ciapà la faceta del putèo che, ofeso, el ga piantà na pantomina che no finiva altro. Chel scherso el me xe costà na paca de tenpo prima de rimétarme in armonia col bocia. Nantro ricordo che resta nel core e ne la memoria xe quando da toseti se ’ndava a catare la nona: ela la ne fazeva trovare i biscoti e, dal forno, vegneva fora sto profumo da bon che te lo sentivi fin in corte (se dise che la vanilia la cuerse el gusto del lievito).
Ècove la riceta par na bevanda golosa! Desfare na steca de ciocolata amara su un pignatin, zontare late beo caldo, squasi de bojo, un tocheto de steca de vanilia, un pissegheto de canela, sùcaro quanto basta e na scorseta de limon; desfare da na parte, co na s-ciantina de late, na punta de cuciaro de farina fècola, quela de patate, e smissiarla co quelo che xe stà preparà prima. Sta bevanda la xe da servire caldissima, come la ciocolata nornale, cussì da farte fare qualche lagrimeta se te si massa ingordo e, come se dise, bévarla la te fa vignere in mente la nona, morta oramai tanti ani indrìo.
Par tignerla ben, la vanilia, come tute le spessie, xe ben tignerla sarà sù; se consilia de cronpare le tegoline secàe, ciamà “stechi de vanilia”, par dopararli có i serve; i xe da vèrzare par longo, métarli in moja nel late o nel siropo de sùcaro. Dopo ’verlo doparà, el steco de vanilia se lassa sugare par ben e lo se poe doparare par nantre tre volte. Anca sta operassion fa vignere in mente quando che jèrimo puareti: alora, par fare el brodo, se se prestava l’osso in fameja, lo se doparava faséndolo bójare ne l’aqua, e, dopo ’verlo sugà par ben, el se tornava a chi te lo gheva prestà.
La vanilia se pol cronparla anca liquida, la vien vendùa in fialete; xe da fare atension però parché la va doparà in dosi pìcole, a giosse, proprio par el so gran profumo.

[torna sopra]