|
Da Verona
Arturo Ferrarin
el “veneto co’ le ale”
Lindbergh? Tuti i sa ci l’è: “el primo che à sorvolà l’Atlantico in solitaria!”; qualchedun magari el ghe zonta: “e l’aereo el se ciamava Spirit of Saint Louis!” e naltro: “l’è stà nel 1927”. Brài! Avì studià ben! Ma se ve domando ci l’èra Arturo Ferrarin? Silensio! Pecà… parché el nostro Arturo Ferrarin l’è stà un grande aviator, uno che à ligà el so nome a imprese memorabili come el “Raid Roma-Tokio” o la “Trasvolata da Roma a Rio de Janeiro” del 1928. A l’epoca i giornài i l’à proclamà “el Lindbergh italian” e a rason… parché Ferrarin no ’l gavéa propio gnente da invidiarghe al colega american. Ma vedemo de scoprir ci l’è stà ’sto grande nostro pilota.
Dunque: Arturo Ferrarin el nasse a Thiene (VI) el 13 Febraro del 1895 in na fameja de industriali tessili. A l’età giusta el scominçia el liceo classico, par scoprir presto che i motori i ghe piase più de Omero. In particolar l’è atirà da le notissie riguardo a i primi aerei: volar sora le nuvole, sarìa fantastico, ma ’verghe ’n so aereo el podarìa restar solo un sogno. A realisàrghelo ghe pensa la guera, parché nel 1915 el se aruola volontario nel “Battaglione aviatori”. No’ che ghe fusse da far la coa… i aerei i era fati de legno e tela e i era pericolosi: se i te centrava te podéi ciapar fogo in volo o s-ciantarte in tera, comunque che la andesse te s’eri morto, parché i paracadute no’ i se usava. Così ci entrava in aviassion l’era visto come un mato… sicuramente “eroe”, ma senpre mato.
A l’inissio Ferrarin el fa el mitralier, prima su i aerei che parte da Torin e dopo da Verona, ma nel 1916 finalmente el fa domanda de breveto e za nel stesso ano l’è lu a tegner in man la cloche. La so “82ª Squadriglia” la ga base a San Pietro in Gu, vissin a Vicenza, e da lì ogni giorno el parte col so biplano par inpegnar i “cruchi” in inseguimenti degni del “Barone Rosso”. Dopo un po’ de vitorie el vien anca premià con ’na medaja al valor. E anca se nel 1918 la guera la finisse, Ferrarin el continua a volar: brao come l’è el fa el colaudator de prototipi par l’aereonautica (ris-ciando la vita ogni volo) e vegnendo spedì ogni tanto in posti come Parigi e Amsterdam a far védar a i esteri le capacità acrobatiche de i italiani.
Rivemo così al 1920. A l’inissio de quel’ano Gabriele D’Annunzio, insieme al poeta giaponese Shimoi, el lancia l’idea de un gran “Raid Aereo” da Roma a Tokio. L’è n’aventura: bisogna sorvolar tuta l’Asia fasendo scalo in posti come Arabia, India e Cina dove no’ s’avéa mai visto volar aerei. Al governo italian l’idea la piase e così el “Raid” el vien organizà. A Ferrarin l’aereonautica la ghe dà un vecio “SVA9”, più residuato de guera che prototipo, e la matina del 15 Febrar insieme al so amigo Gino Cappannini el parte da la pista de Centocelle (Roma) con davanti ’l sol che nasse e 16.000 km de incognite. Con lu parte anca altri diese aerei, ma a rivar a destinassion sarà solo el suo, dopo ben 160 ore de volo, 32 scali e n’infinità de inprevisti. A Tokio a spetarlo ghè 200.000 persone, conpreso l’inperator Yoshihito che ’l vol ricévarlo a palasso. I festegiamenti i ’ndarà avanti par un mese e mèso e l’impresa la farà el giro de tuti i giornài del mondo.
L’ano dopo Ferrarin el metarà nero su bianco, la so aventura nel libro “Il mio volo Roma-Tokio” e ’l so aereo el restarà esposto in un museo giaponese fin al 1933. Passà la celebrità el nostro eroe el torna a far el colaudator de aerei, vinsendo ogni tanto qualche premio e partecipando a manifestassioni acrobatiche in giro par l’Europa. La notorietà par lu la rivarà de novo nel 1928. L’ano prima ghera stà la famosa trasvolada atlantica de Lindbergh e Mussolini (a l’epoca “duce”) el voléa vantar anca par l’Italia n’impresa simile. L’idea che ghè piasù de più l’è stà quela de traversar ancora l’oceano in aereo, ma staolta partendo da l’Italia e con destinassion Rio de Janeiro. El mèjo pilota a disposission l’era Ferrarin e cusì l’inpresa l’è stà afidà a lu.
El 3 Lujo el nostro el parte così da l’aeroporto de Guidonia (Roma) con un Savoia-Marchetti S64 insieme al capitano Carlo del Prete a farghe da secondo. El volo previsto l’è longo 7.666 km (quel de Lindbergh l’èra più curto: 5.600 km, però da solo) da far in dó giorni… L’aereo però a Rio el ghe rivarà solo el 5 Agosto par via de un problema tecnico che l’avéa costreto a fermarse a Touros (Brasile) par le riparassioni. Comunque Ferrarin el conquista el primato mondiale del volo più longo (49 ore) e de la distansa più longa sensa scalo. A Rio altro giro de feste (dó setimane!) e de notorietà mondiale… funestà però da la morte del so compagno in un incidente aereo durante la fase de ritorno. Anca staolta Ferrarin el scrivarà la so inpresa in un libro: “Voli per il mondo”, dedicà al so amigo Carlo del Prete.
Nel 1935 naltro incidente l’entra ne la vita de Ferrarin: a Genova in un capotamento more el so passeger: Edoardo Agnelli, fiol de quel Giovanni che avéa fondà la Fiat. Pochi ani dopo anca par Ferrarin rivarà la fine, propio a Guidonia in quel’aeroporto che l’avéa visto tredes’ani prima partir par la trasvolada atlantica: durante uno de i so mile voli da colaudator el se s-cianta el 18 Lujo 1941.
A l’epoca l’Italia l’era za in guera e sicuramente Ferrarin l’avarìa preferì morir combatendo piutosto che in un incidente de colaudo, ma ani prima la so notorietà la gavéa dà fastidio a Italo Balbo e così el famoso gerarca-aviator l’avéa troà un pretesto qualsiasi par farlo congedar e liberàrsene. Passà la guera, l’Italia però no’ la se l’à mia desmentegà… Sul lago de Bracciano, vissin al museo de l’aeronautica, ghè un monumento: l’è un pilota postà a n’enorme ala verticale; la targa la recita: “Arturo Ferrarin – Gloria dell’Aviazione Italiana”.
Ècolo lì: l’è el nostro “Veneto co’ le ale”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Mi, senpre mi, solamente mi!
Canbia el raporto tra le persone, aumenta la malatìa da protagonismo che la fa gonfiare l’omo ma no la lo farà mai zolare; cresse la crisi de na socetà che se slontana senpre de pi dal vìvare civile. Dove stalo el problema?
de Mario Sileno Klein
Da Verona
Arturo Ferrarin
el “veneto co’ le ale”
de Mirco Castellani
Da Legnago (VR)
La legenda de la spiga del formento
de Franca Isolan Ramazzotto
|
