Da San Stefano de Zimela (VR)

1952, xe rivà la Fantasiensa

Finìe le lezion a la scola media de Sanbonifacio, come al solito so ’ndà a darghe ’na ocià a l’edicola che jera lì vizzina. A me piaséa inpinarme i oci co’ le copertine de i tanti giornalini a fumeti che i jera esposti in te le vetrine, parché schei par cronparli a gh’in jera pochi. A un zerto punto a ghe go messo l’ocio su un libro tascabile e sùito a go visto che la copertina la jera sta disegnà da uno de i me disegnatori preferiti che ’l jera Corrado Caesar, che mi a conosséa ben parché i so fumeti e i so grandi paginoni a colori i vegnéa publicà su il Vittorioso. El jera el primo mitico nùmaro de I Romanzi di Urania, el se intitolava Le sabbie di Marte e el jera stà scrito da Arthur C. Clarke, el grande autore de fantasiensa, che ’l gavarìa scrito pi tardi anca 2001 Odissea nello spazio.
A jera el 10 de otobre del 1952, sessantazinque ani fà, e par mi chel giorno l’è stà come se ’na ciave gigantesca la gavesse verto e dopo spalancà le porte su l’Infinito. Mi a gavéa za svilupà ’na gran fantasia e cussita me xe stà fàzzile nar drento e inmedesimarme in te le storie che le me trasportava tra i mondi de la Galassia, tra alieni, robot, mostri e batalie spaziali, che su le astronavi me paréa de èssarghe drento anca mi.
Da prinzipio a lezéa de tuto, ma un poco a la ’olta a me so’ indirizzà solo su zerti autori come Clarke, Williamson, Van Vogt, Simak, Campbell, Statten e Asimov, nomi che a tanti no i ghe dise gnente, ma che a i apassionài de fantasiensa i ghe dise tuto.
Nando ’vanti in te la me selezion a me so’ specializzà su uno solo: el grande e inimitabile Isaac Asimov, che ’l vien considerà un punto fermo in te la storia de la fantasiensa e de la divulgazion sientìfica. El ga scrito ’na montagna de robe, de tuto e su tuto, ma i pi inportanti laori i xe chei del Ciclo della Fondazione e de i Robot positronici. Tra le tante el ga previsto anca robe che dopo le se ga averà, come el gran calcolatore Multivac, che ’desso no l’è altro che el nostro Internet.
Pian pianelo, in tanti ani a so’ riussìo a métare in te la me colezion quasi zentotrenta libri che contiene de i so laori e ogni tanto me rilezzo calcossa parché i xe senpre freschi e atuali.
Abituà ’desso come che semo a tuti i efeti speciài che i dòpara par realizzare i film de fantasienza che te vedi al cinema o in television o la realtà virtuale in te i videogiochi, a rilèzare zerti romanzi de i primi ani a te vien da sorìdare e te vien de domandarte come che i fasesse a piasèrte tanto. Ma ’lora a gavéino la testa mia smalizià e tuto el ne dava calcossa de novo, el ne portava fora da i confini de i nostri paeseti, el ne faséa alzar la testa par vardare in alto e nare a spasso par l’Universo… e sognare: i xe da considerare senpre inportanti parché i xe stà la somenza de el fenomeno fantasientìfico, la base de partenza par l’inizio de ’na nova era, un preludio al domani.

[torna sopra]