Da i Coli Euganei

El nostro Barba Gigio

El gera abituà a fare on soneto al dopomesodì, butà soto el peraro.

Ghe gera in càneva na botesela de vin tegnù lì par la festa de l’Assunta, festa del paese.

Tuti lo ciamava Barba Gigio e el gera el fradèo del nono Giacomo. El viveva in casa co noantri che se godìvino un mondo a farlo rabiare. El la gavéa a morte co la neve, siché quando el sentìa sta parola “neve” el se rabiava proprio sul serio. Quando se sentìa un venteselo che se faseva ’vanti, che gera senpre qualcun che lo ciamava, in modo speciale, spece i grupi de tusiti che passava par strada par ’ndare a scola, che lo ciamava disendo:
“Barba, stavolta la xe qua, la vien, xe qua la neve. Nièvega, barba, stavolta la vien.”
Alora te vedevi el Barba che el se inpirava sù el tabaro e, corendo drio la gente de corsa, el ghe diseva a sti tusiti na streja de parolasse de tute le sorte. In sto modo lu el se rabiava senpre de pi, e luri i scapava via de corsa, ridendo tuti continti.
El gera abituà a fare on soneto al dopomesodì, butà soto la saresara o el peraro. El destirava na strassa vecia e lì el se meteva dormire. Quando el vegneva sù a la fine del soneto col so strasson vecio in man, noantri tri fradèi se gera prunti a dire: “El barba l’è ’ndà a dormire”, savendo che lu el se rabiava, ma lu el diseva senpre che no gera vero, che lu no ’l gavéa dormìo. Alora noantri un bel dì se ghemo messo de acordo: ghemo spetà che ’l dorma e dopo, pianeto, a ghemo portà via le scarpe che gera messe lì da na parte. A on serto punto se sente el Barba che bróntola e quasi el pianze: “Ahi… ahi… ahi…” el caminava in punta de piè par schiavare i sassiti che ghe sponciava i piè sensa calze e sensa calziti. Le persone de casa coréa tuti là par védare cossa che gera capità. Có i ne ga visti noantri tri pìcoi che rideva de gusto i ga capìo che se tratava de on scherso fato da noantri e naturalmente i ne ga rinproverà anca parché gera stà scoperto che el Barba dormiva, anca se no ’l voleva dirlo.
In fondo el gera anca bon parché el ne portava senpre a casa qualche tòco de schissoto che i ghe regalava quando el ’ndava a filò in qualche boarìa arente casa.
Na volta se usava ’ndare ogni fameja a farse la fotografia tuta la fameja in grupo. Lu el se ga rifiutà, disendo che ’l stava a tèndare casa. Ghe gera in càneva na botesela de vin tegnù lì par la festa de l’Assunta, festa del paese. Riva el dì de l’Assunta, prunti i parinti par el pranseto e na torta margherita, el capon pi grosso e el vinelo de la botesela. Ma al momento de vèrsarghe el spinelo, forsa de fàrghene, el se ga verto, ma de vin drento no ghe ne gera gnanca na giossa. Ma, vardando soto la pansa de la botesela, ghe gera on spinèo picenin sarà ben, che no se vedéa quasi. Cossa gera capità?
Ogni volta che el Barba restava a casa da solo parché i altri i gera so ’l canpo, a modo suo el gera riussìo a bévarse on meso gotin, anzi alora se ghe ciamava onbreta del famoso vin tegnù sparegnà par el dì de la sagra. Subito se ga incolpà el Barba, l’unico che podeva a fare sta roba. Difati el gavéa forà la bote e po’ sarà co ’l canoin, ma lu el diseva senpre de nò. A ogni modo la sagra co ’l so pranseto gera stà fata istesso e tuto xe nà finìo in te na bea ridada, parché la pareva na barzeleta.
Ghe ne sarìa tante da contare sul Barba Gigio, ma sarà par nantra volta. In fondo sto fradèo del nono el gera bon e el ne voéa ben a tuti, anche se ’l gera on pochetin stranbo o salvego, come se diseva alora.

[torna sopra]